Yesu Wadisa Athu Avula

Gutuama egi wano wa Pake ukalegewe mu givo 32 G.Y., apostolo akatugile mu mudimo wa gulongesa, akhalele aguhuila diago. Hene, Yesu wayile nawo mu wato gu Batesayida hagula ajiya guhululuga. Uvi tangua wato wahetele hehi nu gonze, Yesu wamonele athu avula gualandula. Ikhale Yesu wakhalele mutshigina gukhala hakhenji nu apostolo, wamonegesele athu ene gisemo. Wasagele athu akhalele nu misongo, wasendesele gualongesa. Waalongesele ndaga jiatadila Ufumu wa Nzambi lusugu lua mudidi. Tangua ngueze yabuile, apostolo enji amuwambelele egi: ‘Athu adi muvua nzala. Awambele aye hagula akambe ima ya gudia.’

Yesu waawambelele egi: ‘Ashigo muya. Enue hakhenu ahanenu ima adie haha.’ Apostolo azuelele egi: ‘Udi mutshigina egi tuye tuasumbile mapha?’ Mupostolo mumoshi jina dienji Filipho, wazuelele egi: ‘Ikhale nga tudi nu makuta avula, tuajiyilego gusumba mapha avula mukunda nu athu awa agasue.’

Yesu waahudile egi: ‘Itshi tudi nayo?’ Andele wavutudile egi: Tudi phamba nu mapha atano, nu jishui mbadi. Ajiyilego gutagana mukunda nu athu awa agasue.’ Yesu wazuelele egi: ‘Ngubatele dipha nu ishui.’ Wawambelele athu ha gukhala hashi mu mahunji a athu 50 nu a athu 100. Yesu wazudile mapha nu ishui, watalele gosa, watshitshile gisambu. Gungima wahanele ima yene ya gudia gudi apostolo, asendesele gukhaphela athu. Athu adile, akutshile. Akhalele mala 5 000 nu akhetu nu ana. Gungima apostolo anonele itshinyi yasalele hagula ilabigo gudiyila. Yakhalele inda 12 ya guzala! Yakhalele diago ndaga ya gushimana, ishigo ngenyi ba?

Athu asuangulugile muavula, hene atshiginyile gubuisa Yesu fumu wawo. Uvi Yesu wajiyile egi yakhalelego tangua Yehowa watombele hagula abue fumu. Hene, wawambelele athu ha guvutuga gumbo diawo, gungima wawambelele apostolo enji ha guya ha sambua diko dia Kianga gia Galileya. Anginyile mu wato, ayile; gungima Yesu wakandugile hakhenji gu mulundu. Mukunda natshi? Handaga wakhalele mutshigina gukombelela Sh’enji. Yesu wakhalele nu ndaga jiavula jia gutshita, uvi wakhalele muzula tangua dia gutshita gisambu.