GUSENDESA GUTA MAGA NU ATHU
LONGO 2
Zuela nu Muthu Gifua Luholo Wana Zuela Masugu Agasue
Longo dia Biblia: ‘Mbimbi yazuelewa mu tangua diabonga, yana khala diago yabonga!’—Ish. 15:23.
Itshi Filipho Watshitshile?
1. Tala VIDEO, nga ndo tanga Makalegelo 8:30, 31. Gungima hana mvutu (kueteya) gu mihu eyi:
Luholo lutshi Filipho wasendesele guta maga nu muthu muene?
Mukunda natshi tudi muzuela egi yakhalele luholo luabonga lua gusendesa guta maga ha gulongesa muthu ndaga ihe-ihe?
Longo Ditshi Tuazula mu Gifezegeselo gia Filipho?
2. Gula tudi muzuela nu muthu gifua luholo tuana zuela masugu agasue, muthu udi gututegelela mbagashigo muvua woma uvi mbawutegelela nu gusuanguluga guagasue.
Landula Gifezegeselo gia Filipho
3. Khala mutala muabonga. Wajiya gujiya ndaga jiavula jiatadila muthu udi muta n’enji maga gula udi mutala luholo ludi munyigisa muene muto, mago nu phanga jienji. Muthu muene udi musuanguluga guta naye maga ba? Ha gusendesa gumuwambela ndaga imoshi idi mu Biblia, wajiya gumuhula egi: “Wana jiya egi . . . ?” Gula muthu muene gashigo mutshigina genji guta naye maga, mubembe.
4. Utshitshigo ndaga muphushi. Utangizago egi udi naye guzuelela ndaga imoshi ya Biblia mbala imoshi. Uvi wajiya gunengena uu nu tangua mbawuheta okazio uko, ngenyi wajiya giwa gulongesa. Matangua ako, yajiya gutoga egi unengene uu nu tangua mbawuta n’enji luko maga mu lusugu luko.
5. Ukuataganago phamba nu matangi amoshi. Muthu mudi muta n’enji maga wajiya guzuelela ndaga iko yinyi aye watangijilego. Ngenyi, wajiya gumulongesa ndaga yinyi yajiya gumukuatesa, ikhale ishigo luholo lumoshi nu yinyi wakhala naye mu matangi aye.