YIKADIKILE MU MUDIMO WA GULONGESA | HETA GUSUANGULUGA GUAVULA MU MUDIMO WA GULONGESA
Gukuata Mitshima ya Athu
Gutumagela Nzambi guana gukatuga mu mutshima. (Ish 3:1) Hene tangua tudi mulongesa athu, tudi naye gutshita yagasue ha gukuata mitshima yawo. Luholo lutshi?
Tangua udi mulongesa muthu giamatshidia gidi mu Biblia, tshita yagasue ha gumukuatesa ha gukotelesa luholo ndaga udi gumulongesa jiajiya gumukuatesa mu monyo wenji nu ha gukudisa ufuta wenji nu Yehowa. Mukuatese nji ha gukotelesa luholo malongo a Biblia ana monesa guzumba nu gisemo gia Nzambi nu khadilo dienji dia gukalagala ndaga mu luholo luatagana. Khala nu gisemo nu gutema tangua udi gumuhula mihu mbayimukuatesa ha gujiya matangi’enji mukunda nu ndaga adi muloguga. Kuatesa muthu muene ha gutangiza gubonga ajiya guheta mu monyo wenji gula wasombegesa khadilo dimoshi diabola ana khala nadio nga ndaga iko yabola gana kalagala. Tangua mbawumona luholo muthu wana longesa Biblia adi muzumba Yehowa nu mutshima wenji wagasue, mbawukhala nu gusuanguluga guavula lume.
TALENU VIDEO IDI MUZUELA EGI: HETA GUSUANGULUGA MU MUDIMO WA GUBUISA ATHU ALANDUDI—KUDISA LUHOLO LUAYE LUA GULONGESA—GUKUATA MITSHIMA YA ATHU. GUNGIMA HANENU MVUTU GU MIHU EYI:
Mukunda natshi phangi Neeta wahudi Jade egi: “Aye mujiya luko ndaga tualongugile mu lusugu luabalega?”
Luholo lutshi phangi Neeta wakuatesa Jade ha gukotelesa luholo mikhuala nu malongo a Biblia ana monesa egi Yehowa wana gumuzumba?
Gula tudi mutshita yagasue ha gukuata mutshima wa muthu tuana longesa Biblia, yajiya gumutuma ha gukudisa ufuta wenji nu Yehowa nu ha gusala wa gujinginyina gudi muene
Luholo lutshi phangi Neeta wakuatesa Jade ha gutangiza luholo wajiya gumonesa egi wana guzumba Nzambi?