Khala Mulandula Yesu Gungima dia Gubatijiwa Guaye

1-2. Gubonga gutshi muthu wana heta gula wabatijiwa?

TUANA khala nu gusuanguluga tangua tuana batijiwa nu tuana ngina mu fami ya Yehowa. Athu ana heta luendu lua luholo elu ajiya gutshigina mbimbi jiazuelele muyimbi wa ngimbo Davidi egi: ‘Gusuanguluga gudi nu muthu aye Yehowa wana tomba nu wana tamega ha gukhala mu inzo yaye.’​—Ngi. 65:4.

² Yehowa ganago gulaba gukuata ufuta nu muthu wagasue. Gifua luholo tuayimonele mu longo diabalega, Yehowa wana suena hehi nu athu ana monesa egi adi mutshigina gusuena hehi nu muene. (Yak. 4:8) Tangua wadihanele gudi Yehowa nu wabatijiwe, wakuatele diago n’enji ufuta wakola. Wajiya gusha mutshima egi muene ‘mbawugubunduila ima yabonga yavula, mbawudifudigo nga gima.’​—Mal. 3:10; Yel. 17:7, 8.

3. Ginemo gitshi Aklisto anyi adihanele gale gudi Yehowa nu abatijiwe ana khala nagio? (Mulongeshi 5:4, 5)

³ Gubatijiwa gudi gisendeselo gia ndaga jiagasue mu mudimo wa Yehowa. Gungima dia gubatijiwa, udi naye gulandula gutshita yagasue ha gutagenesa ndaga walayele Yehowa nu gusala ya gujinginyina gudi muene ikhale watagana nu malamba nga walolewa. (Tanga Mulongeshi 5:4, 5.) Luholo wabua mulandudi wa Yesu, udi naye gulandula gifezegeselo gienji nu gutumagela muabonga malongo enji. (Mat. 28:19, 20; 1 Phet. 2:21) Longo edi diza gugukuatesa ha gutshita ngenyi.

KHALA MULANDULA YESU IKHALE UDI MUTAGANA NU MALAMBA NGA WALOLEWA

4. Luholo lutshi mulandudi wa Yesu wagasue udi naye gubata “mutshi wenji wa lamba”? (Luka 9:23)

⁴ Utangizago egi gungima dia gubatijiwa guaye, mbawushigo mutagana nu malamba. Yesu wazuelele egi, mulandudi wenji wagasue udi naye gubata “mutshi wenji wa lamba.” Udi naye nji gutshita ngenyi “lusugu nu lusugu.” (Tanga Luka 9:23.) Yesu wakhalele mutshigina guzuela egi alandudi enji mbaakhala gawo mumona malamba tangua diagasue ba? Ndo sha. Watshiginyile guzuela egi mbaaheta ishimbigo yavula, uvi mbaatagana nu malamba. Malamba ako mbaakhala akola diago.​—2 Tim. 3:12.

5. Yesu walayele itshi gudi athu ana zula desizio dia gumulandula?

⁵ Yajiya gukhala egi wataganele gale nu usageshi mu fami yaye nga ndo wabembele ima yaye iko ha gusha Ufumu wa Nzambi ha fundo dia thomo mu monyo waye. (Mat. 6:33) Gula idi ngenyi, jiya egi Yehowa wana mona ndaga jiagasue wana kalagala mukunda nu muene. (Heb. 6:10) Idi yadiago egi wamonele gutagenesewa gua mbimbi jiazuelele Yesu egi: “Muthu wagasue wabemba inzo nga aphangi’enji a mala nga aphangi’enji a akhetu, nga gin’enji nga sh’enji, nga ana, nga mahia mukunda nu ame nu mukunda nu lukuma luabonga, sendese mangino, muene mbawuheta jinzo, aphangi’a mala, aphangi’a akhetu, amama, ana nu mahia mahugo gubalega 100 hamoshi nu usageshi. Mu masugu adi muza mbawuheta monyo wa ivo nu ivo.” (Mako 10:29, 30) Gubonga wahetele gudi guavula gubalega ndaga jiagasue wakalegele.​—Ngi. 37:4.

6. Mukunda natshi udi naye gulandula gulua nu “nzala ya muila” gungima dia gubatijiwa guaye?

⁶ Jiya egi mbawulandula gulua nu “nzala ya muila” ikhale gungima dia gubatijiwa guaye. (1 Yone 2:16) Mukunda natshi? Handaga ushigo muthu watagana. Matangua ako, wajiya gudivua gifua luholo luadivuile mupostolo Phaula. Wasonegele egi: “Ngana suanguluga muavula nu mikhuala ya Nzambi mu mutshima wami. Uvi ngudi mumona egi mu muila wami mudi nu mukhuala uko udi muluisa mukhuala wana tuameza matangi ami. Mukhuala wene wana gungubuisa muenya bologo wa mukhuala wa gutshita gubola udi mu muila wami.” (Roma 7:22, 23) Wajiya nji guleba muila mukunda nu luholo wana tshita ndaga jiabola. Uvi gula udi mutangiza ndaga walayele Yehowa tangua wadihanele gudi muene, mbawuheta ngolo jia gutuna gubua mu muheto wa gukalagala ndaga jiabola. Ndaga ya giamatshidia idi egi, gudihana guaye gudi Yehowa mbagugukuatesa gula watagana nu malamba. Luholo lutshi?

7. Luholo lutshi gudihana guaye gudi Yehowa guajiya gugukuatesa ha gusala yagujinginyina gudi muene?

⁷ Tangua wadihanele gudi Yehowa, waditunyile. Yakotelesa egi wazudile desizio dia gutuna nzala jia muila nu mafelela anago gusuanguluisa Yehowa. (Mat. 16:24) Ngenyi tangua mbawulolewa nga mbawutagana nu malamba, mbawushigo mukamba ndaga yagutshita. Mbawukhala wazudi gale desizio dia gujiya ndaga wajiya gutshita ha gusala yagujinginyina gudi Yehowa. Mbawuzula nji desizio dia gusuanguluisa Yehowa. Mbawulandula gifezegeselo gia Yobo. Yobo wataganele nu malamba akola, uvi wazuelele egi: ‘Mbangubembigo gutshigina guami!’​—Yobo 27:5.

8. Luholo lutshi gutangigiza mu ndaga wawambelele Yehowa tangua wadihanele gudi muene, guajiya gugukuatesa ha gutuna gubua mu muheto wa gubola?

⁸ Gula udi muzula tangua dia gutangigiza mu ndaga wawambelele Yehowa tangua wadihanele gudi muene, mbayigukuatesa ha gutuna gubua mu muheto wa gubola. Ha gufezegesa, wajiya gusendesa gukalegela muthu gashigo mukaji’aye nga mulumi’aye ndaga jidi mumonesa egi udi mutshigina gumuzumba uvi aye ushigo nu matangi ene ba? Ndo sha! Handaga walayele Yehowa egi mbawushigo mutshita ndaga jia luholo elu. Gula ushigo mubemba egi nzala jiabola jikule mu mutshima waye, mbawushigo mumona lamba dia gujikatula. Ngenyi ‘mbawulenga’ diago ‘njila jia athu abola.’​—Ish. 4:14, 15.

9. Luholo lutshi gutangigiza mu ndaga wawambelele Yehowa tangua wadihanele gudi muene, guajiya gugukuatesa ha guhaga Yehowa ha fundo dia thomo mu monyo waye?

⁹ Itshi wajiya gukalagala gula waheta mudimo udi gugukanga njila ha guya mu gudibungisa gua mu hungu tangua diagasue? Gushigo nu giphapha egi udi mujiya ndaga wajiya gukalagala. Gutuama egi aguhane mudimo wene, wakhalele mujiya egi wajiyilego gutshigina mudimo wajiya gugukanga njila ha guya mu gudibungisa. Ngenyi mbawushigo mukhala nu nzala ya gutshigina mudimo wene, hagula gungima usendese luko gukamba luholo lua guhaga Yehowa ha fundo dia thomo. Gutangigiza gifezegeselo gia Yesu guajiya gugukuatesa. Yesu wazudile desizio dia gusuanguluisa Sh’enji, aye nji wajiya guzula desizio dia gukalagala ndaga jiana suanguluisa Nzambi handaga wadihanele gudi muene.​—Mat. 4:10; Yone 8:29.

10. Luholo lutshi Yehowa mbawugukuatesa gungima dia gubatijiwa guaye ha “gulandula” Yesu?

¹⁰ Ndaga wana kalagala tangua udi mutagana nu malamba nga ndo walolewa yana monesa egi udi mutshigina “gulandula” Yesu. Jiya egi Yehowa mbawugukuatesa ha guyitshita. Biblia idi muzuela egi: “Nzambi udi wagujinginyina; muene mbaashigo muhana njila egi ndaga yinyi muajiyilego gukolesela imibuile. Uvi mbawumikuatesa hagula muajiya gukolesela ndaga yene.”​—1 Kol. 10:13.

LUHOLO LUTSHI TUAJIYA GULANDULA YESU?

11. Luholo lutshi luabalega gubonga tuajiya gumonesa egi tudi mulandula Yesu? (Tala nji gifuanesa.)

¹¹ Yesu wakhalele mukombelela Yehowa nu mutshima umoshi; wakhalele nji musuena hehi n’enji mu gisambu. (Luka 6:12) Ndaga yabalega gubonga udi naye gutshita ha gulandula Yesu gungima dia gubatijiwa guaye idi, gutshita ndaga jiajiya gugukuatesa ha gusuena hehi nu Yehowa. Biblia idi muzuela egi: “Ikhale tuakudile gale luholo lutshi, tubembigo guwenda mu luholo luatagana mu njila yene imoshi.” (Fili. 3:16) Tangua diagasue mbawulandula guvua mene jia aphangi a mala nu a akhetu anyi azudile desizio dia gutshita muavula mu mudimo wa Yehowa. Yajiya gukhala egi anginyile Khalasa dia Alongeshi a Ufumu nga ndo, ayile mu mafundo akhalele nu funu ya alongeshi. Gula aye nji wadishila mafelela a luholo elu, mbayikhala ndaga yabonga diago. Akombeledi a Yehowa ana tshita ngolo ha gudihana muavula mu mudimo wenji. (Makal. 16:9) Itshi wajiya gutshita gula udi mutangiza egi ushigo hehi ha gutagenesa ginemo giene? Utangizago egi athu anyi ana tagenesa ginemo giene agubalega. Ndaga yabalega ndando idi egi udi mulandula gukolesela. (Mat. 10:22) Ujimbilago egi Yehowa wana suanguluga muavula gula udi mukalagala yagasue ha gumukombelela mu luholo luatagana. Elu luholo luabonga lua gulandula Yesu gungima dia gubatijiwa guaye.​—Ngi. 26:1.

12-13. Itshi wajiya gukalagala gula ushigo luko nu gikhesa mu mudimo wa Yehowa? (1 Kolinto 9:16, 17) (Tala galuanda “Landula Guzula Phushi.”)

¹² Itshi wajiya gutshita gula wamona egi luholo udi mutshita isambu nga luholo udi mulongesa lushigo luko gifua wakhalele guyitshita thomo? Itshi wajiya gutshita gula ushigo luko musuanguluga nu lutango luaye lua Biblia? Gula ndaga jia luholo elu jiagubuila gungima dia gubatijiwa guaye, utangizago egi ushigo luko nu nyuma ya Yehowa. Luholo ushigo muthu watagana, matangua ako luholo luaye luagutangiza luajiya gusombegesa. Gula ushigo luko nu gikhesa, wajiya gutangiza gifezegeselo gia Phaula. Wakhalele mukalagala yagasue ha gulandula Yesu, uvi wakhalele mujiya egi matangua ako gakhalelego nu ngolo jia gutshita ndaga jiakhalele muene mutshigina gutshita. (Tanga 1 Kolinto 9:16, 17.) Wazuelele egi: “Uvi gula ngatshitshilego mudimo wene nu mutshima umoshi, udi khuta mudimo wanguhuile Nzambi.” Yakotelesa egi Phaula wazudile desizio dia gukalagala mudimo wenji wa gulongesa ikhale matangua ako gakhalelego gudivua muabonga.

¹³ Luholo lumoshi nji, ubembigo egi luholo luaye luagutangiza lugutume ha guzula badesizio. Zula desizio dia gutshita ndaga jiabonga ikhale ushigo mutshigina diago gujitshita. Gula walandula gukalagala ndaga jiabonga, luholo luaye lua gutangigiza luajiya gusombegesa. Gula udi mutshita yagasue ha gubamba programe yaye ya gulonguga Biblia, gutshita gisambu, guya mu gudibungisa nu gulongesa lukuma luabonga, mbayigukuatesa ha gulandula Yesu gungima dia gubatijiwa guaye. Gikhesa giaye mbagikuatesa nji aphangi ako ha gulandula gifezegeselo giaye.​—1 Tes. 5:11.

“KHALENU GUDITADILA MUABONGA”

14. Ndaga jitshi udi naye gutadila tangua diagasue? Mukunda natshi? (2 Kolinto 13:5)

¹⁴ Mbayikhala nji ndaga yabonga gula gungima dia gubatijiwa guaye, udi guditadila muabonga tangua diagasue. (Tanga 2 Kolinto 13:5.) Khala mutala tangua diagasue gula programe yaye ya lutango lua Biblia lusugu nu lusugu, ya gutshita gisambu, ya guya mu gudibungisa gua mu hungu nu mu mudimo wa gulongesa idi yabonga. Kamba maluholo wajiya gusuanguluga nu guheta gubonga mu ndaga jiene. Ha gufezegesa, dihule egi: ‘Ngajiya gukotelesela athu ako malongo a gisendeselo a Biblia ba? Gudi nu ndaga ngajiya gutshita ha gusuanguluga muavula mu mudimo wami wa gulongesa ba? Luholo lutshi ngana kalagala isambu? Isambu yami yana monesa egi ngana shila Yehowa mutshima ba? Ngana guya mu gudibungisa gua mu hungu phoso nu phoso ba? Luholo lutshi ngajiya gulandula muabonga ndaga jidi mulongesewa mu gudibungisa nu guhana bakomantere?’

15-16. Longo ditshi tuajiya guzula mu lumene lua phangi Robert mu ndaga yatadila gulenga gubola?

¹⁵ Wajiya nji gudihula egi ndaga itshi nganago gutagenesa muabonga? Phangi Robert watele lumene ludi mumonesa ndaga yene; wazuelele egi: “Tangua ngakhalele nu ivo hehi nu 20, ngakhalele mutshita mudimo. Lusugu lumoshi, mona mukhetu mumoshi tuakhalele mukalagala n’enji mudimo wangutamegele gumbo dienji. Wazuelele egi mbatukhala muyadi etu, mbatubalegesa nji ‘tangua diabonga.’ Thomo ngatunyilego nu mutshima umoshi, uvi gungima ngatunyile nu gikhesa giagasue, ngamukotelesele nji gishina ngatunyile.” Robert gabuilego mu muheto wene, idi diago ndaga yagushimana. Gungima phangi Robert wakotelesele egi, lusugu luene, guakhalele nu luholo luko luabonga lua gutshita ndaga. Wazuelele egi: “Ngatunyilego muphushi nga nu gikhesa giagasue, gifua luholo Yozefe wakalegele gudi mukaji’a Potifale. (Gis. 39:7-9) Ngadihudile diago luholo ngamonele lamba ha guwambela mona mukhetu muene egi ngatuna. Ndaga yene yangukuatesele ha gukotelesa egi ngakhalele naye gukolesa ufuta wami nu Yehowa.”

¹⁶ Wajiya guheta gubonga gula udi mutangigiza gifua luholo luatshitshile Robert. Tangua diko wajiya gubinga mu muheto wa gubua mu gubola. Uvi dihule egi: ‘Ndaga yene yanguzudi matangua guvula gutshi hagula ngutune?’ Gula wamona egi udi naye gusombegesa ndaga imoshi, ulebigo muila. Suanguluga luholo wajiya ndaga udi naye gusombegesa. Kalagala gisambu mukunda nu ndaga yene, khala nji mukalagala ndaga jiajiya guguhana gikhesa gia gutumagela mikhuala ya Yehowa.​—Ngi. 139:23, 24.

17. Luholo lutshi lumene lua phangi Robert ludi mumonesa egi watumbuishile jina dia Yehowa?

¹⁷ Lumene lua Robert luajiya gutukuatesa ha gukotelesa longo diko. Wazuelele luko egi: “Tangua ngatunyile gami, mona mukhetu muene wanguwambelele egi: ‘Wabinga!’ Ngamuhudile egi itshi umutshigina guzuela? Wanguwambelele egi futa dienji mumoshi wakhalele thomo Temue wa Yehowa, wamulezele egi mavuala a matemue a Yehowa agasue anatshita uthambi mu gisuegi; gula aheta okazio ajiyilego gutuna nga hazonda. Havile muene ndaga yene, mona mukhetu muene ngakhalele mutshita n’enji mudimo, wawambelele futa dienji egi: Mbanguya mulola Robert, hagujiya gula idi ngenyi. Robert wazuelele egi: ‘Ngakotelesele mu tangua diene egi ngakhalele naye gusuanguluga luholo ngatumbuishile jina dia Yehowa.’”

18. Wazula desizio dia gutshita itshi gungima dia gubatijiwa guaye? (Tala galuanda “Malongo Mbadi Mbaagusuanguluisa.”)

¹⁸ Gula wadihana gudi Yehowa nu wabatijiwa, mbawumonesa egi udi mutshigina gutumbuisa jina dia Yehowa ikhale ndaga itshi yagubuila. Ujimbilago egi Yehowa wana jiya malamba wana tagana nawo nu luholo wana kolesela mu muheto wa gutuna gubua mu gubola. Mbawugushimbiga luholo udi mutshita ngolo ha gusala yagujinginyina gudi muene. Khala musha mutshima egi nyuma yenji mbayiguhana ngolo ha gukolesela. (Luka 11:11-13) Yehowa mbawugukuatesa ha gulandula Yesu gungima dia gubatijiwa guaye.