Gibawu Gidi Gutulongesa Itshi?

1. Mukunda natshi idi nu ndando ha guya mu gudibungisa gua Guwunguluga Gufua gua Yesu givo nu givo?

IDI YADIAGO egi wana tshigina egi gibawu gidi kado gabalega ndando! (2 Kol. 9:15) Luholo Yesu wafuile mukunda nu esue, tuajiya gukhala nu ufuta wakola nu Yehowa Nzambi. Tuajiya nji guheta luendu lua gujinga mayilago. Tudi nu ndaga jiavula jidi gututuma ha guhana Yehowa mersi handaga guzumba guamutumine ha gutuhana mulambu wene! (Roma 5:8) Ha gulandula guhana mersi nu gutuna gubuita mutshima mu ndaga Yehowa nu Yesu atshitshile mukunda nu esue, Yesu watuwambelele ha gulandula guya mu gudibungisa gua Guwunguluga Gufua Guenji.​—Luka 22:19, 20.

2. Itshi tuza muzuelela mu longo edi?

² Mu givo egi Guwunguluga Gufua gua Yesu mbagukalegewa mu lusugu lua Samano 12 Avril 2025. Idi yadiago egi mukut’etu agasue tudi gudilondega ha guya mu gudibungisa guene. Mbatuheta gubonga guavula gula tudi muzula tangua dia gutangigizaa mu sungi yene ndaga Yehowa nu Yesu akalegele mukunda nu esue. Mu longo edi tuza muzuelela ndaga gibawu giajiya gutulongesa mukunda nu Yehowa nu Yesu. Uvi mu longo dialandula mbatukotelesa luholo tuajiya guheta gubonga mu gibawu nu luholo tuajiya guhana mersi mukunda nu gibawu giene.

GIBAWU GIDI GUTULONGESA ITSHI MUKUNDA NU YEHOWA?

3. Luholo lutshi gufua gua muthu mumoshi guajiya gukula athu avula mu uhiga wa gubola nu gufua? (Tala nji gifuanesa.)

³ Gibawu gidi gutulongesa egi Yehowa udi Nzambi wana tshita ndaga mu luholo luabonga. (Mikh. 32:4) Mukunda natshi tuazuela ngenyi? Handaga tangua Adama walumbugile Nzambi, wabuile muenya gubola nu wafile, hene esue nji tuabuile enya gubola nu tuana gufua handaga tudi an’enji. (Roma 5:12) Ha gutukatula mu uhiga wa gubola nu gufua, Yehowa walondele ndaga hagula Yesu ahane gibawu. Luholo lutshi gufua gua muthu mumoshi guajiya gukula athu avula mu uhiga wa gubola nu gufua? Mupostolo Phaula wazuelele egi: “Athu avula abuile enya gubola mukunda nu gushaga gua muthu mumoshi [Adama]. Luholo lumoshi nji, mukunda nu gutumaga gua muthu mumoshi [Yesu], athu avula mbaabua athu abonga gu meso a Nzambi.” (Roma 5:19; 1 Tim. 2:6) Mu guzuela guko Phaula wamonesele egi athu agasue abuile enya masumu nu ana gufua handaga muthu mumoshi watagana walumbugile Nzambi. Hene ha gutukatula mu uhiga wa gubola nu gufua yakhalele mutoga egi muthu mumoshi watagana atumagele Nzambi.

4. Mukunda natshi Yehowa gabembelego egi ana Adama anyi akhalele gumutumagela ajinge mayilago?

⁴ Yesu wakhalele naye diago gufua ha gutuhuluisa ba? Mukunda natshi Yehowa gabembelego egi ana Adama anyi akhalele gumutumagela ajinge mayilago? Yajiya gukhala tuana tangiza egi, gula nga Yehowa watshitshile ngenyi nga yakhalele luholo luabonga luagumanesela ndaga yene. Uvi gutshita ngenyi guakhalelego naye gudivua nu khadilo dia Yehowa dia gutshita ndaga mu luholo luatagana. Yehowa udi Nzambi wana tshita ndaga mu luholo luatagana, hene gatshiginyilego nga hazonda gutotesela Adama mukunda nu gubola guakoma guakalegele muene nu mutshima umoshi.

5. Itshi idi diago gututshiginyisa egi Yehowa mbawulandula gutshita ndaga mu luholo luabonga?

⁵ Gula nga Yehowa gahanelego gibawu nu wahana genji ana a Adama luendu lua gujinga mayilago ngatshima ashigo athu atagana, nga wamonesele egi wabuita mikhuala yenji yatadila ndaga jiabola nu jiabonga mutshima. Athu akhalele naye nji gutangiza egi, mbawubuita luko mikhuala yenji mutshima nu mbagashigo mutshita ndaga jialayele muene mu masugu adi muza. Tushigo naye gudisagesa mukunda nu ndaga yakalegele Yehowa. Mukunda natshi? Handaga gujiya egi Yehowa watshitshile ndaga mu luholo luatagana ngatshima yakhalele lamba mukunda nu muene, yakotelesa egi guhana Mun’enji gana zumba muavula gifua mulambu, idi diago gututshiginyisa egi mbawulandula gutshita ndaga mu luholo luabonga.

6. Khadilo ditshi diko diatumine Yehowa ha gutuma Mun’enji? (1 Yone 4:9, 10)

⁶ Khadilo diko diatumine Yehowa ha gutuma Yesu ha gufua mukunda nu esue didi guzumba. (Yone 3:16; tanga 1 Yone 4:9, 10.) Luholo Yehowa wahanele gibawu, yana monesa egi wana tshigina egi tuhete monyo wa ivo nu ivo nu tukhale enya fami yenji. Tutadilenu ndaga eyi: Tangua Adama wakalegele gubola, Yehowa wamuzolele mu fami ya akombeledi enji. Hene tangua mukut’etu agasue tuana vualewa, tuanago gubua mbala imoshi enya fami ya Yehowa. Uvi mu njila ya gibawu, Yehowa wana gututotesela gubola nu wana nana mu fami yenji athu a mu ifutshi yagasue ana gusha gutshigina gudi muene nu ana gumutumagela. Sendese mangino tuajiya gukuata ufuta wakola nu Yehowa nu aphangi’etu Aklisto. Yehowa wana gutuzumba diago muavula!​—Roma 5:10, 11.

7. Mu luholo lutshi malamba amonele Yesu ana gutukuatesa ha gukotelesa egi Yehowa wana gutuzumba muavula?

⁷ Tuajiya gukotelesa muabonga luholo Yehowa wana gutuzumba, gula tudi mutangingiza lamba diavile muene hamonele muene Yesu mumona malamba. Satana wazuelele egi, gushigo nga nu mukombeledi mumoshi wa Yehowa wajiya gusala yagujinginyina gudi muene gula watagana nu malamba. Ha gumonesa egi Satana udi muenya mambo, Yehowa wahanele njila egi Yesu amone malamba gutuama egi afue. (Yobo 2:1-5; 1 Phet. 2:21) Yehowa wakhalele mumona luholo athu akhalelele mulela Yesu, luholo masuta akhalele gumubeta nu luholo amukhokhele gu mutshi wa lamba. Gungima Yehowa wamonele luholo Mun’enji gakhalele muzumba muavula wafile, gufua gumoshi gua lamba. (Mat. 27:28-31, 39) Yehowa wakhalele naye gukanga njila egi malamba awa abuilago Yesu. Ha gufezegesa, tangua mbalagaji jiazuelele egi: “[Nzambi] amuhuluise giwa tutale gula wamuzumba,” Yehowa wakhalele naye gumuhuluisa. (Mat. 27:42, 43) Uvi gula nga Nzambi gabembelego egi Yesu afue, nga gibawu giafutshiwego, nga tuanago gukhala nu felela. Hene Yehowa wahanele njila egi Mun’enji akolesele mu malamba ene uu nu gu gufua guenji.

8. Itshi idi gututshinyisa egi tangua Yehowa wamonele Yesu mumonesewa lamba wavile gikenene giavula? (Tala nji gifuanesa.)

⁸ Tushigo naye gutangiza egi, luholo Yehowa udi Nzambi wa ngolo jiagasue ganago gusuanguluga nga guvua gikenene! Yehowa watufugile mu gifuanesa gienji, watuhanele nji luendu luagusuanguluga. Ndaga yene idi mumonesa egi muene nji wana suanguluga. Biblia yana zuela egi Yehowa wana guvua nji ‘khabu’ nu wana ‘gudisagesa.’ (Ngi. 78:40, 41) Tutadilenu nji lumene lua Abalahama nu Izake. Yehowa wawambelele Abalahama ha guhana mun’enji mumoshi ha mumoshi gifua mulambu. (Gis. 22:9-12; Heb. 11:17-19) Tangiza gale luholo Abalahama wadivile tangua diakhalele muene mutshigina gushiya mun’enji phamba mumoshi. Yehowa nji wadisagesele muavula hamonenele muene Mun’enji musagesewa nu luholo amushiyile!​—Tala video Imitez leur foi : Abraham (partie 2) mu jw.org.

9. Malongo atshi wajiya guzula mu mukanda wa Roma 8:32, 38, 39 mukunda nu guzumba gua Yehowa?

⁹ Luloho Yehowa wahanele gibawu idi gutulongesa egi, wana gutuzumba muavuala gubalega enya fami yetu nga futa tuana shila mutshima. (Tanga Roma 8:32, 38, 39.) Yadiago Yehowa wana gutuzumba muavula gubalega luholo tuana gudizumba. Wana tshigina gujinga mayilago ba? Jiya egi Yehowa nji wana tshigina ngenyi. Wana tshigina egi Nzambi agutotesele gubola guaye ba? Jiya egi Yehowa nji wana tshigina gutotesela athu. Wana gututoga ha guhana mersi mukunda nu gibawu giatuhale muene, gusha gutshigina gudi muene nu gumutumagela. Gibawu giana monesa diago guzumba gua Nzambi mukunda nu esue. Mu mavu ahe-ahe, mbatulonguga ndaga jiavula jiatadila guzumba gua Yehowa.​—Mulo. 3:11.

GIBAWU GIDI GUTULONGESA ITSHI MUKUNDA NU YESU?

10. a) Ndaga itshi yasagesele Yesu muavula mukunda nu gufua guenji? b) Mu luholo lutshi Yesu wamonesele egi ndaga jiazulele Satana mukunda Yehowa jiakhalele jia mambo? (Tala nji galuanda “Mulambu wa Yesu Wamonesele egi Yehowa Wana Kalagala Ndaga mu Luholo Luatagana.”)

¹⁰ Yesu watshitshile yagasue ha gubamba lukuma lua Sh’enji. (Yone 14:31) Yesu wadisagesele muavula tangua athu akhalele muzuela ndaga jiabola mukunda nu Sh’enji, nu luholo athu akhalele naye gumushiya gifua muthu washingisa jina dia Nzambi. Gishina giene wakombelele egi: “Tata gula watshigina, katula khopho edi gutuama diami.” (Mat. 26:39) Yesu wasalele yagujinginyina gudi Sh’enji uu nu gu gufua guenji. Ngenyi wamonesele diago egi ndaga jiazuelele Satana mukunda nu Sh’enji jiakhalele jia mambo.

11. Luholo lutshi Yesu wamonesele egi wakhalele muzumba athu muavula? (Yone 13:1)

¹¹ Gibawu gidi gutulongesa nji egi Yesu wana zumba athu muavula, uvi wana zumba alandudi enji muavula gubalega. (Ish. 8:31; tanga Yone 13:1.) Ha gufezegesa, Yesu wajiyile egi ndaga jiko mbajitagana najio muene ha mavu mbajikhala lamba diago, gifua luholo luakhalele naye muene gufua, gufua gumoshi gua lamba. Uvi watshiginyile egi ndaga eji jiagasue jimubuile. Gayitshitshilego phamba ha gutumagela Yehowa uvi idi handaga wakhalele muzumba athu muavula. Yesu wadihanele nu mutshima umoshi ha gulongesa athu ako lukuma luabonga nu guakuatesa. Ikhale mu lusugu lua gufua guenji, Yesu wawevele apostolo enji malu, waahanele gikhesa mu mbimbi jienji jiagisugishilo nu waahanele malongo. (Yone 13:12-15) Gungima tangua Yesu wakhalele holu dia mutshi wa lamba, wazudile tangua diazonda ha guhana felela gudi mbundudi mumoshi wakhalele naye gushiyiwa. Wadisagele nji mukunda nu gin’enji, hene wawambelele Yone ha gumubamba muabonga. (Luka 23:42, 43; Yone 19:26, 27) Yesu gamoneselego guzumba phamba luholo luafile muene mukunda nu athu, uvi wayimonesele nji mu luholo luakhalele muzumba athu nu luholo luakhalele muene guakalegela ndaga nu gisemo.

12. Ndaga jitshi Yesu udi mulandula gutshita mukunda nu esue?

¹² Idi yadiago egi Klisto wafile “mbala imoshi,” uvi udi mulandula gutshita ndaga jiavula mukunda nu esue. (Roma 6:10) Mu luholo lutshi? Mu njila ya gibawu gienji udi mulandula gutshita yagasue ha gutuhana ima yavula yabonga. Tutadilenu ndaga jidi mutshita muene mangino. Udi Fumu nu Nganga-nzambi Wakoma, udi nji mutuameji wa hungu dia Uklisto. (1 Kol. 15:25; Ef. 5:23; Heb. 2:17) Udi nu ginemo gia gubungisa Aklisto ambiwe maji mu nyuma nu imeme iko. Mudimo wene mbawuhua gutuama egi lamba diakola dihue.b (Mat. 25:32; Mako 13:27) Udi mukuatesa nji muhiga wafubidila nu watema ha gulandula gutuhana ima tuana khala nayo funu ha gusala yagujinginyina gudi Yehowa. (Mat. 24:45) Mu uhinyinyi wenji wa ivo 1000, mbawulandula gukalagala ndaga ha gutukuatesa. Tangua Yehowa watuhanele Mun’enji, gatshiginyilego phamba egi afue mukunda nu esue uvi watshiginyile nji egi atukalegele ndaga jiavula!

LANDULA GULONGUGA NDAGA JIHE-JIHE

13. Luholo lutshi wajiya gulonguga ndaga jiatadila guzumba gua Yehowa nu Yesu mukunda nu esue?

¹³ Wajiya gulonguga ndaga jiatadila guzumba gua Yehowa nu Yesu mukunda nu esue, gula udi mutangigiza muavula ndaga akalegele mukunda nu esue. Mu sungi ya Guwunguluga Gufua gua Yesu nu gungima dia gudibungisa guene, wajiya guzula desizio dia gutanga evanjile imoshi nga jiavula. Utangigo ndaga jiavula mu tangua dimoshi. Uvi zula tangua dia gutangingiza ha gumona ndaga jidi naye gututuma ha guzumba Yehowa nu Yesu. Gungima wajiya nji guwambela athu ako ndaga wamonyi tangua wakhadi mulonguga.

14. Ha gutadila Ngimbo 119:97 nu mbimbi goshi’a diyiji, luholo lutshi gutshita ba recherche guajiya gutukuatesa ha gujiya ndaga jiavula jiatadila gibawu nu malongo ako? (Tala nji gifuanesa.)

¹⁴ Gula watshita gale ivo yavula mu giamatshidia, wajiya gudihula gula gudi nji nu ndaga jihe-jihe wajiya gulonguga mukunda nu luholo Yehowa wana tshita ndaga, guzumba guenji nu gibawu. Idi ya diago egi tudi nu ndaga jiavula jihe-jihe jia gulonguga mukunda nu malongo ene. Itshi wajiya gutshita? Khala mutanga nu gulonguga malongo a Biblia adi mu mikanda yetu. Tangua udi mutanga Biblia gula wamona egi ushigo mukotelesa ndaga imoshi muabonga, tshita ba recherche. Gungima mu lusugu luene tangigiza mu ndaga walonguga, nu malongo wajiya guzula mukunda Yehowa, Yesu, nu guzumba guawo mukunda nu aye.​—Tanga Ngimbo 119:97 nu mbimbi goshi’a diyiji.

15. Mukunda natshi tudi naye gulandula gukamba ndaga jihe-jihe mu Biblia?

¹⁵ Tangua udi mutanga nga udi mutshita ba recherche, ulebigo muila gula ushigo mumona ndaga ihe-ihe nga gima gidi gugusuanguluisa. Tangiza gifua udi mukamba seso dia ndando, Yajiya guzula tangua nga masugu avula hagula muthu udi mukamba ahete nga maseso azonda. Uvi ikhale ngenyi wana landula gukamba, handaga gula waheta maseso ene nga azonda ana khala nu ndando yavula. Uvi malongo agasue a Biblia adi nu ndando yavula gubalega umonyi! (Ngi. 119:127; Ish. 8:10) Hene khala nu guhuimuinyina nu tshita ngolo ha gubamba programe yaye ya gutanga Biblia.​—Ngi. 1:2.

16. Luholo lutshi tuajiya gulandula gifezegeselo gia Yehowa nu Yesu?

¹⁶ Tangua udi mulonguga, khala mukamba maluholo wajiya gukalegela ndaga jiene. Ha gufezegesa, wajiya gulandula gifezegeselo gia Yehowa gia gukalagala ndaga mu luholo luatagana, gula ushigo nu khadilo dia gutomba-tomba tangua udi mukalegela athu ako ndaga. Wajiya gulandula gifezegeselo gia guzumba gua Yesu mukunda nu Sh’enji, gula udi mutumagela Yehowa nu gukuatesa athu ako ikhale yajiya gumba monyo waye mu gingonza. Wajiya nji gulandula gifezegeselo gia Yesu gula udi mulongesa athu ako hagula ene nji ahete luendu lua gujiya ndaga jia gushimana Yehowa wakalegele mukunda nu athu nu luholo ajiya gusha gutshigina mu gibawu.

17. Itshi mbatuzuelela mu longo dia landula?

¹⁷ Gula tudi mulandula gulonguga ndaga jiavula jiatadila gibawu, mbayitutuma ha guzumba Yehowa nu Yesu muavula. Gula tuatshita ngenyi, ene nji mbaatuzumba muavula diago. (Yone 14:21; Yak. 4:8) Hene, tulandulenu gukalegela muabonga ima yagasue Yehowa wana gutuhana ha gulandula gulonguga ndaga jiavula jiatadila gibawu. Mu longo dia landula mbatuzuelela maluholo tuajiya guheta gubonga mu gibawu nu luholo tuajiya guhana Yehowa mersi mukunda nu guzumba guenji.