“Ditombelenu Nzambi Mudi Naye Gukombelela”

1. Itshi tudi naye gutshita ha gukhala nu gusuanguluga? Mukunda natshi tuazuela ngenyi? (Yeshaya 48:17, 18)

TATA wetu wa mu dilu wana gutuzumba muavula, wana tshigina egi tukhale nu gusuanguluga sendese mangino uu nu mu masugu adi muza. (Mulo. 3:12, 13) Watufugile nu ndunge jia gutshita ndaga jiko jia gushimana, uvi gatuhanelego ndunge jia gudituameza nga jia guditombela ndaga jiabonga nu jiabola. (Mulo. 8:9; Yel. 10:23) Yehowa wana jiya egi hagule egi tukhale nu gusuanguluga tudi naye gumukombelela nu gutumagela mikhuala yenji.​—Tanga Yeshaya 48:17, 18.

2. Ndaga itshi Satana wana kamba gututshiginyisa? Itshi Yehowa wakalegele ha gumonesa egi Satana udi muenya mambo?

² Satana wana kamba gututshiginyisa egi tuajiya getu gukhala nu gusuanguluga ikhale tushigo mukamba utuameji wa Yehowa. (Gis. 3:4, 5) Ha gumonesa egi Satana udi muenya mambo, Yehowa wabembele egi athu adituameze mukunda nu tangua diazonda. Esue mumona haphelo luholo athu ashigo mubinga ha gudituameza. Mu Biblia mudi nu majina avula a mala nu akhetu akhalele nu gusuanguluga handaga akhalele mukombelela Yehowa. Yesu Klisto nji udi mukatshi dia athu ene. Tutadilenu thomo ndaga jiatumile Yesu ha gutomba gukombelela Yehowa. Tuza mumona nji mukunda natshi Yehowa udi watagana ha gumukombelela. Gungima, tuza mutadila nji ndaga jiko jiana gututuma ha gukombelela Yehowa.

MUKUNDA NATSHI YESU WATOMBELE HA GUKOMBELELA YEHOWA?

3. Itshi Satana walayele Yesu? Itshi Yesu wakalegele?

³ Tangua Yesu wakhalele ha mavu wakhalele naye gutomba gula nanyi adi naye gukombelela. Masugu azonda gungima dia gubatijiwa guenji, Satana wamuwambelele egi mbawumuhana ufumu wagasue wa ha mavu gula wamukombelela. Uvi Yesu wamuwambelele egi: “Satana, katuga! Handaga yasonegewe egi: ‘Udi naye gukombelela phamba Yehowa Nzambi waye, muene hakhenji udi naye gukalegela mudimo wa gijila.’” (Mat. 4:8-10) Mukunda natshi Yesu watombele ha gukombelela Yehowa? Tutadilenu ndaga jiamutumile ha gutshita ngenyi.

4-5. Ndaga jitshi jiatumine Yesu ha gutomba gukombelela Yehowa?

⁴ Ndaga ya thomo yatumile Yesu ha gutomba gukombelela Yehowa yakhalele guzumba, Yesu wakhalele muzumba Sh’enji muavula diago. (Yone 14:31) Yesu wakhalele mujiya egi gukombelela Yehowa gudi nu ndando yavula. (Yone 8:28, 29; Gumo. 4:11) Wajiyile nji egi Yehowa wafugile ima yagasue, udi watagana ha gushila mutshima nu muene wana hana ima yagasue yabonga. (Ngi. 33:4; 36:9; Yak. 1:17) Ndaga jiagasue Yehowa wakhalele muwambela Yesu jiakhalele jia giamatshidia, wahanele nji Yesu ima yagasue yakhalele nayo muene. (Yone 1:14) Uvi Satana watumile athu ha gutshita gubola, hene gubola guene guana batela athu gufua. Satana udi muenya mambo, wana kamba phamba gubonga guenji. (Yone 8:44) Gujiya ndaga eji jiagasue guakuatesele Yesu ha gutuna gulumbugila Yehowa gifua muatshitshile Satana.​—Fili. 2:5-8.

⁵ Ndaga iko yatumine Yesu ha gusala yagujinginyina gudi Yehowa idi egi, wakhalele mutangiza gubonga mbaguheta muene gula wasala yagujinginyina. (Heb. 12:2) Wakhalele mujiya egi gula wasala yagujinginyina, mbawutumbuisa jina dia Sh’enji, ndaga yene yakhalele naye nji gutshita egi gufua nu malamba akhadigo luko.

MUKUNDA NATSHI TUDI NAYE GUKOMBELELA YEHOWA?

6-7. Mukunda natshi athu avula mangino anago gukombelela Yehowa? Mukunda natshi tudi naye gukombelela phamba Yehowa?

⁶ Mangino athu avula anago gukombelela Yehowa handaga anago gujiya makalegelo enji abonga nu ndaga jiagasue jiakalegele muene mukunda nu ene. Athu ene adi gifua athu anyi phaula walongesele gu Atene.​—Makal. 17:19, 20, 30, 34.

⁷ Phaula wawambelele athu akhalele gumutegelela egi Nzambi wa giamatshidia wana “hana athu agasue monyo nu muhehe nu ima yagasue.” Wazuelele luko egi: “Watuhanele monyo, muene nji wana gutukuatesa ha gudinyigisa nu ha gukhala nu monyo.” Nzambi wafugile ima yagasue, “mu njila ya muthu mumoshi, wafugile athu a ifutshi yagasue.” Ndaga eji jiagasue jidi naye gututuma ha gumukombelela.​—Makal. 17:25, 26, 28.

8. Ndaga itshi Yehowa ganago gutshita?

⁸ Yehowa wafugile ima yagasue, udi nji Fumu Wabalega Gukoma, wakhalele nu luholo lua gushinjiga athu ha gumukombelela gu ngolo. Uvi gakalegelego ngenyi. Watuhanele ijiyishilo yavula yana monesa egi wana khala guene nu wana gutuzumba muavula. Wana tshigina egi athu avula abue mafuta enji mayilago. (1 Tim. 2:3, 4) Gishina giene Yehowa watuhanele formasio ha gulongesa athu ako ndaga jiabonga mbajitshita muene mu masugu adi muza. (Mat. 10:11-13; 28:19, 20) Watukhaphele nji mu mahungu hagula tuajiya gumukombelela nu guheta ukuateshi wa akulu.​—Makal. 20:28.

9. Ndaga jitshi jiana monesa egi Yehowa wana zumba athu muavula?

⁹ Yehowa wana monesa guzumba guenji mu luholo luana hana muene ima yabonga gudi athu anyi ana tuna egi ganakhalago guene. Wana guakalegela ndaga mu luholo luabonga. Tuzuelelenu ndaga eji: Sendese mualeha, athu avula anago gutumagela Yehowa uvi ana tshita ndaga mu luholo atshigina. Ikhale ngenyi, Yehowa wana guahana ima nu gisemo giagasue ha guakuatesa ha gukhala nu monyo nu ha gukhala nu gusuanguluga. (Mat. 5:44, 45; Makal. 14:16, 17) Wana guahana luendu lua gukhala nu mafuta nu enya fami ana guazumba nu ana nu midimo, ana khala nji nu luendu lua gukhala nu gusuanguluga mu monyo wawo. (Ngi. 127:3; Mulo. 2:24) Ndaga eji jiagasue jidi mumonesa haphelo egi Yehowa wana zumba athu muavula. (Guz. 34:6) Henyaha tutadilenu ndaga jiana gututuma ha gukombelela Yehowa nu gubonga tuana heta.

NDAGA JIANA GUTUTUMA HA GUKOMBELELA YEHOWA

10. a) Ndaga itshi yana gututuma ha gukombelela Yehowa? (Matayo 22:37) b) Gubonga gutshi wahetele gale mukunda nu khadilo dia guhuiminyina dia Yehowa? (Ngimbo 103:13, 14)

¹⁰ Ndaga ya thomo yana gututuma ha gukombelela Yehowa idi guzumba guakola tuana khala nago mukunda nu muene, gifua muakhalele Yesu. (Tanga Matayo 22:37.) Tangua tuana longuga makalegelo a Yehowa yana gututuma ha gumuzumba luko muavula. Ha gufezegesa tuzuelenu khadilo dienji dia guhuiminyina. Tangua enya Isalele akhalele gumulumbugila, Yehowa wakhalele guabubila egi: “Bembenu makalegelo enu abola.” (Yel. 18:11) Yehowa wana jiya egi tushigo athu atagana nu tudi fuluguta. (Tanga Ngimbo 103:13, 14.) Tangua wana tangigiza luholo Yehowa wagutotesele mu monyo waye, yana gugutuma ha gumukombelela mayilago ba?

11. Ndaga jitshi jiko jiana gututuma ha gukombelela Yehowa?

¹¹ Tuana kombelela nji Yehowa handaga diene desizio diabonga muthu wajiya guzula. (Mat. 4:10) Tuana jiya nji egi gula tuasala yagujinginyina gudi Yehowa mbatuheta gubonga guavula. Tangua tuana sala ya gujinginyina gudi Yehowa tuana tumbuisa jina dienji, tuana monesa egi Diabulu udi muenya mambo nu tuana suanguluisa Yehowa. Gula tuazula desizio dia gukombelela Yehowa sendese mangino, mbatuheta luendu lua gumukombelela mayilago!​—Yone 17:3.

12-13. Malongo atshi tuajiya guzula mu lumene lua Jane nu Pam?

¹² Tangua tudi mavuala tuajiya gukudisa guzumba guetu mukunda nu Yehowa, gutshita ngenyi guajiya gutukuatesa ha gulandula gumuzumba muavula ikhale tuabua athu a gukola. Tutadilenu gifezegeselo gia mavuala mbadi a akhetu Jane nu Pam.a Tangua asendesele gulonguga Biblia muko wakhalele nu ivo 11 uvi muko 10. Mvuaji jiawo jiakhalelego musuanguluga ha gulonguga Biblia, uvi awambelele an’awo ha gulonguga Bibila nu Matemue a Yehowa gula adi nji muya nu mvuanji jiawo mu gikombelelo giawo. Jane udi muzuela egi: “Ndaga ngakhalele mulonguga mu Biblia jiangukuatesela ha gutuna gutshita ndaga jiabola jiakhalele gungushinjiga mafut’ami a khalasa ha gutshita, gifua gunua ima yabala nu gutshita uthambi.”

¹³ Gungima dia ivo yazonda abuile alongeshi. Gungima asendesele gutshita mudimo wa muvundji wa njila, mu tangua diene akhalele nji mukuatesa mvuaji jiawo handaga abuile athu a gukola. Phangi Jane udi muzuelela luholo luana gudivua muene hana tangiza muene ndaga jiagasue Yehowa wakalegele mukunda nu ene. Udi muzuela egi: “Ngakotelesele egi Yehowa wana gudisagesa diago mukunda nu mafuta enji, gifua luholo mukanda wa 2 Timote 2:19 wana zuela egi: ‘Yehowa wana jiya athu enji.’” Idi yadiago egi Yehowa wana tagenesa nzala jia athu ana gumuzumba nu ana gumukombelela!

14. Luholo lutshi mbimbi jietu nu makalegelo etu ajiya gumonesa egi ndaga jiana zuelewa mukunda nu Yehowa jidi jia mambo? (Tala nji ifuanesa.)

¹⁴ Tuana tshigina egi athu ajiye giamatshidia giatadila Yehowa. Tutadilenu ndaga eyi: tangiza egi udi nu futa wana zumba muavula, futa muene wana khala nu gisemo, wana khala nu khadilo dia guhana nu wana totesela athu. Uvi lusugu lumoshi wavua muthu muzuela ndaga jiabola mukunda nu futa diaye egi udi muenya khuta nu udi muenya mambo. Itshi wajiya gutshita? Mbawukamba gumonesa egi ndaga jidi muzuelewa mukunda nu muene jidi jia mambo. Luholo lumoshi nji, tangua Satana nu athu enji ana zuela ndaga jia mambo ha gukamba gubolesa lukuma lua Yehowa, tuana monesa nu gikhesa giagasue egi ndaga jiene jidi jia mambo ha tuana longesa giamatshidia giatadila Yehowa. (Ngi. 34:1; Yesh. 43:10) Ndaga tuana zuela nu tuana tshita jiene jiana monesa egi tudi mutshigina gukombelela Yehowa nu monyo wetu.

15. Gubonga gutshi Phaula wahetele luholo luakalegele muene usombegeshi ha gukombelela Yehowa? (Filiphi 3:7, 8)

¹⁵ Tuana khala hehi ha gusombegesa ndaga jiko jia monyo wetu ha gudihana muavula mu mudimo wa Yehowa. Ha gufezegesa mupostolo Phaula wakhalele muthu wakoma mu gikombelelo gia enya Yuda, uvi wabembele lukuma luene ha gubua mulandudi wa Yesu nu ha gukombelela Yehowa. (Gal. 1:14) Gutshita ngenyi guamukuatesele ha gukhala nu lujingu luabonga nu wahetele luendu lua guhinyina nu Yesu mu dilu. Phaula gadibelelego luholo luatombele muene gukombelela Yehowa, esue nji gula tuatshita ngenyi mbatushigo gudibela nga hazonda​—Tanga Filiphi 3:7, 8.

16. Malongo atshi tuajiya guzula mu lumene lua phangi Julia? (Tala nji ifuanesa.)

¹⁶ Gula tudi musha mudimo wa Yehowa ha fundo dia thomo, mbatuheta gubonga sendese mangino uu nu mu masugu adi muza. Tuzuelelenu lumene lua phangi Julia. Tangua diakhalele muene mona wazonda wakhalele muyimba ngimbo mu gikombelelo giawo. Mulongeshi mumoshi wa ngimbo wamonele egi Julia wakhalele muyimba muabonga, hene wasendesele gumuhana formasio. Gungima Julia Wajiyiwe muavula, akhalele nji gumutamega ha guya muyimba mu mafundo a lukuma. Tangua dianginyile muene khalasa ana longesa athu luholo lua guyimba, mona khalasa wawo mumoshi wasendesele gumulongesa ndaga jiatadila Nzambi. Wamuwambelele egi jina dia Nzambi didi Yehowa. Sendese tangua diene, Julia wasendesele gulonguga Biblia mbala jiyadi mu phoso. Ha fundo dia gudihana mu ndaga jia miziki, watombele genji ha gukombelela Yehowa. Yakhalelego yaleba ha guzula desizio diene, udi muzuela egi: “Athu avula akhalele gunguwambela egi ngudi gikata luholo ngabembele miziki ha gukombelela Yehowa, uvi ngakhalele mutshigina gukombelela Yehowa monyo wami wagasue.” Sendese tangua phangi Julia wazudile desizio dia gukombelela Yehowa, ivo 30 nu ndambo yabalega gale. Luholo lutshi luana gudivua muene mangino? Udi muzuela luko egi: “Ngudi nu guhuima gua mu matangi, ngana sha mutshima egi Yehowa mbawutagenesa nzala jiami jiagasue mu masugu adi muza.”​—Ngi. 145:16.

LANDULA GUKOMBELELA YEHOWA!

17. Luholo lutshi gujiya egi tudi mujinga mu masugu a gisugishilo guajiya gukuatesa athu ana kombelela Yehowa nu athu adi khenji azudile gale ndo desizio dia gumukombela?

¹⁷ Tudi mujinga diago mu masugu a gisugishilo. Mupostolo Phaula wasonegele egi: “Tangua ‘diasala diago diazonda,’ ‘muthu udi naye guza mbawuheta, muene mbagashigo mushipha.’” (Heb. 10:37) Luholo lutshi ndaga jiasonegele phaula jidi nji gututadila? Handaga tangua Yehowa wabembele hagula athu ajiya gutomba ha gumukombelela diasala diazonda. (1 Kol. 7:29) Ngatshima tuana kombelela gale Yehowa sendese mualeha tudi mujiya egi mbatutagana nu malamba, uvi malamba ene mbaakhala mukunda nu ‘tangua diazonda.’

18. Itshi Yehowa nu Yesu ana gututoga ha gutshita?

¹⁸ Yesu wawambelele athu ha gubua alandudi enji, wawambele nji ha gusala alandudi enji. (Mat. 16:24) Ikhale tuana kombelela gale Yehowa sendese mualeha, tudi naye gutshita ngolo ha gulandula gumukombelela, tudi naye nji gutshita ngolo ha gutagenesa ndaga tuamulayele. Yajiya gukhala lamba ha gutagenesa desizio edi, uvi gula tuatshita ngolo Yehowa mbawutushimbiga nu mbatukhala nji nu gusuanguluga!​—Ngi. 35:27.

19. Malongo atshi tuajiya guzula mu lumene lua phangi Gene?

¹⁹ Athu avula ana tangiza egi gula atomba gukombelela Yehowa mbaashigo mukhala nu gusuanguluga mu monyo wawo. Gula udi muvuala, wana tangiza nji ngenyi ba? Phangi Gene udi muvuala udi muzuela egi: “Ngakhalele mutangiza egi gula ngabua Temue wa Yehowa, mbangudifula ndaga jiavula. Tangua ngakhalele gudihana ha guya mu mudimo wa gulongesa nu mu gudibungisa, ngakhalele mutangiza egi mafuta ami adi gawo nu gusuanguluga handaga akhalele mutshita mawano, guzula bamakangu nu gutshita saga jiabola.” Luholo lutshi gutangiza ndaga eji guasombegesele makalegelo a Gene? Udi muzuela egi: “Ngasendesele nji gukalagala ndaga jiabola gifua muakhalele mutshita mavuala ako. Ngakhalelego nu gusuanguluga nga hazonda. Uvi tangua ngasendesele gutangiza gubonga ngajiya guheta gula ngatumagela malongo a Biblia, ngazudile desizio dia gukombelela Yehowa nu mutshima wami wagasue. Sendese mu tangua diene, ngakhalele mumona luholo Yehowa wakhalele muhana mvutu gu isambu yami yagasue.”

20. Desizio ditshi tudi naye guzula?

²⁰ Muyimbi wa ngimbo wayimbile lungimbo mukunda nu Yehowa egi: “Gusuanguluga gudi nu muthu watomba nu watamega ha gukhala mu inzo yaye.” (Ngi. 65:4) Tuajiya nji guzula desizio dia gukombelela Yehowa gifua muazuelele Yoshua egi: “Uvi ame nu enya fami yami mbatukombelela getu Yehowa.”​—Yosh. 24:15.