LONGO DIA 15
LUNGIMBO 30 Mon Ami, mon Dieu, mon Père
‘Gusuena Hehi nu Nzambi Gudi Ndaga Yabonga’ Mukunda nu Esue!
‘Gusuena hehi nu Nzambi gudi ndaga yabonga mukunda nu ame.’—NGI. 73:28.
MU GUHIHIA
Tuza mumona luholo tuajiya gusuena hehi nu Yehowa nu gubonga tuajiya guheta gula tuatshita ngenyi.
1-2. a) Ha gukuata ufuta wakola nu muthu yana toga itshi? b) Itshi tuza muzuelela mu longo edi?
WANA khala nu futa wana shila mutshima ba? Itshi yamikuatesele ha gukolesa ufuta wenu? Yajiya gukhala egi muakhalele mubalegesa tangua hamoshi, wakambele nji gujiya ndaga jiakhalele mutagana najio muene nu gujiya ndaga jiana tshigina muene nu jinyi jiana tuna muene. Yajiya nji gukhala egi wakotelesele egi wakhalele nu makalegelo abonga wajiya gulandula. Ndaga eji jiagutumine ha guzumba futa diaye muavula.
2 Ha gukuata ufuta wakola nu muthu, udi naye gubalegesa tangua n’enji. Luholo lumoshi nji, ha gukolesa ufuta wetu nu Yehowa Nzambi, tudi naye gukamba gumujiya muabonga nu gumuzumba muavula. Mu longo edi, tuza mumona luholo tuajiya gusuena hehi nu Yehowa nu gubonga tuajiya guheta gula tuatshita ngenyi. Thomo, tutadilenu mukunda natshi idi nu ndando ha gusuena hehi nu Yehowa, Futa wabalega gubonga.
3. Mukunda natshi idi nu ndando ha gutangigiza gubonga tuajiya guheta gula tuasuena hehi nu Yehowa? Hana gifezegeselo.
3 Idi yadiago egi udi mujiya egi gusuena hehi nu Yehowa gudi ndaga yabonga. Uvi gutangigiza gubonga tuajiya guheta gula tuatshita ngenyi, mbagutukuatesa ha gulandula gusuena hehi n’enji. (Ngi. 63:6-8) Ha gufezegesa, tuana jiya egi ha gukhala nu sante yabonga, tudi naye gudia muabonga, gukalagala exercice, gubanda muavula nu gunua meya avula. Uvi athu avula anago gukalagala ndaga eji, gishina giene anago gukhala nu sante yabonga. Hene, gula tudi mutangiza gubonga tuajiya guheta gula tudi mutshita ndaga jiajiya gutukuatesa ha gukhala nu sante yabonga, mbayitukuatesa ha gulandula gutshita ndaga jiene. Luholo lumoshi nji, tudi mujiya egi gusuena hehi nu Yehowa gudi ndaga yabonga, uvi gula tudi mutangiza gubonga tuajiya guheta gula tuatshita ngenyi, mbayitukuatesa ha gulandula gusuena hehi nu Futa dietu wabalega gubonga.—Ngi. 119:27-30.
4. Ndaga itshi muthu wasonegele mukanda wa Ngimbo mukhapho 73 wazuelele? (Ngimbo 73:28)
4 Tanga Ngimbo 73:28. Muthu wasonegele mukanda wa Ngimbo mukhapho 73, wakhalele muenya giphuta gia Levi. Watombewe ha guyimba ngimbo mu tempelo ya Yehowa. Wakhalele mukombelela Yehowa nu gujinginyina guagasue ivo yavula. Uvi wakotelesele egi idi nu ndando gudi muene ha ‘gusuena hehi nu Nzambi.’ Wakhalele mutshigina egi athu ako ajiye nji egi gusuena hehi nu Nzambi gudi ndaga yabonga. Gubonga gutshi tuajiya guheta gula tuasuena hehi Nzambi?
‘GUSUENA HEHI NU NZAMBI’ GUANA GUTUBATELA GUSUANGULUGA
5. a) Mukunda natshi gusuena hehi nu Yehowa guana gutubatela gusuanguluga? b) Luholo lutshi malongo a Yehowa ana gutubamba nu gutukuatesa? (Ishima 2:6-16)
5 Gula tudi musuena hehi nu Yehowa, mbatukhala nu gusuanguluga. (Ngi. 65:4) Gudi nu ndaga jiavula jiana gututuma ha gukhala nu gusuanguluga. Ha gufezegesa, tuana khala nu gusuanguluga tangua tuana kalegela malongo adi mu Biblia. Malongo ene ana gutukuatesa ha gutuna gukalagala ndaga jiajiya gubolesa ufuta wetu nu Yehowa nu ha gutuna gukalagala gubola guakoma. (Tanga Ishima 2:6-16.) Biblia yana zuela egi: ‘Gusuanguluga gudi nu muenya ndunge nu gudi muthu udi mukotelesa ndaga.’—Ish. 3:13.
6. Itshi yakalegele egi muyimbi wa ngimbo atotese gusuanguluga guenji?
6 Idi yadiago egi nu ene mafuta a Yehowa matangua ako ana guvua nji gikenene. Muthu wasonegele mukanda wa Ngimbo mukhapho 73 watotesele gusuanguluga guenji hasendesele muene gutangiza ndaga jiakhalele mumona muene egi jiakhalelego mukalegewa mu luholo luabonga. Wasendesele gutangiza egi athu abola adi gawo nu lujingu luabonga, ikhale anago gutumagela Mikhuala ya Nzambi. Wakhalele mumona athu anyi akhalelego mukombelela Yehowa nu sante yabonga nu umonyi nu lujingu luabonga. (Ngi. 73:3-7, 12) Tangua diamonele muene egi ndaga jia monyo wawo jiakhalele muyila muabonga, watangijile egi gukombelela Yehowa gushigo nu ndando. Ndaga yene yamulebesele diago muila. Wazuelele egi: ‘Ngalabele gami gudikanda ha gukhala muthu wabonga nu ha gukhala nu mutshima waphelegeta.’—Ngi. 73:13.
7. Itshi tuajiya gukalagala gula tudi gudisagesa? (Tala nji gizula.)
7 Muyimbi wa ngimbo muene gabembelego egi ndaga jiakhalele mutagana najio muene jimulebese muila. Wasombegesele luholo luenji lua gutangiza. Tangua muyimbi wa ngimbo ‘wanginyine ha fundo dia gijila dia Nzambi,’ Yehowa wamukuatesele ha gusombegesa luholo luenji lua gutangiza. (Ngi. 73:17-19) Tangua tuana gudisagesa, Yehowa Futa dietu wabalega gubonga wana jiya luholo tuana gudivua. Hene gula tudi gumutoga utuameji nu gutshigina ukuateshi wana gutuhana muene mu njila ya Mbimbi yenji nu mu hungu, mbatuheta ngolo jiagukolesela. Gula tudi nu gikenene giavula nu tushigo mujiya ndaga tuajiya gukalagala, Yehowa mbawutuhana gikhesa.—Ngi. 94:19.a
Muenya Levi mumoshi wasonegele mukanda wa Ngimbo 73, udi wagumagana gutuama dia ‘fundo dia gijila dia Nzambi’ (Tala paragrafe 7)
‘GUSUENA HEHI NU NZAMBI’ GUANA GUTUHANA GUSUANGULUGA NU FELELA
8. Mu maluholo atshi ako gusuena hehi nu Nzambi gudi nu ndando?
8 Gusuena hehi nu Nzambi guana gutukuatesa mu ndaga eji mbadi jia ndando. Ndaga ya thomo, guana gutukuatesa ha gukhala nu gusuanguluga mu monyo wetu. Ndaga ya mbadi, guana gutuhana felela mukunda nu masugu adi muza. (Yel. 29:11) Henyaha tutadilenu gubonga tuajiya guheta gula tudi nu ufuta wakola nu Nzambi.
9. Luholo lutshi gukhala nu ufuta wakola nu Yehowa guana gutukuatesa ha gukhala nu gusuanguluga?
9 Gukhala nu ufuta wakola nu Yehowa guana gutukuatesa ha gukhala nu gusuanguluga mu monyo wetu. Mangino athu avula ana zuela egi Nzambi gakhalago guene, gishina giene anago gujiya mukunda natshi tudi ha mavu. Ana zuela nji egi mu masugu adi muza athu mbaashigo mukhala luko guene. Uvi gulonguga gua Biblia guana gutukuatesa ha gutshigina egi Nzambi wana khala guene “nu wana hana lufuto gudi athu ana gumukamba nu mutshima umoshi.” (Heb. 11:6) Mangino tuana khala nu gusuanguluga handaga tuana kalagala ndaga Yehowa wana tshigina egi tutshite, yakotelesa egi gumukombelela.—Mikh. 10:12, 13.
10. Ha gutadila ndaga jidi mu Ngimbo 37:29, felela ditshi Yehowa udi mulaya akombeledi enji?
10 Luholo athu avula anago gukhala nu felela mukunda nu masugu adi muza, ana gudihana gawo ha gutshita ndaga gifua: gutshita midimo, gudizula mu ulo, guvuala nu gukamba gukhala nu ima yavula. Anago gujiya ndaga Yehowa walayele mukunda nu masugu adi muza. Uvi esue tuana jiya egi Yehowa wana kuatesa akombeledi enji. (Ngi. 25:3-5; 1 Tim. 6:17) Tuana shila Nzambi wetu mutshima egi mbawutagenesa ndaga jiatulayele muene. Tuana jiya nji egi mu phaladiso mbatukhala nu ima yavula yabonga ya gutshita gifua gukombelela Yehowa mayilago.—Tanga Ngimbo 37:29.
11. Gubonga gutshi tuana heta luholo tuana suena hehi nu Nzambi? Luholo lutshi Yehowa wana gudivua?
11 Gusuena hehi nu Yehowa guana gutubatela gubonga mu maluholo avula. Ha gufezegesa, Yehowa walayele egi mbawututotesela gubola gula tuabalumuna mutshima. (Yesh. 1:18) Hene tuanago gulandula gudisagesa mukunda nu gubola tuakalegele mu masugu abalega. (Ngi. 32:1-5) Tuana khala nji nu gusuanguluga handaga tuana suanguluisa Yehowa. (Ish. 23:15) Yadiago tuana heta gubonga guavula handaga tudi mafuta a Yehowa. Na luholo lutshi wajiya gulandula gusuena hehi nu Nzambi?
LANDULA “GUSUENA HEHI NU NZAMBI”
12. Itshi wakalegele ha gusuena hehi nu Nzambi?
12 Gutuama egi ubatijiwe, wakalegele ndaga jiavula ha gubua futa dia Yehowa. Walongugile ndaga jiavula jiatadila Yehowa nu Klisto Yesu, wabalumuine mutshima mu gubola guaye, washile gutshigina gudi Nzambi, watshitshile nji yagasue ha gunemesa mikhuala yenji. Uvi ha gusuena hehi nu Nzambi, tudi naye gulandula gutshita ndaga jiene.—Kol. 2:6.
13. Ndaga jitshi thathu jiajiya gutukuatesa ha gulandula gusuena hehi nu Yehowa?
13 Itshi yajiya gutukuatesa ha gulandula gusuena hehi nu Yehowa? 1) Tudi naye gulandula gutanga nu gulonguga Biblia. Tangua tudi mulonguga Biblia, tudi naye gukamba gujiya ndaga jiavula jiatadila Nzambi ha fundo dia gusuga phamba mu malongo a gisendeselo. Tudi naye gutshita ngolo ha gukamba gukotelesa malongo a Yehowa adi mu Biblia nu guatumagela. (Ef. 5:15-17) 2) Tudi naye gutangigiza maluholo Yehowa wana gutumonesela guzumba, ngenyi mbatukolesa gutshigina guetu gudi muene. 3) Tudi naye nji gulandula gutuna ndaga jianago gusuanguluisa Yehowa nu gutuna gukuata ufuta nu athu ana kalagala ndaga jiene.—Ngi. 1:1; 101:3.
14. Ha gutadila 1 Kolinto 10:31, ndaga jitshi tudi naye gutshita lusugu nu lusugu ha gusuanguluisa Yehowa? (Tala nji ifuanesa.)
14 Tanga 1 Kolinto 10:31. Idi nu ndando ha gulandula gukalagala ndaga jiana suanguluisa Yehowa. Hene, tushigo naye gusuga phamba ha guya mu mudimo wa gulongesa nu guya mu gudibungisa gua mu hungu, uvi tudi naye gutshita ndaga jiko jiavula. Ndaga tuana kalagala lusugu nu lusugu jidi naye gusuanguluisa Yehowa. Tuana suanguluisa Yehowa tangua tuana zuela giamatshidia mu ndaga jiagasue nu tangua tuana khaphela athu ako ima tudi nayo. (2 Kol. 8:21; 9:7) Yehowa wana suanguluga nji tangua tuana gumuhana mersi mukunda nu monyo watuhanele muene. Tuana suena hehi nu Yehowa tangua tuana tadila muabonga luholo luetu lua gudia nu lua gunua matombe nu tangua tuana kalagala ndaga jiko jiana gutukuatesa ha gukhala nu sante yabonga. Yehowa wana suanguluga muavula tangua tuana kalagala yagasue ha gumusuanguluisa mu ndaga jiagasue.—Luka 16:10.
Guwendesa nu gutema guagasue, gukalagala ba exercice, gudia muabonga ha gubamba sante yetu nu gukhaphela athu ako ima tudi nayo, gudi mukatshi dia ndaga tuajiya gutshita ha gusuanguluisa Yehowa (Tala paragrafe 14)
15. Luholo lutshi Yehowa wana tshigina egi tukalegele athu ako ndaga?
15 Yehowa wana kalagala ndaga jiabonga gudi athu agasue ikhale gudi athu abonga nga athu abola. (Mat. 5:45) Wana tshigina egi esue nji tukalegele athu agasue ndaga jiabonga. Ha gufezegesa, tushigo naye ‘gushinga nga muthu mumoshi, tushigo naye nji gukhala enya nguma, . . . uvi tudi naye gukhala atuluga gudi athu agasue.’ (Tito 3:2) Hene tushigo naye gutangiza egi tuabalega athu anyi anago gukombelela Yehowa. (2 Tim. 2:23-25) Tuana suena hehi nu Yehowa tangua tuana kalegela athu agasue ndaga jiabonga.
TUAJIYA ‘GUSUENA HEHI NU YEHOWA’ IKHALE TUAKALAGALA GUBOLA
16. Luholo lutshi muthu wasonegele mukanda wa Ngimbo mukhapho 73 wadivuile?
16 Matangua ako wajiya gusendesa gutangiza egi Yehowa gashigo luko guguzumba mukunda nu gubola wakalegele. Gifua luholo tuayimonyi, muthu wasonegele mukanda wa Ngimbo mukhapho 73 wataganele nji nu ndaga ya luholo elu. Wazuelele egi: ‘Ngakhakhugile, guasalele hazonda hagule egi ngubue.’ (Ngi. 73:2) Wazuelele luko egi wabuile gifua ‘muthu waheya,’ muthu ‘gashigo mutangiza’ nu “gifua shitu” gu meso a Yehowa. (Ngi. 73:21, 22) Na watangijile egi luholo luakalegele muene gubola, Yehowa mbagashigo luko gumuzumba nga gumutotesele ba?
17. a) Ndaga itshi muyimbi wa ngimbo wakalegele tangua muila wamulebele? b) Gifezegeselo gienji gidi gutulongesa itshi? (Tala nji ifuanesa.)
17 Mu tangua dimoshi ngenyi, muyimbi wa ngimbo watangijile egi Yehowa gashigo gumuzumba. Ikhale muyimbi wa ngimbo wakhalele gudivua egi gashigo nu ndando, uvi wakotelesele egi idi nu ndando ha gusuena hehi nu Nzambi, wasonegele egi: ‘Ngudi nu aye masugu agasue, wakuatele koko diami dia madia mangololo. Udi gungutuameza nu malongo aye nu mbawungutuameza mu lutumbu.’ (Ngi. 73:23, 24) Esue nji tudi naye gutoga Yehowa ha gutuhana ngolo tangua tudi a guleba nga tangua tudi gudisagesa mukunda nu gubola tuakalegele. (Ngi. 73:26; 94:18) Gula tuakalagala gubola guakoma, tudi naye gukamba ukuateshi gudi Yehowa nu gusha mutshima egi udi ‘hehi ha gututotesela.’ (Ngi. 86:5) Hene gula tualeba muila, idi nu ndando ha gusuena hehi nu Nzambi.—Ngi. 103:13, 14.
Gula tualeba mu nyuma, tuajiya gusuena hehi nu Yehowa gula tudi muya mu gudibungisa nu gutshita gisambu tangua diagasue (Tala paragrafe 17)
‘SUENA HEHI NU NZAMBI’ MAYILAGO
18. Mukunda natshi tudi naye gulandula gusuena hehi nu Yehowa mayilago?
18 Tudi naye gulandula gulonguga ndaga jiatadila Yehowa ha gusuena hehi n’enji mayilago. Biblia yana zuela egi gushigo nga muthu wajiya “gukotelesa milonga yana kalagala” Yehowa, ndunge jienji nu ujiyi wenji. —Roma 11:33.
19. Felela ditshi mukanda wa Ngimbo udi gutuhana mukunda nu masugu adi muza?
19 Mukanda wa Ngimbo 79:13 udi musendesa nu mbimbi’eji: ‘Esue athu aye nu imeme ya mu dinda diaye mbatuguhana mersi ivo nu ivo; mbatulandula getu gugutumbuisa mu indongo yagasue.’ Sha mutshima egi luholo udi mulandula gusuena hehi nu Nzambi, muene mbawugushimbiga mayilago nu wajiya guzuela nu gutshigina guagasue egi: ‘Nzambi udi seso dia mutshima wami, udi khapho diami mayilago.’—Ngi. 73:26.
LUNGIMBO 32 Prends le parti de Jéhovah!
a Gula muthu wamona egi udi gudisagesa muavula nga ndo udi nu gikenene giavula gishigo muhua, wajiya gukamba ukuateshi gudi minganga. Ha gujiya ndaga jiavula, tala Inzo Yaleha ya Mutaledi, No. 1 ya 2023 ya français.