Malongo a Gisendeselo a Biblia Walongugile Ajiya Gugukuatesa Mangino ba?

1. Luholo lutshi malongo a Biblia asombegesele monyo waye tangua wasendesele gulonguga giamatshidia?

MALONGO a thomo a Biblia tualongugile asombegesele monyo wetu. Ha gufezegesa, tuasendesele gusuena hehi nu Nzambi tangua tualongugile egi jina dienji didi Yehowa. (Yesh. 42:8) Tangua tualongugile ndaga jiana buila muthu gungima dia gufua guenji, tuakhalelego luko gudihula gula athu tuafuishile ana mona malamba nga ndo. (Mulo. 9:10) Tangua tualongugile nji egi Nzambi mbawubuisa mavu awa phaladiso, yatukuatesele ha gutuna gudisagesa mukunda nu masugu adi muza. Tuashile nji mutshima egi mbatushigo luko mujinga ivo 70 nga 80 uvi mbatukhala nu monyo mayilago.​—Ngi. 37:29; 90:10.

2. Ha gutadila 2 Phetelo 1:12, 13, mukunda natshi Aklisto a gukula mu nyuma adi naye gutangigiza malongo a gisendeselo a Biblia alongugile?

² Tushigo naye gubuita mutshima egi malongo a gisendeselo a Biblia tualongugile akhala nu ndando yavula. Mupostolo Phetelo wasonegele mukanda wenji wa mbadi gudi Aklisto akhalele “ya gujinginyina muabonga mu giamatshidia.” (Tanga 2 Phetelo 1:12, 13.) Uvi mu tangua diene, athu abola angiyile mu hungu, akhalele mutuma aphangi ako ha gubemba giamatshidia. (2 Phet. 2:1-3) Phetelo wakhalele mutshigina gukuatesa aphangi enji a mala nu a akhetu ha gudibamba gu malongo ene a mambo. Hene, waawunguluishile malongo ako a gisendeselo a Biblia alongugile. Malongo ene akhalele naye guakuatesa ha gusala ya gujinginyina uu nu gu gisugishilo.

3. Hana gifezegeselo gidi mumonesa gishina Aklisto agasue adi naye gutangigiza malongo a gisendeselo a Biblia.

³ Ikhale tuana kombelela gale Yehowa sendese mualeha, tudi naye gulandula gulonguga malongo a gisendeselo a Biblia. Ha gufezegesa: Mama mumoshi nu mun’enji wa mukhetu ajiya gukalegela milungo (ingrédients) ya luholo lumoshi ha gutelega ima ya gudia. Uvi mama wana jiya gukalegela milungo yene muabonga ha gutelega ima ya gudia yabonga mu maluholo ya gudisha, handaga wana guyikalegela gale sendese mualeha. Luholo lumoshi nji, akombeledi a Yehowa a mualeha ana jiya luholo lua guzula malongo avula mu verse ana jiya gale muabonga gubalega athu adi musendesa gulonguga Biblia. Mukunda natshi? Handaga sendese tuabatijiwe, ndaga jiavula jiasombegesele gale mu monyo wetu, tuahetele gale nji inemo yavula ya gudisha. Gula tudi mutangigiza malongo a Biblia tualongugile sendese mualeha, tuajiya gumona maluholo ahe-ahe tuajiya guakalegela mu ndaga tudi mutagana najio. Tutadilenu malongo Aklisto a gukula mu nyuma ajiya guzula mu malongo thathu mukatshi dia malongo a gisendeselo a Biblia alongugile.

YEHOWA UDI MUFUGI

4. Luholo lutshi gujiya egi Yehowa muene Mufugi guasombegesele monyo wetu?

⁴ Tudi mujiya egi mavu nu ima yagasue idi hene yafugiwe gudi Mufugi wa ndunge jiagasue nu wa ngolo jiagasue. Biblia yana zuela egi: “Muthu wafugile ima yagasue udi Nzambi.” (Heb. 3:4) Yehowa watufugile, wana gutujiya nji muabonga diago. Uvi ndaga yabalega ndando idi egi, wana gudisagesa muavula mukunda nu esue. Wana jiya ndaga jiajiya gutubatela gubonga. Gujiya egi Yehowa muene Mufugi, guasombegesele monyo wetu mu maluholo avula, guatuhanele nji felela.

5. Itshi yajiya gutukuatesa ha gukhala nu khadilo dia gudibulumuisa? (Yeshaya 45:9-12)

⁵ Gujiya egi Yehowa muene Mufugi guajiya gutukuatesa ha gukhala athu a gudibulumuisa. Ha gufezegesa, tangua Yobo wakhalele muzuela ndaga jiabola mukunda nu Yehowa, wabuitshile mutshima mu ndaga jiakhalele nu ndando yavula; wakhalele mutadila phamba matangi enji nu wakhalele nji gudibingisa. Uvi Yehowa wamuwunguluishile egi muene udi Mufugi wa ngolo jiagasue. (Yobo 38:1-4) Ndaga yene yakuatesele Yobo ha gukotelesa egi Yehowa wana tshita ndaga mu luholo luatagana tangua diagasue. Profete Yeshaya wasonegele egi: ‘Wuma wajiya guhula muthu udi guwubumba egi: “Itshi udi mulonda?”’​—Tanga Yeshaya 45:9-12.

6. Tangua ditshi tudi naye gutangigiza ndunge nu ngolo jia Mufugi wetu? (Tala nji ifuanesa.)

⁶ Gula muthu wana kombelela gale Yehowa sendese mualeha, wajiya gusendesa gudishila mutshima ha fundo dia gukamba utuameji gudi Yehowa nu mu Mbimbi yenji. (Yobo 37:23, 24) Uvi luholo lutshi gutangigiza muabonga egi Yehowa udi Mufugi wenji nu wakhala nu ndunge nu ngolo jiavula guajiya gumukuatesa? (Yesh. 40:22; 55:8, 9) Gutshita ngenyi mbagumukuatesa ha gukhala muthu wa gudibulumuisa nu gukotelesa egi matangi a Yehowa akhala nu ndando yavula gubalega.

7. Itshi yakuatesele phangi Rahela ha gutshigina usombegeshi uhe-ehe?

⁷ Gujiya egi Yehowa muene Mufugi guakuatesele phangi Rahela wa gu Slovénie ha gutshigina usombegeshi mu ulondegi wetu. Udi muzuela egi: “Matangua ako yakhalelego yaleba ha gutshigina badesizio a aphangi ana gututuameza. Ha gufezegesa, ngatalele gami video ya Mbimbi jia Hunji dia Akulu Atuameji Gitshinyi gia 8 Givo 2023; yakhalele muzuelela gula aphangi a mala ajiya gubemba muevu nga ndo, uvi mbala ya thomo ngamonele phangi mutshita diskur nu muevu yangusagesele muavula. Ngakombelele Yehowa, ngamutogele ha gungukuatesa ha gujidila nu usombegeshi wene.” Rahela wakotelesele egi Yehowa muene Mufugi wa dilu nu mavu, wana jiya muabonga luholo lua gutuameza ulondegi wenji. Gula idi nji lamba gudi aye ha gutshigina ukoteleshi uhe-uhe wa ndaga imoshi ngenyi nga utuameji uhe-uhe, zula tangua dia gutangigiza muabonga egi Mufugi waye wakhala nu ndunge nu ngolo jiavula.​—Roma 11:33-36.

GISHINA NZAMBI WANA HANA NJILA EGI TUTAGANE NU MALAMBA

8. Gubonga gutshi wahetele tangua walongugile egi Yehowa wahanele njila egi tutagane nu malamba?

⁸ Mukunda natshi Nzambi wana hana njila egi tutagane nu malamba? Athu ako ana jiya ndo mvutu ya muhu owu, gishina giene ana vuila Nzambi khabu nu ana zuela egi Nzambi gakhalago guene. (Ish. 19:3) Uvi aye walongugile egi athu ana tagana nu malamba nu ana gufua mukunda nu gubola guakalegewe nu luholo tushigo athu atagana, uvi ishigo Nzambi watubatele malamba ene. Walongugile nji egi Yehowa wana monesa khadilo dia guhuiminyina ha guhana athu avula luendu lua gumujiya nu gulonguga ha gujiya luholo mbalumanesela muene malamba agasue mayilago. (2 Phet. 3:9, 15) Gujiya giamatshidia giene guaguhanele gikhesa nu yagutumine ha gukolesa ufuta waye nu Yehowa.

9. Mu ndaga jitshi tudi naye gukamba gujiya gishina Yehowa wahanele njila egi tutagane nu malamba?

⁹ Tudi naye gukhala nu khadilo dia guhuiminyina ha tudi munengena egi Yehowa amanesele malamba agasue. Uvi gula esue nu enya fami yetu tudi mutagana nu malamba nga gula tuafuisa muthu tuana zumba, tuajiya gusendesa gudisagesa ha gumona egi Yehowa udi mushipha ha gumanesela malamba. (Hab. 1:2, 3) Mu matangua a luholo elu, tudi naye gukamba gujiya gishina Yehowa wahanele njila egi athu abonga atagane nu malamba.a (Ngi. 34:19) Tudi naye nji gutangigiza felela diatuhanele muene dia gumanesela malamba agasue mayilago.

10. Itshi yakuatesele phangi Anne ha guheta gikhesa gungima dia gufua gua mama wenji?

¹⁰ Gujiya gishina tuana tagana nu malamba guajiya gutukuatesa ha gukolesela mu malamba ene. Phangi Anne wana jinga gu hongo dia Mayotte gu Océan Indien, udi muzuela egi: “Tangua mama wami wafuile, ngakhalele gudisagesa muavula gungima dia ivo yazonda. Uvi ngakhalele mujiya egi ishigo Yehowa udi ha gishina gia malamba ene. Muene udi hehi ha gumanesela malamba agasue nu gufuzumuna athu tuakhalele muzumba. Gutangigiza ndaga eji guangukuatesele ha gutuna gudisagesa muavula nu ngahetele gikhesa.”

11. Luholo lutshi gujiya gishina Yehowa wabembele egi tutagane nu malamba guana gutukuatesa ha gulandula gulongesa?

¹¹ Gujiya gishina Nzambi wahanele njila egi tutagane nu malamba, guajiya gututuma ha gulandula gulongesa lukuma luabonga. Tangua Phetelo wakotelesele egi Nzambi wana monesa khadilo dia guhuiminyina hagula athu abalumune mutshima nu ahuluishiwe, wasonegele egi: “Tangizenu ha gujiya gula mudi naye gukhala athu a luholo lutshi mu ndaga yatadila makalegelo a gijila nu midimo idi mumonesa egi mudi ya gujinginyina gudi Nzambi.” (2 Phet. 3:11) Mukatshi dia ndaga jiene watangele “midimo idi mumonesa egi mudi ya gujinginyina gudi Nzambi,” yakotelesa mudimo wetu wa gulongesa. Esue nji tuana zumba athu gifua Yehowa. Tuana tshigina egi ene nji ahete monyo wa ivo nu ivo. Yehowa wana monesa khadilo dia guhuiminyina ha guhana athu a mu mafundo agasue luendu lua gumukombelela. Tudi diago nu luendu luakoma ha gukhala enya mudimo a Nzambi nu ha gukuatesa athu avula ha gumujiya gutuama egi gisugishilo gize!​—1 Kol. 3:9.

TUDI MUJINGA MU “MASUGU A GISUGISHILO”

12. Itshi idi gututshiginyisa egi Mbimbi ya Nzambi idi yatagana ha gushila mutshima?

¹² Biblia yadiangele guzuelela luholo athu mbaakhala “mu masugu a gisugishilo.” (2 Tim. 3:1-5) Tangua tuana mona makalegelo a athu tuana jinga nawo, yana gutukuatesa ha gujiya egi ndaga jiana zuela Biblia jidi jia giamatshidia. Luholo tudi mumona nji makalegelo a athu adi mulandula gudibolesa, idi gututshiginyisa diago egi Mbimbi ya Nzambi idi yatagana ha gushila mutshima.​—2 Tim. 3:13-15.

13. Ha gutadila gifezegeselo giahanele Yesu mu mukanda wa Luka 12:15-21, mihu itshi tudi naye gudihula?

¹³ Gujiya egi tudi mujinga mu masugu a gisugishilo guajiya gutukuatesa ha gukalegela tangua dietu muabonga. Ha gujiya mukunda natshi idi nu ndando ha gukalegela tangua dietu muabonga, tutadilenu gifezegeselo giahanele Yesu mu Luka 12:15-21. (Tanga.) Mukunda natshi muenya umonyi watamegewe egi “muthu waheya”? Gamutamelego ngenyi handaga wakhalele nu umonyi wavula, uvi idi handaga wakhalele guwusha ha fundo dia thomo mu monyo wenji. Wakhalele “mubamba umonyi wavula-vula mukunda nu muene hakhenji, uvi gu meso a Nzambi [gakhalelego] muenya umonyi.” Watshitshile gubola guakoma luholo luakalegele muene tangua dienji mu luholo luabola, handaga gakhalelego luko nu masugu avula a gujinga. Nzambi wawambelele muthu muene egi: “Mu phipha ya mangino udi mufua.” Longo ditshi tuajiya guzula mu lumene elu? Luholo gisugishilo gia mavu awa giasuena hehi, idi nu ndando ha gudihula egi: ‘Mafelela ngana gudishila ana monesa egi ngana kalegela tangua diami muabonga ba? Mafelela atshi ngana shila an’ami? Ngana kalegela tangua diami, ngolo jiami nu mbongo jiami mukunda nu guvudisa umonyi wami hakhami nga mukunda nu gusha ndaga jia mu nyuma ha fundo dia thomo?’

14. Gifua luholo gifezegeselo gia phangi Miki gidi guyimonesa, mukunda natshi idi nu ndando ha guwunguluga egi tudi mu masugu a gisugishilo?

¹⁴ Gujiya egi tudi mujinga mu masugu a gisugishilo guajiya gutukuatesa ha guzula badesizio abonga. Yene ndaga yakuatesele phangi wa mukhetu Miki. Udi muzuela egi: “Ngazudile desizio dia gulonguga shitu gu université, ngakhalele mukamba mudimo wajiya gunguhana njila ha gulonguga. Uvi ngakhalele nji nu felela dia gutshita mudimo wa muvundji wa njila wa tangua diagasue nu guya fundo akhalele nu funu ya alongeshi. Mafuta a gukula mu nyuma angukuatesele ha gutangiza muabonga desizio ngajiya guzula hagula dingukuatese ha gutagenesa mafelela ami a mu nyuma. Angukuatesele ha gujiya egi gisugishilo gia mavu awa giasuena hehi. Anguwambelele nji egi mu mavu ahe-ahe mbangukhala nu tangua diavula dia gulonguga shitu jiavula gifua luholo ngatshigina. Hene ngazudile desizio dia gutuna gulandula makhalasa aleha-leha. Gutshita ngenyi guangukuatesele ha guheta mudimo wanguhanele njila ha gutshita mudimo wa muvundji wa njila wa tangua diagasue; gungima ngayile gu Équateur fundo akhalele nu funu ya alongeshi.” Phangi Miki nu mulumi’enji ana tshita mudimo wa mutadi muwendji mu gifutshi giene.

15. Luholo lutshi athu ajiya gutadila lukuma luabonga? Hana gifezegeselo. (Tala nji ifuanesa.)

¹⁵ Tushigo naye guleba muila gula athu ashigo musuanguluga nu lukuma luabonga. Uvi tudi naye gujiya egi athu ajiya gusombegesa. Tutadilenu gifezegeselo gia Yakoba phangi’a Yesu. Wamonele luholo luakhalele mukula Yesu, luholo luabuile muene Masiya nu luholo luakhalele muene mulongesa mu luholo lua gushimana. Ikhale ngenyi Yakoba gabuilego mulandudi wa Yesu. Uvi gungima dia gufuzumuga gua Yesu, Yakoba wabuile mulandudi wa gikhesa mu tangua diene!b (Yone 7:5; Gal. 2:9) Hene ubembigo gulongesa enya fami yaye anyi atunyile lukuma luabonga nga athu ako atunyile gugutegelela tangua waalongesele. Ujimbilago egi tudi mujinga mu masugu a gisugihilo, hene mudimo wetu wa gulongesa udi naye gukalegewa muphushi. Ndaga udi gualongesa mangino ajiya gujiwunguluga nu gujikalegela gutuama egi lamba diakola disendese.c

KHALA MUHANA YEHOWA MERSI MUKUNDA NU MALONGO A GISENDESELO A BIBLIA

16. Gubonga gutshi wahetele gale mu malongo a gisendeselo a Biblia ulondegi wetu wana zola? (Tala nji galuanda “Kalegela Ikadigilo Yene Muabonga ha Gukuatesa Athu Ako.”)

¹⁶ Malongo ako a gisendeselo a Biblia anyi ulondegi wetu wana zola, ana khala mukunda nu athu anyi ashigo mujiya ndaga jiavula jiatadila Biblia. Ha gufezegesa, ba diskur a athu agasue ana kalegewa phoso nu phoso, mikanda nu video jidi mu jw.org nu ikadigilo iko, yana zolewa thomo ha gukuatesa athu anyi ashigo Matemue a Yehowa. Ikhale ngenyi esue nji tuana heta gubonga mu ikadigilo yene. Yana gutukuatesa ha gukudisa guzumba guetu gudi Yehowa, yana kolesa gutshigina guetu mu Mbimbi yenji nu yana gutukuatesa ha gulongesa muabonga malongo a gisendeselo gudi athu ako.​—Ngi. 19:7.

17. Mu ndaga jitshi tudi naye gutangiza malongo a gisendeselo a Biblia?

¹⁷ Esue Matemue a Yehowa tuana khala nu gusuanguluga gula tuaheta ukoteleshi uhe-uhe wa malongo a Biblia. Uvi tuana khala nji nu gusunguluga mukunda nu malongo a ndando a Biblia tualongugile anyi atukuatesele ha gukuata ufuta nu Yehowa. Gula idi lamba mukunda nu esue ha gutumagela usombegeshi umoshi ngenyi, tudi naye gujiya nu gudibulumuisa guagasue egi Yehowa Nzambi wa ngolo jiagasue nu Mufugi wa ndunge, muene udi mutuameza ulondegi wenji. Gula esue nu enya fami yetu tudi mutagana nu malamba, tudi naye gumonesa khadilo dia guhuiminyina nu gutangigiza gishina Yehowa wahanele njila egi tutagane nu malamba. Tangua tudi muzula badesizio ha gujiya luholo lua gukalegela tangua dietu nga mbongo jietu, tudi naye gujiya egi tudi mu masugu a gisugishilo. Tubembe egi malongo a Yehowa alandule gutuhana ndunge nu atukuatese ha gusala ya gujingyina gudi muene.