Luholo Lutshi Yehowa Wana Gutukuatesa ha Gukolesela?

1. Mukunda natshi tudi naye gukolesela? Nanyi wajiya gutukuatesa ha gukolesela? (1 Phetelo 5:10)

MUKUT’ETU agasue tuana tagana nu malamba, hene matangua ako tuajiya gutangiza egi idi lamba ha gulandula gukolesela uu nu gu gisugishilo. Aphangi ako ana kata misongo yakola sendese mualeha, ako afuishile gale athu akhalele muzumba. Ako adi mutagana nu usageshi gudi enya fami jiawo nga gudi mafumu a leta. (Mat. 10:18, 36, 37) Sha mutshima egi ikhale lamba ditshi udi mutagana nadio, Yehowa wajiya gugukuatesa ha gukolesela.​—Tanga 1 Phetelo 5:10.

2. Itshi yana gutukuatesa ha gukolesela?

² Gukolesela gudi mukotelesa gusala ya gujinginyina gudi Yehowa nu gumukombelela nu gusuanguluga ikhale tudi mutagana nu malamba, usageshi nga gula tualolewa ha gutshita gubola. Ha gukolesela tudi naye gusha mutshima egi ndaga mbajiyila muabonga. Esue Aklisto tuanago gukolesela mu ngolo jietu hakhetu, uvi Yehowa wana gutuhana “ngolo jiabalega ngolo jia athu.” (2 Kol. 4:7) Mu longo edi, tuza mumona ndaga nguana jiatuhanele Yehowa ha gutukuatesa ha gukolesela mu malamba. Tuza mumona nji luholo ndaga jiene jiajiya gutukuatesa ha gulandula gumukombelela.

GISAMBU

3. Mukunda natshi tuajiya guzuela egi gisambu gidi ndaga ya gushimana?

³ Yehowa watshitshile ndaga ya gushimana yajiya gutukuatesa ha gukolesela. Watuhanele luendu lua guta n’enji maga ikhale tushigo athu atagana. (Heb. 4:16) Tangiza gale ndaga eyi: Tuajiya gukombelela Yehowa tangua diagasue nu gumuwambela ndaga jiagasue tudi najio funu. Wana gututegelela ikhale tudi gumutoga mu zuelelelo ditshi nga fundo ditshi, gula tudi hakhetu nga mu bologo. (Yona 2:1, 2; Makal. 16:25, 26) Gula tudi nu gikenene nu tushigo mumona ndaga yaguzuela, Yehowa wana kotelesa ndaga tuatshigina guzuela. (Roma 8:26, 27) Yadiago, gutshita gisambu gudi diago ndaga ya gushimana!

4. Luholo lutshi tudi mujiya egi gula tuatoga Yehowa ha gutukuatesa ha gukolesela mu malamba mbawutukuatesa?

⁴ Yehowa udi gututshiginyisa mu njila ya Mbimbi yenji egi: “Ndaga yagasue tuana gumulomba idi gudivua nu gutshigina guenji, wana gututegelela.” (1 Yone 5:14) Tuajiya gutoga Yehowa ukuateshi ha gukolesela ba? Ayi! Handaga gutshita ngenyi guana gudivua nu gutshigina guenji. Mukunda natshi tuazuela ngenyi? Handaga tangua tuana kolesela mu malamba, tuana hana Yehowa njila ha guhana mvutu gudi mbalagaji wenji Satana Diabulu. (Ish. 27:11) Katula ndaga yene, Biblia yana monesa nji egi Yehowa wakhala hehi ha “gumonesa ngolo jienji mukunda nu athu ana gumukalegela nu mutshima wawo wagasue.” (2 Gudi. 16:9) Hene, tudi naye gusha mutshima egi Yehowa udi nu ngolo nu nzala ya gutukuatesa ha gukolesela.​—Yesh. 30:18; 41:10; Luka 11:13.

5. Luholo lutshi gisambu giajiya gutukuatesa ha gukhala nu guhuima gua mu matangi? (Yeshaya 26:3)

⁵ Biblia yana zuela egi gula tudi muwambela Yehowa ndaga jiagasue tudi najio mu mutshima mu gisambu, muene ‘mbawutuhana guhuima guabalega ndaga jiagasue athu ajiya gukotelesa.’ (Fili. 4:7) Tuana hana Yehowa mersi mukunda nu ndaga yene. Athu anago gukombelela Yehowa ana tagana nji nu malamba avula; ana tshita yagasue ha guabuita mutshima nga gukhala nu guhuima. Ha gufezegesa, athu ako ana kamba gukatula ndaga jiagasue mu matangi awo ha gudivua muabonga. Gula muthu udi mukalagala ndaga jia luholo elu uvi gashigo gudikanda mu ndaga jidi mutangiza muene, wajiya gudinginyisa mu ndaga jia bademo. Ndaga yene yajiya gukhala gingonza diago. (Fuanesa nu Matayo 12:43-45.) Ikhale athu ana tshita ndaga jia luholo elu ajiya gudivua muabonga, uvi ana khalago nu guhuima guana gutuhana Yehowa gunu guabalega ndaga jiagasue. Tangua tuana kombelela Yehowa, tuana monesa egi tuana gumushila mutshima nu tudi mujiya egi muene mbawutuhana “guhuima gua diago.” (Tanga Yeshaya 26:3.) Ndaga iko Yehowa wana tshita ha gutuhana guhuima idi luholo luana gutukuatesa muene ha guwunguluga verse jia Biblia jiajiya gutuhana gikhesa. Verse jiene jiana gutukuatesa ha gujiya egi Yehowa wana gutuzumba muavuala nu wana tshigina gutukuatesa, ngenyi tuana gudivua diago mu guhuima.​—Ngi. 62:1, 2.

6. Ndaga itshi iko wajiya guwambela Yehowa mu isambu yaye? (Tala nji gifuanesa.)

⁶ Ndaga wajiya gutshita. Gula udi nu malamba, wambela Yehowa luholo udi gudivua; “bishila ginemo giaye” gudi muene, mutoge ha guguhana guhuima guenji. (Ngi. 55:22) Mutoge nji ndunge jiajiya gugukuatesa ha gujiya ndaga ya gukalagala. (Ish. 2:10, 11) Tangua udi gumutoga ngolo jia gukolesela, ujimbilago nji gumuhana mersi mu isambu yaye. (Fili. 4:6) Kamba gujiya luholo Yehowa udi gugukuatesa mu lamba diaye, muhane nji mersi mukunda nu ukuateshi wenji. Ubembigo egi malamba udi mutagana nawo agukange njila ha gumona luholo Yehowa adi gugukuatesa mu ndaga jiko.​—Ngi. 16:5, 6.

MBIMBI YA NZAMBI

7. Luholo lutshi gulonguga Biblia guajiya gutukuatesa ha gukolesela?

⁷ Yehowa watuhanele Mbimbi yenji ha gutukuatesa ha gukolesela mu malamba. Biblia yana khala nu verse jiavula jiana gututshiginyisa egi Yehowa mbawutukuatesa. Tutadilenu gifezegeselo gimoshi. Matayo 6:8 idi muzuela egi: “Tata wenu udi mujiya ima mudi nayo funu gutuama egi mumutoge nayo.” Yesu wazuelele mbimbi eji; wana jiya Yehowa muabonga gubalega athu agasue. Gishina giene, tudi naye gusha mutshima egi Yehowa mbawutukuatesa gula tuatagana nu malamba. Biblia yana khala nu ndaga jiavula jiana gutulaya Yehowa jinyi jiana gutuhana ngolo ha gukolesela.​—Ngi. 94:19.

8. a) Biblia yana gutulongesa itshi? b) Itshi tuajiya gutshita ha guwunguluga malongo a Biblia?

⁸ Malongo a Biblia ajiya gutukuatesa ha gukolesela mu malamba. Ana gutuhana ndunge jiana gutukuatesa ha guzula badesizio abonga. (Ish. 2:6, 7) Ha gufezegesa, Biblia yana gutuwambela ha gushila Yehowa mutshima lusugu nu lusugu ha fundo dia gudisagesa mukunda nu ndaga jiajiya gutubuila hamene. (Mat. 6:34) Gula tudi mutanga Biblia lusugu nu lusugu nu tudi mutangigiza mu ndaga tuatangi, mbayikhala yaleba ha guwunguluga malongo a Biblia ajiya gutukuatesa ha guzula badesizio abonga nga ha gukolesela.

9. Luholo lutshi mene jidi mu Biblia jiajiya gutukuatesa ha gusha mutshima egi Yehowa mbawutukuatesa?

⁹ Biblia yana khala nji nu mene jia athu akhalele mushila Yehowa mutshima, yana monesa nji luholo Yehowa waakuatesele. (Heb. 11:32-34; Yak. 5:17) Gula tudi mutangigiza mene jiene, mbayitukuatesa ha gusha mutshima egi Yehowa udi ‘fundo dietu dia gulengela; udi nji ngolo jietu. Muene wana khala hehi ha gutukuatesa mu tangua dia lamba.’ (Ngi. 46:1) Gutanga mene jidi mumonesa luholo akombeledi a Yehowa a mu tangua dikulu akhalele nu gutshigina guakola gudi muene nu luholo akolesele mu malamba, guajiya gututuma ha gutshita gifua ene.​—Yak. 5:10, 11.

10. Itshi wajiya gukalagala hagula Biblia igukuatese?

¹⁰ Ndaga wajiya gutshita. Khala mutanga Biblia lusugu nu lusugu, khala nji musonega verse udi mumona egi jiajiya gugukuatesa. Athu avula ana tanga verse nu komantere jia mukhapho wa lusugu mu gimenegena; gutshita ngenyi guana guakuatesa ha gutangigiza ndaga jiene lusugu lua mudidi. Phangi Mariea wakotelesele ndaga yene hakatele tata wenji nu mama wenji misongo ya cancer. Itshi yamukuatesele ha gukolesela hakhalele muene guakuatesa mu mbeji jiawo jia gisugishilo? Udi muzuela egi: “Lusugu nu lusugu, ngakhalele mutanga mukhapho wa lusugu mu gamukanda Examinons les Écritures chaque jour, ngakhalele nji guwutangigiza. Gutshita ngenyi guakhalele gungukuatesa lusugu nu lusugu ha gutangigiza Yehowa nu ima yabonga yana gutulongesa muene ha fundo dia gusha matangi ami phamba mu malamba ngakhalele nawo.”​—Ngi. 61:2.

APHANGI A AKLISTO

11. Luholo lutshi wana gudivua tangua wana mona luholo aphangi ana kolesela mu malamba?

¹¹ Yehowa watuhanele aphangi a Aklisto ana gutukuatesa ha gukolesela mu malamba. Gujiya egi ‘malamba tudi mutagana nawo ana buila nji aphangi’etu a ha mavu agasue’ guana gututshiginyisa egi tushigo hakhetu. (1 Phet. 5:9) Hene, ikhale tudi mutagana nu lamba dia luholo lutshi, tudi naye gujiya egi aphangi ako ataganele gale nji nu lamba diene nu asalele agujinginyina gudi Yehowa. Esue nji tuajiya gusha mutshima egi mbatukolesela gula tuagana nu lamba!​—Makal. 14:22.

12. Luholo lutshi aphangi etu ana gutukuatesa? Luholo lutshi esue nji tuajiya guakuatesa? (2 Kolinto 1:3, 4)

¹² Aphangi etu ajiya gutuhana gikhesa tangua tudi mutagana nu malamba. Aphangi a mala nu a akhetu akuatesele mupostolo Phaula. Wakhalele mutumbula majina awo mu mikanda yenji, wakhalele nji guahana mersi. Aphangi ene akhalele muwambela Phaula ndaga nu gisemo, amuhanele gikhesa nu akhalele gumukuatesa. (Fili. 2:25, 29, 30; Kol. 4:10, 11) Mangino nji, aphangi ana gutukalegela nji ndaga jia luholo lumoshi. Ana gutukuatesa nu ana gutuhana gikhesa tangua tuana tagana nu malamba; esue nji tuana guakuatesa gula atagana nu malamba.​—Tanga 2 Kolinto 1:3, 4.

13. Itshi yakuatesele phangi Maya ha gukolesela?

¹³ Aphangi a mala nu a akhetu akuatesele nji phangi Maya wa gu Russie. Mu 2020, maphulushi ayile musanda gumbo dienji, gungima ayile n’enji gu tribinale ha gumusophesa handaga wakhalele mulongesa athu ako lukuma luabonga. Phangi Maya udi muzuela egi: “Mu tangua diene, ngakhalele waguhuila, ngakhalele nji nu gikenene giavula. Uvi aphangi a mala nu a akhetu akhalele gungutamega, gungusonegele bamesaje nu mikanda; akhalele gunguwambela egi ana gunguzumba muavula. Thomo, ngakhalele mujiya egi ngakhala mu fami yakoma ya aphangi ana gunguzumba. Uvi sendese mu 2020, ngana kotelesa ndaga yene muabonga diago.”

14. Itshi tuajiya gutshita hagula aphangi’etu ajiya gutukuatesa? (Tala nji gifuanesa.)

¹⁴ Ndaga wajiya gutshita. Gula udi mutagana nu malamba, khala hehi nu aphangi a Aklisto. Uvuigo sonyi ha gutoga ukuateshi gudi akulu. Ajiya gubua mukunda nu aye gifua ‘gisuegelo mukunda nu funji, fundo dia gulengela mukunda gikudi.’ (Yesh. 32:2) Ujimbilago egi aphangi’aye a Aklisto adi nji mutagana nu malamba. Hene, gula wakalegela muthu ndaga nu gisemo, mbayigukuatesa ha gukhala nu gusuanguluga nu ha gukolesela mu malamba udi mutagana nawo.​—Makal. 20:35.

FELELA DIETU

15. Luholo lutshi felela diakuatesele Yesu? Luholo lutshi diana gutukuatesa nji mangino? (Hebelu 12:2)

¹⁵ Yehowa watuhanele felela diabonga diana gutukuatesa ha gukolesela. (Roma 15:13) Yesu wakolesele mu malamba agasue ataganele nawo muene ha mavu handaga wakhalele musha mutshima mu ndaga jiamulayele Yehowa. (Tanga Hebelu 12:2.) Wakhalele mujiya egi gula wasala wagujinginyina gudi Yehowa, mbawumonesa egi ndaga jiazuelele Satana mukunda nu Yehowa jidi jia mambo; mbawukuatesa nji hagula jina dia Yehowa dinemesewe. Wakhalele nji gudifelela ha guvutuga gudi Sh’enji mu dilu nu gubua fumu wa Ufumu wa Nzambi ha guhinyina hamoshi nu Aklisto 144 000 ambiwe maji mu nyuma. Luholo lumoshi nji, felela dia gukhala nu monyo wa mayilago mu mavu ahe-ahe a Nzambi diana gutukuatesa ha gukolesela mu malamba agasue tudi nawo ha mavu awa a Satana.

16. Luholo lutshi felela diakuatesele phangi Alla ha gukolesela? Longo ditshi wazula mu lumene luenji?

¹⁶ Tutadilenu luholo felela dia gukhala mu mavu ahe-ahe diakuatesele phangi Alla wa gu Russie tangua ambile mulumi’enji mu bologo. Phangi Alla udi muzuela egi: “Gukombelela Yehowa mukunda nu felela dietu nu gutangigiza felela diene guangukuatesele ha gutuna guleba muila muavula. Ngakhalele mujiya egi gula malamba awa ahua, ndaga jiabonga mbajiza. Yehowa mbawushiya mbalagaji jienji nu mbawutuhana ima yabonga.”

17. Luholo lutshi tuajiya gumonesa egi tuana suanguluga nu felela diatuhanele Yehowa? (Tala nji gifuanesa.)

¹⁷ Ndaga wajiya gutshita. Khala muzula tangua dia gutangiza ndaga jiabonga jiagulayele Yehowa mukunda nu masugu adi muza. Khala mutangiza luholo mbawukhala mu mavu ahe-ahe hamoshi nu mafuta aye nu enya fami yaye nu luholo athu agasue mbaakhala nu gusuanguluga. Malamba agasue tuana tagana nawo mangino “adi azonda, adi mukunda nu tangua diazonda nji.” (2 Kol. 4:17) Khala nji mutshita yagasue ha gulongesa felela diaye gudi athu ako. Tangiza gale milonga yakhala nayo athu anago gukombelela Yehowa; ana khala nu malamba avula uvi ashigo nu felela diabonga diatuhanele Yehowa mukunda nu masugu adi muza. Ndaga jiazonda wajiya guawambela jiajiya guatuma ha gukamba gujiya ndaga jiavula jiatadila Ufumu wa Yehowa nu ndaga jiagasue jiatulayele muene.

18. Mukunda natshi tudi naye gusha mutshima mu mafelela a Yehowa?

¹⁸ Yobo wawambelele Yehowa gungima dia gukolesela mu malamba avula egi: ‘Henyana na ngajiya egi gudi aye gushigo nu gima giakola, aye wajiya gutshita ndaga yagasue walondji ha gutshita.’ (Yobo 42:2) Yobo wakotelesele egi gushigo nga nu gima giajiya gukanga Yehowa njila ha gutagenesa ndaga jialayele muene. Gujiya ngenyi guajiya nji gutukuatesa ha gukolesela. Ha gufezegesa, tangiza gale egi mukhetu mumoshi udi mukata waleba muila handaga minganga yavula yabingilego ha gumusaga. Uvi watagana nu munganga mumoshi wabonga, wamuwambela misongo idi nayo muene, wamuwambela nji egi udi gumusaga nu mbawuvua muabonga. Mukhetu muene wasuanguluga ikhale misongo yenji khenji isagewa. Mbayikhala yaleba gudi muene ha gukolesela misongo yenji handaga udi mujiya egi mbawusagewa. Luholo lumoshi nji, gula tudi musha mutshima mu felela dia gukhala nu monyo mu Phaladiso, mbayitukuatesa ha gukolesela.

19. Itshi tudi naye gutshita ha gukolesela?

¹⁹ Gifua luholo tuayimona mu longo edi, Yehowa watuhanele gisambu, Mbimbi yenji, aphangi a Aklisto nu felela ha gutukuatesa ha gukolesela. Gula tuakalegela ima yene muabonga, Yehowa mbawutukuatesa mu malamba agasue tudi nawo mangino. Mbatulandula gukolesela uu nu tangua mavu awa a Satana nu malamba agasue tudi nawo mbaashigo mukhala luko.​—Fili. 4:13.