Mukanda wa Thomo wa Samuele
11 Gungima Nahasha fumu wa enya Amona wazanguile masuta enji, ayile mutunga phundo hehi nu dimbo dia Yabeshe gu Gileade ha guluisa enya mu dimbo diene. Mala agasue a gu Yabeshe awambelele Nahasha egi: “Kota gikotelo nu esue, ngenyi mbatubua enya mudimo aye.” 2 Nahasha waavutudile egi: “Ame mbangukota n’enu gikotelo gula ngakobola muthu wagasue mukatshi dienu diso dia madia. Mbangutshita ngenyi ha guhana athu agasue a gu Isalele musonyi.” 3 Akulu a gu Yabeshe amuwambelele egi: “Tuhane masugu sambadi tutume athu mu mavu agasue a Isalele. Gula gushigo nu muthu wa gutuhuluisa, ngenyi mbatutshita ndaga wazuedi.” 4 Tangua athu atumiwe ahetele gu Gibea, fundo diakhalele Saula, awambelele athu ndaga jiene; athu agasue asendesele gudila mangololo.
5 Uvi mu tangua diene, Saula wakhalele mukatuga fundo diayile muene mudisa shitu, wahudile egi: “Ndaga itshi yabua? Mukunda natshi athu agasue adi mudila?” Amuwambelele ndaga jiagasue jiazuelele athu a gu Yabeshe. 6 Tangua Saula wavuile mbimbi jiene, nyuma ya Nzambi yamuhanele ngolo, wavuile diago khabu. 7 Saula wazudile ngombe mbadi, wajibatudile itshinyi-itshinyi. Gungima watumine athu ha guya mubemba itshinyi yene mu mavu agasue a Isalele. Waawambelele ha guzuela egi: “Muthu wagasue watuna gulandula Saula nu Samuele, ngombe jienji mbajibatudiwa nji ngenyi!” Athu agasue avuidile Yehowa woma, hene adivuile* ha guya nu Saula. 8 Saula watangele athu ene gu Bezeke: Akhalele mala 30 000 a mu giphuta gia Yuda nu athu ako 300 000 a mu iphuta iko ya Isalele. 9 Gungima Saula nu athu enji awambelele athu anyi akatugile gu Yabeshe ya gu Gileade egi: “Ndenu muwambele enya gu Yabeshe egi hamene mu tangua dia midi, mbaahuluishiwa.” Athu ene ayile, awambelele enya gu Yabeshe ndaga jiene. Tangua avuile ngenyi, asuangulugile muavula. 10 Mala a gu Yabeshe awambelele enya Amona egi: “Hamene mbatudihana ha mago enu hagula muajiya gutukalagala yagasue muatshigina.”
11 Mu lusugu lualanduile, Saula wakhaphele athu enji mu thundu thathu. Gungima anginyile nu gimenegena giagasue* mu phundo ya enya Amona. Aluishile enya Amona uu nu mu midi, ashiyile athu avula. Athu asalele, alengele muthu nu muthu gu khanda yenji. 12 Gungima enya Isalele ahudile Samuele egi: “Akuatshi akhalele mutuna egi Saula gakhadigo fumu wetu? Tuhane nawo hagula tuashiye.” 13 Uvi Saula waavutudile egi: “Gushigo nga muthu udi naye gushiyiwa mangino, handaga mangino Yehowa wahuluisa Isalele.”
14 Gungima Samuele wawambelele enya Isalele egi: “Izenu tuyenu gu Gilegale hagula tutshiginyise diago athu egi Saula wabua fumu.” 15 Hene athu agasue ayile gu Gilegale. Tangua ahetele guene, abuishile Saula fumu gutuama dia Yehowa. Gungima ahanele Yehowa milambu ya guhuima; Saula nu enya Isalele agasue akalegele wano, asuangulugile muavula.