Mukanda wa Thomo wa Samuele
12 Gungima Samuele wawambelele enya Isalele agasue egi: “Ngakalagala* ndaga jiagasue muangutogi, ngamitombela nji fumu udi naye gumihinyina. 2 Fumu udi naye gumituameza* muene yowu! Uvi ame ngakola gami, jinvi jianguzoga nji gu muto. An’ami a mala adi haha nu enue; ame ngamituameza sendese ulenge wami uu nu mangino. 3 Ame yowu. Ngutungununenu* gutuama dia Yehowa nu gutuama dia fumu watomba* muene: Ngazanguile ngombe nga phunda ya muthu ba? Ima ya nanyi ngakuyile? Nanyi ngamonesele lamba? Nanyi wanguhanele gima* hagula ngumubingise milonga? Gula idi ngenyi, nguwambelenu hagula ngumivutudile nayo.” 4 Enya Isalele amuvutudile egi: “Wakuyilego nga gima gia muthu mumoshi, wamoneselego nga muthu mumoshi lamba, watshiginyilego nji nga gima gimoshi ha mago a muthu.” 5 Samuele waawambelele egi: “Mangino Yehowa nu fumu watombele muene adivuila hakhawo luholo muazuela egi ngamikalegelego nga gubola gumoshi.”* Ene amuvutudile egi: “Ayi wadivuila hakhenji.”
6 Gungima Samuele wawambelele athu egi: “Yehowa yago watumine Moize nu Alona nu wazolele akhakh’enu mu mavu a Ejipitu, wadivuila hakhenji. 7 Henyaha dilondenu handaga nguza muwambela Yehowa milonga yenu. Nguza nji gumiwunguluisa ndaga jiagasue jiabonga jiamikalegele Yehowa nu jiakalegele muene akhakh’enu.
8 “Hahetele Yakoba gu Ejipitu, gungima akhakh’enu asendesele gutamega Yehowa hagula a akuatese. Mu tangua diene, Yehowa watumine Moize nu Alona ha guazola gu Ejipitu hagula akhale mu mavu awa. 9 Uvi ene abuitshile Yehowa Nzambi wawo mutshima. Waahanele* ha mago a Sisera, fumu wa masuta a gu Hasole nu ha mago a enya Filistiya. Waahanele nji ha mago a fumu wa gu Moaba; athu ene agasue a aluishile. 10 Akhakh’enu atamegele Yehowa hagula a akuatese; azuelele egi: ‘Tuakalagala gubola handaga tuabembi Yehowa ha gukombelela nzambi jia Bale nu isongo ya Ashitolete. Henyaha tuhuluise ha mago a mbalagaji jietu hagula tuajiya gugukombelela.’ 11 Gungima Yehowa watumine Yerubale nu Bedana nu Yefeta nu ame Samuele ha gumihuluisa ha mago a mbalagaji jienu hagula mukhale mu guhuima. 12 Tangua muamonele Nahasha, fumu wa enya Amona muza gumiluisa, muakhalele gunguwambela tangua diagasue egi: ‘Ndo tudi mutshigina gukhala nu fumu wa gututuameza!’ ikhale Yehowa Nzambi udi fumu wenu. 13 Fumu muakhalele mukamba nu muatogele, muene yowu. Talenu! Yehowa wamihagela n’enji. 14 Gula muavuila Yehowa woma, muamukombelela, muatumagela mbimbi yenji, muatunyilego nji gutumagela mikhuala ya Yehowa, gula enue nu muene fumu wenu muatumagela Yehowa Nzambi wenu, mbamukhala muabonga. 15 Uvi gula mushigo mutumagela mbimbi ya Yehowa, muatuna nji gutumagela mikhuala ya Yehowa, Yehowa mbawumihana ndola nu enue nu ash’enu. 16 Henyaha dilondenu hagula mumone ndaga yakoma iza mukalagala Yehowa ha meso enu. 17 Henyaha tudi mu sungi ya gukatula mbuto jia ble, uvi ngudi mutoga Yehowa hagula anumise miandu nu anogese mvula; ngenyi mbamujiya nu mbamukotelesa egi muakalagala ndaga yabola gu meso a Yehowa luholo muamutogi fumu.”
18 Gungima Samuele wakombelele Yehowa. Yehowa wanumishile miandu nu wanogesele mvula mu lusugu luene. Athu agasue avuidile Yehowa nu Samuele woma wakola. 19 Athu agasue awambelele Samuele egi: “Kombelela Yehowa Nzambi waye mukunda nu esue enya mudimo aye, handaga tushigo mutshigina gufua. Tualunda gubola guko holu dia gubola guetu guagasue luholo tuatoga fumu.”
20 Samuele wawambelele athu egi: “Muvuigo woma. Idi yadiago egi muakalagala ndaga eji jiagasue jiabola. Uvi mubembigo Yehowa, kombelelenu Yehowa nu mutshima wenu wagasue. 21 Mumubembigo ha gulandula nzambi jia mambo,* jiajiyilego gumikuatesa nga gumihuluisa handaga jidi isongo ya githuhu. 22 Yehowa mbagashigo gumibemba* mukunda nu jina dienji diakoma, handaga Yehowa hakhenji wamitombele ha gukhala athu enji. 23 Uvi ame mbangushigo mubemba nga hazonda gukombelela mukunda nu enue, handaga gula ngakalagala ngenyi mbangutshita gubola gu meso a Yehowa. Mbangulandula nji gumilongesa ndaga jiabonga nu njila yabonga mudi naye gulandula. 24 Uvi enue vuilenu Yehowa woma, mukombelelenu nu gujinginyina guagasue* nu mutshima wenu wagasue, handaga wamikalegela ndaga jia gushimana. 25 Uvi gula mualandula gukalagala ndaga jiabola, enue nu fumu wenu mbamushiyiwa.”