Ezela

3 Tangua mbeji ya 7 yataganele, enya Isalele* akhalele adi gale mu membo awo, adibungishile hamoshi gu Yelusalema gifua muthu mumoshi. 2 Yeshua mun’a Yosadake nu nganga-nzambi jiko, nu Zolobabele mun’a Shalatiele nu aphangi’enji ayile mutunga giwotshielo gia Nzambi, hagula ajiya guhana milambu ya guwotshia holu dia giwotshielo giene, gifua luholo idi ya gusonega mu Mukhuala wa Moize muthu wa Nzambi wa giamatshidia.

3 Ahagele giwotshielo giene ha fundo giakhalele thomo, ikhale akhalele muvua woma wa athu a mu ifutshi yakhalele hehi. Gungima asendesele guhana Yehowa milambu ya guwotshia ha giwotshielo giene, akhalele muhana milambu ya guwotshia ya mu gimenegena nu ya mu ngueze. 4 Gungima, atshitshile Wano wa Isasa* gifua luholo mukhuala wakhalele mutoga, lusugu nu lusugu akhalele muhana milambu ya guwotshia gifua luholo yakhalele mutogewa. 5 Gungima akhalele muhana milambu ya guwotshia lusugu nu lusugu nu milambu mukunda nu mbeji jihe-jihe, nu milambu mukunda nu mawano a Yehowa, nu milambu ya athu agasue anyi akhalele muhana Yehowa mulambu mu gutshigina guawo. 6 Mu lusugu lua thomo lua mbeji ya 7, asendesele guhana milambu ya guwotshia gudi Yehowa, ikhale fondasio ya tempelo ya Yehowa yakhalele khenji imbiwa gale ndo.

7 Ahanele mbongo gudi athu ana songa maseso nu gudi mbembo, ahanele nji ima ya gudia nu ya gunua nu maji gudi enya gu Sidona nu gudi enya gu Tile ha guabatela mabaya a sedre a gu Libane, adi naye guyila nawo mu kianga uu nu gu Yope, gifua muawambelele Fumu Siluse wa gu Phelese.

8 Tangua ahetele gu inzo ya Nzambi wa giamatshidia gu Yelusalema mu mbeji ya mbadi ya givo gia mbadi, Zolobabele mun’a Shalatiele nu Yeshua mun’a Yosadake nu aphangi’awo a mala nu nganga-nzambi nu enya Levi nu athu agasue akatugile mu uhiga ha guvutuga gu Yelusalema asendesele gutshita mudimo; atombele enya Levi akhalele nu ivo 20 uu nu holu ha gutuameza mudimo wa mu inzo ya Yehowa. 9 Yeshua nu an’enji a mala nu aphangi’enji a mala nu Kademiele nu an’enji a mala akhalele ajigulu a Yuda. Mukut’awo agasue adibungishile ha gutuameza athu akhalele mutshita mudimo mu inzo ya Nzambi wa giamatshidia, akhalele nu ana a Henadada a mala nu an’awo nu aphangi’awo anyi akhalele nji enya Levi.

10 Tangua athu akhalele mutunga ambile fondasio ya tempelo ya Yehowa, nganga-nzambi jinyi jiakhalele jia gusudiga milele yawo ya mudimo jiakhalele nu phungi, nu enya Levi nu ana a Asafe a mala azugile ha gutumbuisa Yehowa nu sembale gifua muazuelele Fumu Davidi wa gu Isalele. 11 Asendesele guyimba nu gutumbuisa Yehowa nu gumuhana mersi “handaga muene udi wabonga; guzumba guenji gua giamatshidia mukunda nu enya Isalele guana khala mayilago.” Gungima athu agasue atumbuishile Yehowa mu dijui diakola luholo ambile fondasio ya inzo ya Yehowa. 12 Nganga-nzambi jiavula nu enya Levi nu mafumu a fami jia mu iphuta, (mambuta anyi amonele tempelo ikulu) adidile mu dijui diakola tangua amonele fondasio ya tempelo ihe-ihe mumbiwa. Uvi athu ako avula asuangulugile muavula mu dijui diakola diago. 13 Hene athu akhalelego nu luholo lua gukhaphumuna matululu a gusuanguluga nu matululu a gudila, handaga athu akhalele musha matululu mu dijui diakola diago, matululu ene akhalele muvuiwa gualeha diago.