Ezela
4 Tangua mbalagaji jia enya giphuta gia Yuda nu enya giphuta gia Benjame jiavuile egi athu akatugile mu uhiga akhalele mutunga tempelo ya Yehowa Nzambi wa Isalele, 2 ayile mbala imoshi gudi Zolobabele nu gudi mafumu a fami jia iphuta ya enya Isalele, a awambelele egi: “Tubembenu tutunge hamoshi n’enu; handaga esue nji tuana kombelela* Nzambi wenu, tuana gumuhana nji milambu sendese hakhalele fumu Esale-Hadona wa gu Asiliya yago watubatele haha.” 3 Uvi Zolobabele nu Yeshua nu mafumu ako a fami jia iphuta ya Isalele a awambelele egi: “Mushigo naye gutunga inzo ya Nzambi wetu, uvi esue hakhetu tudi naye gutunga inzo mukunda nu Yehowa Nzambi wa Isalele, gifua muatuwambelele Fumu Siluse wa gu Phelese.”
4 Gungima athu ene akhalele mulandula gulebesa* enya Yuda muila nu guavuisa woma hagula abembe gutunga. 5 Ahanele mbongo gudi ahanyi a fumu malongo ha gubolesa ndaga, hagula enya Yuda alandulago gutunga mu masugu agasue a uhinyinyi wa Fumu Siluse wa gu Phelese uu nu mu uhinyinyi wa Fumu Daliyuse wa gu Phelese. 6 Gu gisendeselo gia uhinyinyi wa Aseluse, mbalagaji jiasonegele mukanda ha gufunda enya gu Yuda nu enya gu Yelusalema. 7 Mu uhinyinyi wa Fumu Aletakelesese wa gu Phelese, Bishalema nu Miteledata nu Tabele nu mafuta enji ako a mudimo asonegele fumu Aletakelesese mukanda. Abalumuine mukanda wene mu zuelelo dia Araméen, awusonegele mu isona ya Araméen.*
8 * Fumu Lehuma nu sekretere Shimishayi asonegele mukanda ha gufunda enya gu Yelusalema gudi Fumu Aletakelesese. Azuelele egi: 9 (Mukanda wene wasonegewe gudi fumu Lehuma nu sekretere Shimishayi nu mafuta awo ako a mudimo nu manzuji nu atuameji nu basekretere nu enya gu Eleke nu enya gu Babilona nu athu akhalele mujinga gu Suse, yakotelesa egi enya Elama, 10 nu enya ifutshi iko anyi fumu wakoma nu wa lutumbu Asenaphale wakuatele mu uhiga, gungima waahagele mu membo a gu Samaliya, nu athu ako a mu mavu a ha Sambua dia Muta.)* 11 Mukanda amutumidile wakhalele muzuela egi:
“Fumu Aletakelesese, esue enya mudimo aye, athu a mu mavu a ha Sambua dia Muta tuagusonegela mukanda owu: Henyaha 12 fumu tudi mutshigina gugujiyisa egi enya Yuda anyi akatugile gudi aye ha guza gudi esue, ahetshi gale gu Yelusalema. Adi mutunga luko dimbo edi, athu a mu dimbo edi ana khala athu abola nu alumbugi. Adi mumanesela gale gutunga ibayi, adi nji mulonda luko fondasio. 13 Fumu, tudi mutshigina nji ujiye egi gula amanesela gutunga luko dimbo edi, amanesela nji ibayi yenji, mbaashigo luko mufuta gitadi nga musomo; ngenyi makuta mbaakhadigo luko avula mukunda nu fumu.* 14 Luholo tuana heta lufuto luetu mu inzo ya fumu* ishigo ndaga yabonga mukunda nu esue ha gumona milonga ya fumu mubola, gishina giene tuatuma mukanda ha gujiyisa fumu, 15 hagula ajiya gukamba muabonga mu mukanda wa mene jia akhakh’aye. Mbawumona mu mukanda wene nu mbawujiya egi dimbo edi didi dimbo dia alumbugi, ana tshitshila mafumu nu baprovense ndaga jiabola, diakhalele nji nu athu akhalele mutuma athu ako ha gulumbuga mu tangua dikulu. Gishina giene dimbo diene diamuangewe. 16 Tudi mujiyisa fumu egi gula atunga luko dimbo edi nu amanesela nji ibayi yenji, mbawushigo luko muhinyina* mavu a ha Sambua dia Muta.”
17 Fumu watumile mbimbi gudi fumu Lehuma nu sekretere Shimishayi nu mafuta awo ako a mudimo anyi akhalele gu Samaliya nu gudi athu ako a mu mavu a ha Sambua dia Muta, wazuelele egi:
“Moyo wenu! 18 Mukanda muatutumidile watangewe* muabonga gu meso ami. 19 Ngatumile athu ha gukamba mu mikanda, amonele egi sendese mualeha dimbo diene diana khala nu athu ana lumbugila mafumu, athu akhalele mulumbuga nu guzola matululu guene. 20 Yelusalema yakhalele nu mafumu a ngolo akhalele muhinyina mu mavu agasue a ha Sambua dia Muta, athu akhalele mufuta gitadi nu guhana musomo gudi mafumu ene. 21 Henyaha mbenu mukhuala hagula athu ene abembe gutshita mudimo, ngenyi mbaashigo luko mutunga dimbo diene uu nu tangua mbanguahana njila. 22 Monesenu gutema, tshitenu diago ndaga eyi ngamiwambela hagula nga ndaga imoshi yabola ibuigo mu ufumu wami.
23 Tangua atangele mukanda wasonegele Fumu Aletakelesese gutuama dia Lehuma nu sekretere Shimishayi nu mafuta awo a mudimo, ayile muphushi gu Yelusalema gudi enya Yuda, a atunyishile gu ngolo ha gutshita mudimo. 24 Mu tangua diene mudimo wa gutunga inzo ya Nzambi yakhalele gu Yelusalema wabatugile; mutungila* wene wasalele ngenyi uu nu mu givo gia mbadi gia uhinyinyi wa Fumu Daliyuse wa gu Phelese.