Ngimbo
Lungimbo lua Davidi. Lungimbo lua wano wa gusendesa gukalegela inzo.
30 Oo Yehowa, mbangugutumbuisa handaga wanguzugishile;
wabembelego egi mbalagaji jiami jisuanguluge mukunda nu gubua guami.
2 Oo Yehowa Nzambi wami, ngadidile ha gugutoga ukuateshi, aye wangusagele.
3 Oo Yehowa, wanguzugishile mu Malumba.*
Wangubembele nu monyo; wangukuatesele hagula ngubuigo mu wina.*
4 Enue athu mudi ya gujinginyina gudi Yehowa, muyimbilenu ngimbo* ha gumutumbuisa,
tumbuisenu jina dienji dia gijila;
5 handaga gula muene wavila muthu khabu, yana khala mukunda nu tangua diazonda,
uvi gula wavila muthu khenda, yana khala mukunda nu monyo wenji wagasue.
Muthu wajiya gudila mu ngueze, uvi mu gimenegena gahetshi gusuanguluga.
6 Tangua ngakhalele mu guhuima, ngazuelele egi:
“Mbangunyigishiwago nga hazonda.”*
7 Oo Yehowa, tangua wakhalele musuanguluga nu ame, wangukolesele gifua mulundu.
Uvi tangua wangusuegele phala yaye, ngavuile woma.
8 Oo Yehowa, ngakhalele gugutamega;
Yehowa, ngakhalele gugububila ha gunguvila khenda.
9 Gubonga gudi gui gula ngafua, gula ngaya mu malumba?
Fuluguta dia mavu mbadigutumbuisa ba? Mbadiwambela athu luholo wana khala ya gujinginyina ba?
10 Oo Yehowa ngutegelele, nguvile khenda.
Oo Yehowa, ngukuatese.
11 Wabalumuna masaga ami, waabuisa ulumbu wa gusuanguluga;
wangukatula sagi ya ngombo, wangusudigisa gusuanguluga gifua milele ya wano,
12 hagula nguyimbe ngimbo ha gugutumbuisa, nguhenyigo nji tedie.
Oo Yehowa Nzambi wami, mbangugutumbuisa mayilago.