Ngimbo
Gudi mutuameji wa miziki. Lungimbo lua Davidi.
31 Oo Yehowa, ngana lengela gudi aye.
Ubembigo egi nguhanewe musonyi.
Nguhuluise handaga wana tshita ndaga mu luholo luabonga.
2 Haga kutshi,* ungutegelele.
Iza muphushi unguhuluise.
Bua mulundu wami wa gudisuegela,
fundo diakola ha gunguhuluisa.
3 Handaga udi seso diami, udi fundo diami dia gulengela;
mbawungutuameza mukunda nu jina diaye.
4 Mbawungukatula mu wanda athu angutele mu gisuegi,
handaga aye udi fundo diami dia gulengela.
5 Ngabemba nyuma yami ha mago aye.
Aye wangusumbi luko, Oo Yehowa, Nzambi wa giamatshidia.*
6 Ngana zumba ndo athu ana kombelela isongo ya githuhu,
uvi ame, ngana sha mutshima gudi Yehowa.
7 Mbangusuanguluga muavula mukunda nu guzumba guaye gua giamatshidia,
handaga wamonyi lamba diami;
aye mujiya muabonga gikenene giakola ngudi nagio.
8 Wanguhanelego ha mago a mbalagaji,
uvi wanguhagi ha fundo dia ubambi.
9 Oo Yehowa, nguvile khenda, handaga ngudi mu lamba.
Meso ami ahuila nu gudila mukunda nu gikenene, muila wagasue wanguleba.
10 Lujingu luami luahihia mukunda nu malamba,
ivo yami nji yahihia mukunda nu gumba isugu.
Ngolo jianguhua mukunda nu gubola guami;
mifiya yangubua lege-lege.
11 Mbalagaji jiami jiagasue jidi gungusegulula,
nu ene athu ngana jinga nawo hehi.
Athu ngana jiya adi muvua woma ha gusuena gudi ame;
gula angumona ha fundo dia athu avula, adi gungulenga.
12 Angubuitshile gale mutshima, angujimbidile gale gami gifua ngafile gale;
ngabua gifua bungu dia gubudiga.
13 Ngavui ndaga jiavula jiabola adi muzuela;
woma wakola wangukuata.
Adibungisa mukut’awo agasue ha gunguluisa,
aya giphungi ha gungushiya.
14 Oo Yehowa, ngudi gugushila mutshima.
Ngudi muzuela egi: “Udi Nzambi wami.”
15 Masugu* ami adi ha mago aye.
Nguhuluise ha mago a mbalagaji jiami nu ha mago a athu adi gungusagesa.
16 Monesela muenya mudimo waye gisemo.
Nguhuluise mukunda nu guzumba guaye gua giamatshidia.
17 Oo Yehowa, ubembigo egi nguhanewe musonyi tangua ngudi gugutamega.
Uvi athu abola ahanewe musonyi;
abulumuge tedie mu Malumba.*
18 Enya mambo amonyigo gima gia guzuela,
athu ana zuela nu lulendo nu lusegu mukunda nu athu abonga amonyigo gima gia guzuela.
19 Udi diago nu mutshima wabonga!
Wabambele ima yavula yabonga mukunda nu athu ana guguvila woma,
wamonesele mutshima wabonga gutuama dia athu agasue, mukunda nu athu ana lengela gudi aye.
20 Mbawaasuega gutuama diaye ha fundo dia gisuegi,
mbawaasuega gualeha hagula athu adi guayila giphungi a amonyigo;
mbawaasuega mu tshibu yaye
gualeha nu athu adi muzuela ndaga jiabola mukunda nu ene.
21 Yehowa atumbuishiwe,
handaga wangumonesele guzumba guenji gua giamatshidia mu luholo lua gushimana,
tangua ngakhalele mu dimbo dia gujietewa nu masuta.
22 Ngadigitshile mangololo, ngazuelele egi:
“Ngudi mufua gami gutuama diaye.”
Uvi aye wavile luholo ngakhalele mudila ha gugutoga ukuateshi.
23 Zumbenu Yehowa, enue athu agasue mudi ya gujinginyina gudi muene!
Yehowa wana bamba athu adi a gujinginyina,
uvi wana hana ndola yakola gudi enya lulendo.
24 Enue athu agasue mudi munengena Yehowa,
khalenu nu gikhesa nu ngolo.*