Ngimbo
Gudi mutuameji wa miziki; idi naye gushigiwa mu Yedutuna.* Lungimbo lua Davidi.
39 Mbangutema gu ndaga ngudi mutshita
hagula kano diami dizuedigo ndaga jiabola.
Mbangukanga kano diami*
hadi muthu wabola gutuama diami.
2 Ngazuelelego nga gima, ngakhalele tedie;
ngahenele tedie, ikhale mukunda nu ndaga yabonga,
uvi ngakhalele nu lamba diavula diago.
3 Tshuya tuakhalele gunguhia gu mutshima.
Tangua ngakhalele mutangiza, tshuya tualanduile gungubabula.
Gungima ngazuelele egi:
4 “Oo Yehowa, ngukuatese ha gujiya gisugishilo giami,
nu guvula gua masugu ami,
hagula ngujiye egi monyo wami udi diago wahihia.
5 Aye wazondesele masugu a monyo wami;
masugu a monyo wami adi azonda gutuama diaye.
Ikhale athu agasue adi mumonega gifua adi mu ubambi, uvi adi muhehe wa githuhu. (Sela)
6 Muthu wagasue udi muwenda gifua vule.
Udi mulaba guya nu guwenda.
Udi mututa umonyi, uvi gashigo mujiya gula mbawusalela nanyi.
7 Oo Yehowa, itshi ngajiya gudifelela?
Aye felela diami.
8 Nguhuluise mu gubola guami guagasue.
Ubembigo egi athu abola angusegulule.
9 Ngahenele tedie;
ngakangudilego kano diami.
Handaga aye wakalegele ndaga eji.
10 Katula malamba wanguhanyi.
Ndola wanguhanyi yangulebesa muila.
11 Wana hana muthu ndola ha gumubela mukunda nu gubola guenji;
wana bolesa ima yenji ya ndando gifua luholo imbimbila yana bolesa ima.
Yadiago, muthu wagasue udi muhehe wa githuhu. (Sela)
12 Oo Yehowa, tegelela gisambu giami,
vua luholo ngudi mudila ha gugutoga ukuateshi.
Ukitshigo gifua ushigo mumona luholo ngudi mubulula masoji.
Ame ngudi gami ngenji gutuama diaye,
ngudi gami mubalega* gifua muabalegele akhakh’ami agasue.
13 Ungutadigo nu khabu hagula ngajiya guheta gio gusuanguluga,
gutuama egi ngufue, ngutote gami.”