Ngimbo
Gudi mutuameji wa miziki. Lungimbo lua ana a Kora. Maskile.*
44 Oo Nzambi, esue hakhetu tuadividile,
akhakh’etu atutele jimene
jia ndaga wakalegele mu masugu awo,
mu masugu a mualeha.
2 Wakayele ifutshi mu ngolo* jiaye,
wahagele akhakh’etu mu mafundo awo.
Wabingile ifutshi, wayikayele.
3 Ishigo phogo yawo ya khusa yaakuatesele ha guzula gifutshi,
ishigo nji koko diawo diaakuatesele ha gubinga.
Uvi yakhalele koko diaye dia madia nu ngolo jiaye nu guhenya gua phala yaye,
handaga wasuangulugile nawo.
4 Udi Fumu wami, Oo Nzambi;
zuela hagula Yakoba abinge.*
5 Mbatukaya mbalagaji jietu mu ngolo jiaye;
mbatudiata mbalagaji jiana gutuluisa, handaga tuana gudifelela mu jina diaye.
6 Handaga ngana gudifelela ndo gu uta wami wa manana,
phogo yami ya khusa yajiyilego gunguhuluisa.
7 Idi aye watuhuluishile ha mago a mbalagaji jietu,
aye wahanele athu anyi anago gutuzumba musonyi.
8 Oo Nzambi, mbatugutumbuisa lusugu lua mudidi,
mbatutumbuisa jina diaye mayilago. (Sela)
9 Uvi henyaha watutuna, watuhana musonyi,
ushigo luko muya hamoshi nu masuta etu.
10 Udi mulandula gutulengesa gutuama dia mbalagaji jietu;
athu anago gutuzumba adi muzula ima yagasue atshigina.
11 Watuhana ha mago a mbalagaji hagula jitushiye gifua imeme;
watumuanga mukatshi dia ifutshi.
12 Wadiga athu aye mu ndando yaleba;
nu guheta gaye ndo nga gima.*
13 Watuhana musonyi gutuama dia athu tuana jinga nawo hehi,
athu agasue tuatunga nawo, adi gutusegulula nu adi gutushinga.
14 Watubuisa gifua gima gidi mulelewa* mukatshi dia ifutshi,
athu adi mukundula mito gutuama dietu ha gutulela.
15 Ngudi museguluishiwa lusugu lua mudidi,
musonyi wakola wangukuata,
16 mukunda nu matululu a gulela guawo nu mashingo awo,
handaga mbalagaji jietu jidi muvutula gubola.
17 Ndaga eji jiagasue jiatubuila, uvi esue tuagujimbidilego,
tuashiyilego nji gikotelo giaye.
18 Mitshima yetu yawungaganelego;*
malu etu akatugilego mu njila yaye.
19 Uvi aye wabembele egi tubingiwe ha fundo diana jinga kombe;
watutshuigile phipha ilabui.
20 Gula tuajimbidile jina dia Nzambi wetu,
nga ndo gula tuathuphuile mago etu gosa ha gukombelela nzambi wa gifutshi giko,
21 nga Nzambi gamonelego ndaga yene ba?
Muene wana jiya isuegi yagasue yana khala mu mitshima ya athu.
22 Tudi mushiyiwa lusugu lua mudidi handaga tuana gugukombelela;
adi gutumona gifua imeme idi mutshigina gushiyiwa.
23 Oo Yehowa, zuga. Mukunda natshi udi mulandula gubanda?
Zuga! Ututunyigo mayilago.
24 Mukunda natshi udi musuega phala yaye?
Mukunda natshi udi mujimbila malamba nu usageshi tudi mutagana nawo?
25 Handaga atubuisa mu mavu;
tuasala ya gubanda mu mavu.
26 Zuga, utukuatese!
Tuhuluise* mukunda nu guzumba guaye gua giamatshidia.