Ngimbo
Gudi mutuameji wa miziki. Idi naye gushigiwa mu “Lis.” Maskile* a ana a Kora. Lungimbo lua guzumba.
45 Mutshima wami udi nu gusuanguluga guavula mukunda nu ndaga imoshi yabonga.
Ngazuele egi: “Lungimbo luami ludi mukunda nu fumu.”
Ludimi luami lukhale gifua gilabi* gia muthu wana jiya gusonega muabonga.*
2 Aye udi diago wabonga gubalega mala agasue.
Mbimbi jiabonga jidi muzoga mu kano diaye.
Gishina giene Nzambi wa gushimbigile mayilago.
3 Kudiga phogo yaye ya khusa ha kete, Oo muenya ngolo,
mukunda nu lutumbu nu ginemua giaye.
4 Monesa egi udi nu lutumbu luavula, nda ubinge;
ngina ha gabalu gaye, nda ulue mukunda nu giamatshidia, nu gudibulumuisa nu ndaga jiabonga,
koko guaye gua madia mbagukalagala* ndaga jidi muhana woma.
5 Mifula yaye idi ya guviga muabonga, idi mubuisa athu gutuama diaye;
idi mukobola mitshima ya mbalagaji jia fumu.
6 Nzambi udi nguasa yaye ya ufumu mayilago;
aye udi nu muhango wa ufumu, mbawuhinyina nu giamatshidia.*
7 Aye wazumbile ndaga jiabonga, watunyile ndaga jiabola.
gishina giene Nzambi, Nzambi waye wagumbile maji a gusuanguluga gubalega mafumu ako.
8 Milele yaye yagasue idi muzola vumba dia mananashi a mire nu dia mutshi wa alowe nu wa kasia;
ima ya gushigila miziki idi nu shinga idi gugusuanguluisa
gu inzo yakoma ya ufumu ya mazo a ngiamba.*
9 Ana a akhetu a fumu adi mukatshi dia akhetu a lutumbu a mu inzo yaye.
Mukaji’a fumu* udi ya gumagana gu koko diaye dia madia, udi ya gudisembega wolo wa gu Ofile.
10 Oo mon’a mukhetu, tegelela, haga matshui aye uvue;
uwungulugago luko akuaku’aye nu fami ya sh’aye.
11 Gubonga guaye mbaguhana fumu nzala ya guguzumba,
handaga muene udi fumu waye,
shiwuga gutuama dienji.
12 Mona mukhetu wa gu Tile mbawuza nu kado;
mala adi nu umonyi wavula, mbaaza gugukamba hagula waatshigine.
13 Mun’a fumu wa mukhetu udi mu inzo ya ufumu,* udi wabonga diago;
milele yenji idi ya gusembega nu wolo.*
14 Mbaamubata gutuama dia fumu nu milele yatungiwe muabonga diago.*
Mafut’enji a tundongo adi gumulandula, mbaaza gutuama diaye.
15 Ene mbaabatewa nu gusuanguluga guavula;
mbaangina mu inzo ya fumu.
16 An’aye a mala mbahingana ha fundo dia akhakh’aye.
Mbawaabuisa mafumu ha mavu agasue.
17 Mbangujiyisa jina diaye mu indongo yagasue idi muza.
Gishina giene, athu mbaagutumbuisa mayilago.