Ngimbo
Gudi mutuameji wa miziki. Lungimbo lua ana a Kora. Ludi naye gushigiwa mu Alamote.*
46 Nzambi udi fundo dietu dia gulengela; udi nji ngolo jietu.
Muene wana khala hehi ha gutukuatesa mu tangua dia lamba.
2 Gishina giene, mbatushigo muvua woma, ngatshima mavu asombegesa,
ngatshima milundu yashiwuga ha jinga dia muta wakoma,
3 ngatshima muta wene wazala, wazola matshipha-tshipha akola,
ikhale milundu yadinyigisa mukunda nu matshipha-tshipha ene. (Sela)
4 Gudi nu muta umoshi, misalala yenji yana bata gusuanguluga mu dimbo dia Nzambi,
tabernakle yakoma ya gijila ya Nzambi wa Gudinyinyiga.
5 Nzambi udi mu dimbo; dimbo diene diajiyilego gubuishiwa.
Nzambi mbawuza mukuatesa dimbo diene mu gimenegena gia mutshiatshia.
6 Ifutshi yabuile tunga-tunga, mawufumu amuanganele;
muene wazuelele mu dijui diakola, mavu adinyigishile.
7 Yehowa Nzambi wa masuta udi nu esue;
Nzambi wa Yakoba udi fundo dietu diabonga dia gulengela. (Sela)
8 Izenu mumone midimo ya Yehowa,
ndaga jia gushimana jiakalegele muene ha mavu.
9 Muene udi mumanesela ita ha mavu.
Wabogola uta wa manana, wasasumuna mulumbu;
wakonda phusu-phusu jia ita* ha tshuya.
10 “Bembenu gulua ita, jiyenu egi ame ngudi Nzambi.
Mbangutumbuishiwa mukatshi dia ifutshi;
mbangutumbuishiwa ha mavu.”
11 Yehowa Nzambi wa masuta udi nu esue;
Nzambi wa Yakoba udi fundo dietu diabonga dia gulengela. (Sela)