Ngimbo
Gudi mutuameji wa miziki. Lungimbo lua ana Kora.
47 Enue athu agasue, bundenu mago.
Tumbuisenu Nzambi, mbenu milolo ya gusuanguluga.
2 Handaga Yehowa Nzambi wa Gudinyinyiga udi Nzambi wa gushimana;
udi Fumu wakoma ha mavu agasue.
3 Muene watukuatesa ha guhinyina ifutshi;
wahaga ifutshi goshi’a ikanzo yetu.
4 Muene watombele khapho mukunda nu esue,
khapho dinyi Yakoba munu Nzambi wana zumba muavula wana gudihalela. (Sela)
5 Nzambi wakanduga mukatshi dia milolo ya gusuanguluga;
Yehowa wakanduga mukatshi dia matululu a lumbinga.*
6 Yimbenu ngimbo* ha gutumbuisa Nzambi, yimbenu ngimbo.
Yimbenu ngimbo ha gutumbuisa Fumu wetu, yimbenu ngimbo.
7 Handaga Nzambi udi fumu wa ha mavu agasue;
yimbenu ngimbo, monesenu gutema.
8 Nzambi wabua Fumu wa ifutshi yagasue.
Nzambi udi ya gukhala ha nguasa yenji ya ufumu ya gijila.
9 Mafumu a athu adibungisa hamoshi
nu athu a Nzambi wa Abalahama.
Handaga atuameji* a ha mavu adi ha mago a Nzambi.
Muene udi muhanewa lutumbu luavula.