Ngimbo
Lungimbo lua Asafe.
50 Yehowa, Nzambi wa jinzambi* wazuela;
watamega athu a ha mavu agasue
sendese gu mazogelo a kumbi uu nu gu mayilo a kumbi.
2 Nzambi udi muhenya gifua muanya gu Siona, dimbo diabalega gubonga.
3 Nzambi wetu mbawuza, muene mbagashigo muhena tedie.
Tshuya tuana shididisa tudi gutuama dienji;
funji yakola idi mubunda mu khulo yenji.
4 Muene watamega dilu nu mavu ha gukhala mathemua hadi muene musophesa athu enji:
5 “Bungisenu athu ami a gujinginyina gutuama diami,
athu ana kota gikotelo nu ame mu njila ya mulambu.”
6 Dilu diana longesa gubonga guenji,
handaga Nzambi hakhenji udi nzuji. (Sela)
7 “Enue athu ami, tegelelenu, ngudi mutshigina guzuela;
aye Isalele, ngudi gugufunda.
Ame ngudi Nzambi, Nzambi waye.
8 Ngushigo gugubalela mukunda nu milambu yaye,
nga mukunda nu milambu yaye ya guwotshia yana khala gutuama diami tangua diagasue.
9 Ngushigo nu funu ya guzula ngombe ya mulume ya mu inzo yaye,
nga khombo* mu madinda aye.
10 Handaga shitu jiagasue jia mu gishitu jidi jiami,
nu jiene shitu jidi gu milundu yagasue.
11 Ngudi mujiya tunjila tuagasue tua gu milundu.
Shitu jiavula jia mu temu jidi jiami.
12 Gula nga ngakhalele nzala, nga ngaguwambelelego,
handaga mavu nu ima yagasue idi hene idi yami.
13 Ame ngana dia misunyi ya ngombe
nu gunua mahatshi a khombo ba?
14 Hana Nzambi mersi nu mutshima waye wagasue gifua mulambu,
tagenesa ndaga walayele Nzambi wa Gudinyinyiga.
15 Ngutamege mu tangua dia lamba.
Ame mbanguguhuluisa, ngenyi mbawungutumbuisa.”
16 Nzambi mbawuwambela muthu wabola egi:
“Nanyi wa guhanyi njila ya gutumbula mikhuala yami?
Mukunda natshi udi muzuela ndaga jiatadila gikotelo giami?
18 Gula wamona nzangi, aye udi musuanguluga n’enji,*
udi mulandula gukuata ufuta nu athu adi mutshita uthambi.
19 Kano diaye didi mumuanga ndaga jiabola,
udi mulandula gumba mambo.
20 Wakhala hashi, udi mufeta phangi’aye;
udi muzuelela gubola gua phangi’aye* muazogele n’enji vumo dimoshi.
21 Tangua wakalegele ndaga eji, ngahenele tedie,
wamonele gifua ame ngudi gifua aye.
Uvi henyaha ngudi gugubalela,
ngudi guguwambela gishina ngudi gugumonela gubola.
22 Enue athu muana jimbila Nzambi, tangizenu ndaga eyi,
gula ndo mbangumikalula, mbagukhadigo nga muthu wa gumihuluisa.
23 Muthu udi gunguhana mersi nu mutshima wenji wagasue gifua mulambu, udi gungutumbuisa;
muthu udi mulandula gukalagala ndaga jiabonga,
mbawumona luholo mbangumuhuluisa.”