Ngimbo
MUKANDA WA THOMO
(Ngimbo 1-41)
1 Gusuanguluga gudi nu muthu gashigo mulandula malongo a athu abola,
munu gashigo mulandula njila jia athu abola
nu gashigo mukhala hamoshi nu athu ana segulula ndaga jiabonga.
2 Uvi wana suanguluga nu mukhuala wa Yehowa,
wana tanga mukhuala wene mu dijui dia hashi* phipha nu muanya.
3 Muene mbawukhala gifua mutshi wakunyiwe mu khulo ya muta,
mutshi udi muhaga mabundu mu sungi yenji,
mayiji enji ana migina ndo.
Muene mbawubinga mu ndaga jiagasue jidi mutshita muene.
4 Uvi athu abola ana khala ndo ngenyi,
ana khala gifua isusu idi muhehumuga gu funji.
5 Gishina giene athu abola mbaashigo mubinga tangua mbaasophesewa;
enya gubola mbaashigo mumagana mukatshi dia athu abonga.
6 Handaga Yehowa wana jiya muabonga njila ya athu abonga,
uvi njila ya athu abola mbayitota.