Ngimbo
Gudi mutuameji wa miziki. Idi naye gushigiwa mu “Ubolesago.” Mikitame* ya Davidi, tangua diayile gudisuega muene mu wina dia seso ha gulenga Saula.
57 Nguvile khenda, Oo Nzambi, nguvile khenda,
handaga ngana lengela gudi aye,
ngana gudisuega mu vule dia mahambu aye uu nu tangua lamba diana hua.
2 Ngana tamega Nzambi wa Gudinyinyiga,
ngana tamega Nzambi wa giamatshidia, muene wana manesela malamba ami.
3 Nzambi mu dilu mbawungukuatesa nu mbawunguhuluisa.
Muene mbawubuisa muthu udi mukamba gungukuata tunga-tunga. (Sela)
Nzambi mbawungumonesela guzumba guenji gua giamatshidia nu mbawukhala ya gujinginyina.
4 Khoshi jiangujieta;
ikhale tangua ngudi ya gubanda, ngudi mukatshi dia athu adi mutshigina gungukalula,
mazo awo adi gifua milumbu nu mifula,
madimi awo adi gifua phogo ya khusa ya guviga.
5 Oo Nzambi, dijiga gukoma guaye mu dilu;
lutumbu luaye lukhale ha mavu agasue.
6 Angutela wanda hagula malu ami akuatagane;
malamba angulebesa diago muila,
ene ahaga wina gutuama diami,
uvi ene hakhawo abua mu wina diene. (Sela)
7 Oo Nzambi, ngudi ya gujinginyina gudi aye,
ngudi ya gujinginyina.
Mbanguyimba ngimbo nu mbangushiga miziki.
8 Lutumbu luami, zuga!
Zuga, Oo gima gia gushigila miziki gidi nu shinga; aye gitare* nji zuga.
Mbanguzuga nu gimenegena gia mutshiatshia.
9 Oo Yehowa, mbangugutumbuisa mukatshi dia athu;
mbanguyimba ngimbo* ha gugutumbuisa mukatshi dia ifutshi.
10 Handaga guzumba guaye gua giamatshidia gudi guavula,
gudi muheta uu nu mu dilu.
Gujinginyina guaye gudi mukanduga uu nu mu matuta.
11 Oo Nzambi, dijiga gukoma guaye mu dilu;
lutumbu luaye lukhale ha mavu agasue.