Ngimbo
Gudi mutuameji wa miziki. Idi naye gushigiwa mu “Ubolesago.” Mikitame* ya Davidi.
58 Luholo lutshi muajiya guzuela ndaga jiabonga ha mudi muhena tedie?
Enue ana a athu, muajiya gusophesa nu giamatshidia ba?
2 Enue mudi mukota ndaga jiabola mu mitshima yenu,
mago enu adi mumuanga ndaga jia khuta mu gifutshi.
3 Athu abola ana khala nu gubola sendese tangua ana vualewa;*
ana khala mbundudi nu enya mambo sendese tangua avualewe.
4 Ene adi nu malengo-lengo gifua malengo-lengo a nyoga;
adi ifua matshui gifua kobra yashita matshui enji.
5 Yene yajiyilego guvua dijui dia enya ilumbe-lumbe,
ikhale adi nu wanga wa luholo lutshi.
6 Oo Nzambi, abogole mazo!
Oo Yehowa, muanga mbanga jia khoshi eji!*
7 Ene atote gifua muana migina meya.
Nzambi anane uta wenji wa manana, a abuise nu mifula yenji.
8 Ene abue gifua khole idi muya nu guzola meya hadi yene muwenda;
gifua mona wafila mu vumo munu mbagashigo mumona tangua.
9 Gutuama egi nzungu jienu jikuate tshuya tua tumitshi tua miya,
Nzambi mbawuhehumuna tumitshi tuene, ikhale tua gibisu nga tunu tuahi gale,
gifua muana tshita funji yakola.
10 Muthu wabonga mbawusuanguluga tangua mbadimona muene Nzambi muvutula gubola;
muene mbawuweva ikanzo yenji mu mahatshi a athu abola.
11 Athu mbaazuela egi: “Yadiago, athu abonga ana heta lufuto.
Gudi diago nu Nzambi wana sophesa ha mavu.”