Ngimbo
Gudi mutuameji wa miziki; idi naye gushigiwa mu Yedutuna.* Lungimbo lua Davidi.
62 Ngana nengenena Nzambi nu guhuiminyina guagasue,
muene udi muhuluishi wami.
2 Yadiago, muene udi seso diami, muhuluishi wami nu fundo diami diabonga dia gulengela;
ame mbangushigo munyigishiwa mangololo nga hazonda.
3 Uu nu tangua ditshi mbamulandula guluisa muthu ha gumushiya?
Mukut’enu agasue mudi gifua gibayi giazendelela, gifua gibayi gia maseso gidi mutshigina gubuzumuga.*
4 Mukut’awo agasue ana gudivua ha gumukatula ha fundo dienji dia lutumbu;*
ana suanguluga gumba mambo.
Ana shimbiga athu nu makano awo, uvi mu mitshima yawo ana guata mikumbu. (Sela)
5 Ngana nengenena Nzambi nu guhuiminyina guagasue,
handaga muene udi felela diami.
6 Yadiago, muene udi seso diami, muhuluishi wami nu fundo diami diabonga dia gulengela;
ame mbangushigo munyigishiwa nga hazonda.
7 Uhuluishi nu lutumbu luami luana katuga gudi Nzambi.
Muene udi seso diami diakola nu fundo diami dia gulengela.
8 Enue athu, khalenu gumushila mutshima tangua diagasue.
Mukangudilenu mitshima yenu.
Nzambi udi fundo dietu dia gulengela. (Sela)
9 Ana a athu adi gifua muhehe wa githuhu,
ana a athu ashigo athu a gushila mutshima.
Gula mukut’awo agasue ahagewa holu dia kilo, adi lelu gubalega nu wene muhehe wazonda.
10 Mutangizago egi muajiya gubua nu umonyi gula mudi muzula ima ya athu gu ngolo.
Mulabigo gudifelela ha guheta ima mu unzangi.
Gula muabua nu umonyi wavula, muwushilago mutshima.
11 Nzambi wazuelele mbala ya thomo, mu mbala ya mbadi ngavile ndaga eyi:
Ngolo jiana katuga gudi Nzambi.
12 Oo Yehowa, guzumba gua giamatshidia gudi nji guaye,
handaga wana futa muthu wagasue gifua mudi makalegelo enji.