Ngimbo
Lungimbo lua Davidi, tangua diakhalele muene mu mavu a luselenga a gu Yuda.
63 Oo Nzambi, aye udi Nzambi wami, ngudi mulandula gugukamba.
Ngudi diago nu funu yaye gifua luholo muthu wana vua luhungu* lua meya.
Muila wanguleba handaga ngudi diago muvua nzala yaye
mu mavu alandu, a gimigina fundo dishigo nu meya.
2 Hene ngagutalele ha fundo dia gijila;
ngamonele ngolo jiaye nu lutumbu luaye.
3 Kano guami mbagugutumbuisa,
handaga guzumba guaye gua giamatshidia gudi guabonga gubalega monyo.
4 Hene, mbangugutumbuisa monyo wami wagasue;
mbanguthuphula mago ami ha gukombelela mu jina diaye.
5 Ngakutshile, handaga wanguhanele ima yabalega gubonga,*
hene kano diami mbadigutumbuisa nu gusuanguluga guagasue.
6 Ngana guguwunguluga tangua ngana khala ha gitanda;
ngana gugutangigiza mu tangua dia gukengelela mu phipha
7 handaga udi mukuateshi wami,
ngudi mumba milolo ya gusuanguluga mu vule dia mahambu aye.
8 Ngudi ya gujinginyina gudi aye;
koko diaye dia madia diangukuata tenyi.
9 Uvi athu adi mukamba gungushiya
mbaabulumuga goshi’a mavu.
10 Ene mbaashiyiwa gu phogo ya khusa;
mbaabua ima ya gudia mukunda nu makombe.*
11 Uvi fumu mbawusuanguluga mukunda nu Nzambi.
Muthu wagasue udi gudiloga mu jina dia Nzambi mbawudihala,
handaga makano a athu ana mba mambo mbaakangewa.