Ngimbo
71 Oo Yehowa, ngana lengela gudi aye.
Ubembigo egi nguhanewe musonyi.
2 Nguhuluise, ngukatule mu lamba handaga udi Nzambi wabonga.
Sha kutshi ungutegelele,* unguhuluise.
3 Bua seso diami dia gulengela,
fundo ngajiya gungina tangua diagasue.
Tuma muthu anguhuluise,
handaga udi seso diami, fundo diami dia gulengela.
4 Oo Nzambi wami, nguhuluise ha mago a muthu wabola,
ha mago a muthu wabola udi gungumonesa lamba.
5 Handaga udi felela diami, Oo Yehowa Fumu Wabalega Gukoma;
ngana gugushila mutshima sendese ulenge wami.
6 Ngana gugushila mutshima sendese tangua ngavualewe;
aye wanguzolele mu vumo dia mama.
Ngana gugutumbuisa tangua diagasue.
7 Athu avula adihudile tangua amonele ndaga jiangubuidile,
uvi aye udi fundo diami diakola dia gulengela.
8 Lusugu lua mudidi kano guami mbaguzuelela
lutumbu luaye nu gubonga guaye.
9 Ungutunyigo tangua ngabua muthu wa gukola;
ungubembigo tangua ngolo jianguhua.
10 Mbalagaji jiami jidi muzuela ndaga jiabola mukunda nu ame,
athu adi mukamba gungushiya,* adi gunguyila giphungi,
11 adi muzuela egi: “Nzambi wamutunyile gale genji.
Tumulandulenu, tumukuate, handaga gushigo nu muthu wa gumuhuluisa.”
12 Oo Nzambi, ukhadigo gualeha nu ame.
Nzambi wami, iza muphushi ungukuatese.
13 Athu adi gunguluisa
ahanewe musonyi, afue.
Athu adi gungumonesa malamba
aseguluishiwe, avuishiwe musonyi.
14 Uvi ame, mbangulandula gunengenena;
mbangulandula gugutumbuisa.
15 Kano diami mbadizuelela ndaga jiaye jiabonga,
lusugu lua mudidi mbanguzuelela ndaga wana tshita ha guhuluisa athu.
Ngatshima jidi jiavula ha gujitanga.
16 Mbanguza, mbanguwambela athu ndaga wakalegele nu ngolo jiaye jiavula,
Oo Yehowa Fumu Wabalega Gukoma;
mbanguzuelela phamba gubonga guaye.
17 Oo Nzambi, wangulongesele sendese ulenge wami,
uu nu mangino ngudi mulandula guwambela athu midimo yaye ya gushimana.
18 Oo Nzambi, ungubembigo, ngatshima ngakola gami nu jinvi jianguzoga.
Ngukuatese hagula nguwambele gindongo gidi muza ndaga jiatadila ngolo* jiaye,
nu ha guwambela athu agasue adi muza gungima ndaga jiatadila ngolo jiaye.
19 Oo Nzambi, gubonga guaye gudi mukanduga uu nu gosa;
aye wakalegele ndaga jiakoma;
Oo Nzambi, nanyi udi gifua aye?
20 Ngatshima watshitshi egi ngumone malamba avula,
uvi nguhane luko ngolo;
nguzole mu wina dialeha.
21 Ngubuise luko muthu wakoma,
ngubambe, nguwalagane.
22 Ngenyi mbangugutumbuisa nu gima gia gushigila miziki gidi nu shinga
handaga aye udi Nzambi wa gujinginyina, Oo Nzambi wami.
23 Kano diami mbadimba milolo ya gusuanguluga tangua mbangugutumbuisa nu ngimbo,
handaga wahuluishile monyo wami.*
24 Kano diami mbadizuelela gubonga guaye lusugu lua mudidi,
handaga athu adi mukamba gungubatela malamba mbaahanewa musonyi nu mbaaseguluishiwa.