Ngimbo
Gisambu gia Davidi.
86 Oo Yehowa, haga kutshi ungutegelele, nguhane mvutu,
handaga ngudi mumona lamba, ngudi phutu.
2 Bamba monyo wami, handaga ngudi ya gujinginyina gudi aye.
Huluisa muenya mudimo waye munu wana gugushila mutshima,
handaga udi Nzambi wami.
3 Oo Yehowa nguvile khenda,
handaga ngudi gugutamega lusugu lua mudidi.
4 Suanguluisa muenya mudimo waye,
handaga ngana gugushila mutshima, Oo Yehowa.
5 Handaga wana khala nu mutshima wabonga, wana khala hehi ha gutotesela athu, Oo Yehowa;
wana monesa guzumba gua giamatshidia gudi athu agasue ana gugutamega.
6 Oo Yehowa, tegelela gisambu giami;
tegelela muabonga luholo ngudi gugububila ha gutoga ukuateshi.
7 Ngudi gugutamega mu tangua ngudi mu lamba,
handaga mbawunguhana mvutu.
8 Gushigo nga nu nzambi mumoshi udi gifua aye, Oo Yehowa,
gushigo nu midimo iko idi gifua midimo yaye.
9 Ifutshi yagasue wafugile
mbayiza mufugama gutuama diaye, Oo Yehowa,
mbayitumbuisa jina diaye.
10 Handaga aye udi Nzambi wakoma, wana tshita ndaga jia gushimana;
phamba aye udi Nzambi.
11 Oo Yehowa, ngulongese njila yaye.
Mbanguwenda mu giamatshidia giaye.
Ngukuatese ha gukhala nu mutshima umoshi, hagula nguvile jina diaye woma.
12 Oo Yehowa Nzambi wami, ngudi gugutumbuisa nu mutshima wami wagasue,
mbangutumbuisa jina diaye mayilago,
13 Handaga guzumba guaye gua giamatshidia mukunda nu ame gudi guavula,
wanguhuluishile hagula nguyigo mu Malumba.*
14 Oo Nzambi, enya lulendo azuga ha gunguluisa;
thundu ya enya khuta idi mukamba gungushiya,
ene ashigo gugunemesa.*
15 Uvi aye, Oo Yehowa, udi Nzambi wazala pha nu khenda nu gisemo,
wana guvua ndo khabu muphushi, wazala pha nu guzumba gua giamatshidia, wana khala ya gujinginyina.*
16 Balumuga ungutale, nguvile khenda.
Hana muenya mudimo waye ngolo,
huluisa mun’a muenya mudimo waye wa mukhetu.
17 Nguhane gijiyishilo gidi mumonesa gubonga guaye,
hagula athu anyi anago gunguzumba agimone, avue musonyi.
Handaga aye udi mukuateshi nu muwalaganyi wami, Oo Yehowa.