Ngimbo
96 Yimbilenu Yehowa lungimbo luhe-luhe.
Enue athu agasue a ha mavu yimbilenu Yehowa!
2 Yimbilenu Yehowa, tumbuisenu jina dienji.
Lusugu nu lusugu longesenu lukuma luabonga lua ndaga jiana kalagala muene ha guhuluisa athu.
3 Longesenu lutumbu luenji mukatshi dia ifutshi,
midimo yenji ya gushimana mukatshi dia athu agasue.
4 Yehowa udi wakoma, udi nji watagana ha guheta lutumbu luagasue.
Athu adi naye gumuvuila woma wavula gubalega nzambi jiko jiagasue.
5 Nzambi jiagasue jia athu jidi nzambi jia githuhu,
uvi Yehowa muene wafugile dilu.
6 Gukoma* nu lutumbu luana gumujieta,
ngolo nu gubonga guana khala ha fundo dienji dia gijila.
7 Enue fami jiagasue jia ha mavu, tumbuisenu Yehowa,
tumbuisenu Yehowa mukunda nu lutumbu luenji nu ngolo jienji.
8 Hanenu Yehowa lutumbu ludi naye guheta muene mukunda nu jina dienji;
batenu musomo, zenu mu ibanzala yenji.
9 Fugamenu gutuama dia* Yehowa nu milele ya gijila.*
Athu agasue a ha mavu adigite gutuama dienji!
10 Wambelenu ifutshi egi: “Yehowa wabua Fumu!
Mavu* ajigamesewe muabonga, ajiyilego gunyigishiwa.
Muene mbawusophesa athu* nu giamatshidia.
11 Dilu disuanguluge, mavu akhale nji nu gusuanguluga;
kianga nu ima idi ya guzala muene inume;
12 matemu nu ima yagasue idi muene isuanguluge.
Mu tangua diene dimoshi, mitshi ya mu gishitu imbe milolo ya gusuanguluga
13 gutuama dia Yehowa, handaga muene udi muza,*
udi muza ha gusophesa mavu.
Muene mbawusophesa mavu* mu luholo luabonga,
mbawusophesa nji athu nu gujinginyina guagasue.