Ngimbo
MUKANDA WA THANO
(Ngimbo 107-150)
107 Hanenu Yehowa mersi, handaga muene udi wabonga;
guzumba guenji gua giamatshidia guana khala mayilago.
2 Athu anyi Yehowa wahuluishile* azuele ngenyi,
athu ahuluishile muene ha mago a mbalagaji,
3 athu abungishile muene, anyi azolele muene mu ifutshi,
sendese gu khanda ya mazogelo a kumbi uu nu gu mayilo a kumbi,
sendese gu nord uu nu gu sud.
4 Awungaganele mu mavu a luselenga,
ahetelego njila ya guya mu dimbo dinyi akhalele naye gukhala.
5 Akhalele nu nzala nu luhungu lua meya;
abandele gufua mukunda nu guhuila.
6 Alanduile gudidila Yehowa mu tangua dia lamba;
muene waakuatesele mu lamba diene.
7 Muene waatuamezele mu njila yabonga
ha guya mu dimbo akhalele naye gujinga.
8 Athu ahane Yehowa mersi mukunda nu guzumba guenji gua giamatshidia
nu mukunda nu midimo yenji ya gushimana yana kalagala muene mukunda nu ana a athu.
9 Muene wahanele meya gudi muthu wakhalele nu luhungu,*
wahanele ima yabonga ya gudia gudi muthu wakhalele nzala.
10 Athu ako akhalele mujinga mu phipha yakola,
akhalele mumona malamba mu bologo, akhalele ya gujitshiga malenge.
11 Handaga ene atumagelego mbimbi ya Nzambi,
anemeselego malongo a Nzambi wa Gudinyinyiga.
12 Muene waahanele musonyi tangua diaabembele muene ha gumona malamba;
akhakhugile, guakhalelego nga nu muthu ya guakuatesa.
13 Ene atamegele Yehowa ha guakuatesa mu tangua dia lamba;
muene waakuatesele mu lamba diene.
14 Muene waazolele mu phipha yakola,
wabatuile malenge awo.
15 Athu ahane Yehowa mersi mukunda nu guzumba guenji gua giamatshidia
nu mukunda nu midimo yenji ya gushimana yana kalagala muene mukunda nu ana a athu.
16 Handaga muene wamuangele ijidigo ya kuivre,
wabatuile nji ima ya utadi ya gukangela mifulo.
17 Athu ene akhalele aheya, amonele nji malamba
mukunda nu gubola nu gujimbila guawo.
18 Nzala ya ima yagasue ya gudia yaatotele;
abendele gufua.*
19 Ene atamegele Yehowa ha guakuatesa mu tangua dia lamba;
muene waakuatesele mu lamba diene.
20 Watumile mbimbi yenji, waasagele;
waahuluishile mu mawina aleha, fundo abuile.
21 Athu ahane Yehowa mersi mukunda nu guzumba guenji gua giamatshidia
nu mukunda nu midimo yenji ya gushimana yana kalagala muene mukunda nu ana a athu.
22 Ene ahane milambu ya guhana Nzambi mersi,
alongese midimo yenji nu milolo ya gusuanguluga.
23 Athu anyi ana wenda mu masuwa mu kianga,
anyi ana tshita mungenda holu dia mita yakoma,
24 amonele midimo ya Yehowa,
amonele ima ya gushimana yafugile muene mu kianga;
25 nu luholo gikudi giakola giazugile mu njila ya mbimbi yenji,
ginyi giathuphudile matshipha-tshipha a mu kianga.
26 Matshipha-tshipha athuphula athu ana wenda mu masuwa,
gungima a ashigula uu nu ha jinga.
Ashigo luko nu gikhesa mukunda nu malamba adi mutshigina guabuila.
27 Gu meso guaajieta, adi muya nu gukhakhuga gifua muthu wakuatewa matombe,
ndunge jiawo jiagasue jishigo guakuatesa nga gu gima gimoshi.
28 Hene adi mudidila Yehowa mu tangua dia lamba;
muene waakuatesa mu lamba diene.
29 Muene wahenesa gikudi giakola;
matshipha-tshipha a kianga ahena tedie.
30 Asuanguluga luholo guhuima guangina,
muene waabata uu nu gu mbungu yago adi mutshigina.
31 Athu ahane Yehowa mersi mukunda nu guzumba guenji gua giamatshidia
nu mukunda nu midimo yenji ya gushimana yana kalagala muene mukunda nu ana a athu.
32 Ene amutumbuise mukatshi dia athu avula,*
amutumbuise mukatshi dia akulu.
33 Muene wamiginyisa mita, yabua mavu a luselenga,
wamiginyisa nji ito ya mita,
34 muene wabalumuna mavu a mbuto, abua mavu a mungua,
mukunda nu gubola gua athu adi mu mavu ene.
35 Muene wabuisa mavu a luselenga, ijiba ya meya,*
mavu agimigina abua ito ya mita.
36 Muene wahaga athu anyi adi nzala ha gukhala guene,
hagula ajiya gutunga dimbo adi naye gukhala.
37 Akuna mbuto mu mahia, adima nji ilanga ya vinyo,
yazola mbuto jiavula.
38 Muene waashimbiga, hene adivudisa muavula;
gashigo mubemba egi mutango wa ngombe jiawo uzonde.
39 Uvi ene azonda luko, ahanewa musonyi
mukunda nu usageshi, nu lamba nu gikenene.
40 Muene wasegulula manene,
waawunganesa mu mavu a luselenga ashigo nu njila.
41 Uvi wahuluisa phutu* gudi athu adi guasagesa,
wavudisa fami jiawo gifua hunji dia shitu.
42 Athu abonga ana suanguluga tangua ana mona ndaga yene;
uvi athu abola ana kanga makano awo.
43 Muthu wagasue udi watema mbawutangiza ndaga jiene,
mbawutadila muabonga ndaga jiana tshita Yehowa nu guzumba gua giamatshidia.