Ngimbo
Lungimbo lua Davidi.
108 Oo Nzambi, ngudi ya gujinginyina gudi aye,
mbanguyimba ngimbo nu mbangushiga miziki nu mutshima wami wagasue.
2 Zuga, Oo gima gia gushigila miziki gidi nu shinga; aye gitare* nji zuga.
Mbanguzuga nu gimenegena gia mutshiatshia.
3 Oo Yehowa, mbangugutumbuisa mukatshi dia athu;
mbanguyimba nji ngimbo* ha gugutumbuisa mukatshi dia ifutshi.
4 Handaga guzumba guaye gua giamatshidia gudi guavula,
gudi muheta uu nu mu dilu.
Gujinginyina guaye gudi mukanduga uu nu mu matuta.
5 Oo Nzambi, dijiga gukoma guaye mu dilu;
lutumbu luaye lukhale ha mavu agasue.
6 Hagula athu aye wana zumba ahuluge,
tuhuluise nu koko diaye dia madia, nguhane mvutu.
7 Nzambi wa Gijila wazuelele egi:*
“Mbanguditumbuisa, mbanguhana Shekeme gudi athu ami gifua khapho,
mbanguthesa baba* dia Sukote.
8 Mavu a Gileade nu a Manase adi ami,
Efrayime udi gifulu* giami gia guhaga gu muto;
Yuda udi muhango wami wa ufumu.
9 Moaba udi longa diami dia guzuila meya.
Mbangubishila saphata jiami gu Edome.
Mbangumba milolo ya gubinga gu Filistiya.
10 Nanyi mbawungubata mu dimbo didi nu ibayi yakola?
Nanyi mbawungutuameza uu nu gu Edome?
11 Oo Nzambi, ishigo aye watutunyile ba?
Aye Nzambi wetu, wanaya ndo luko nu masuta etu.
12 Tukuatese mu malamba etu,
handaga ishigo nu ndando ha gudifelela egi mun’a muthu atuhuluise.
13 Nzambi wetu mbawutuhana ngolo,
muene mbawudiata mbalagaji jietu.