Ngimbo
Gudi mutuameji wa miziki. Lungimbo lua Davidi.
109 Oo Nzambi, aye ngana tumbuisa, uhenyigo tedie.
2 Handaga athu abola nu enya mulebo adi muzuela ndaga jiabola mukunda nu ame.
Adi gungumbila mambo;
3 angujieta, adi muzuela ndaga jiabola mukunda nu ame,
adi mulaba gunguluisa.
4 Ame ngudi guazumba, uvi ene adi gunguluisa;
ngudi mulandula gukombelela.
5 Ngaakalegele ndaga jiabonga uvi ene angukalegela ndaga jiabola,
ngaazumbile uvi ene anguhagela umbalagaji.
6 Tomba muthu wabola ha guhinyina mbalagaji wami;
muluishi amagane gu koko dienji dia madia.
7 Tangua adi gumusophesa, amufuise milonga;
nu giene gisambu gienji gimonewe gifua disumu.
8 Masugu a monyo wenji azondesewe;
muthu muko azule ginemo gienji gia gutuameza.
9 An’enji abue ana a shiye,
mukaji’enji abue mukhetu wa gafunda.
10 An’enji* aye nu guwungagana, aye nu gulomba ima,
aye nu gukamba ima ya gudia gualeha nu ibombo yawo ya jinzo.
11 Muthu wamusombele makuta, amutambule ima yenji yagasue,
ngenji jize jitute ikumba yenji.
12 Nga muthu mumoshi gamumoneselago gisemo,*
nga muthu mumoshi gavilago ana a shiye anyi mbaabemba muene khenda.
13 Ajigulu enji ashiyiwe;
majina awo amuangewe, hagula gindongo gidi muza giawungulugago.
14 Yehowa awunguluge gubola gua akhakh’enji,
muene gajimbilago gubola gua gin’enji.
15 Yehowa alandule guwunguluga ndaga jiakalagala ene;
atotese majina awo ha mavu.
16 Handaga muene gatangijilego ha gumonesela athu gisemo,*
uvi wakhalele muhata muthu udi mu lamba, nu phutu nu muthu udi nu gikenene mu mutshima
ha gumushiya.
17 Wakhalele muzumba guta athu mikumbu, hene mikumbu yamutewa;
gakhalelego mutshigina gushimbiga athu, hene atuna nji gumushimbiga.
18 Muene wasudigile mikumbu gifua mulele.
Yamubundugile mu muila gifua meya,
yamubundugile mu mifiya gifua maji.
19 Mikumbu yenji ikhale gifua mulele waditshuigi muene,
gifua mukaba wana sudiga muene tangua diagasue.
20 Luene lufuto Yehowa mbawuhana muthu udi gunguluisa
nu athu ana zuela ndaga jiabola mukunda nu ame.
21 Uvi aye, Oo Yehowa Fumu wabalega gukoma,
ngukalegele ndaga jiabonga mukunda nu jina diaye.
Nguhuluise, handaga guzumba guaye gua giamatshidia gudi guabonga.
22 Handaga ame ngushigo nu mukuateshi, ngudi phutu,
mutshima wami wabatudiwa itshinyi-itshinyi.
23 Ngudi muya nu gutota mage-mage gifua muana tota vule;
ngabua gifua tulu didi munyigishiwa ha gukatudiwa gu mulele.
24 Mabongo angubua legelege, handaga ngudi mutuna gudia mukunda nu gukombelela;
ngabua ifiya-ifiya, ngakhuwa.
25 Ngabua gifua gima giawo gia gusegulula.
Adi mukundula mito yawo tangua adi gungumona.
26 Oo Yehowa Nzambi wami, ngukuatese,
ngumonesele guzumba guaye gua giamatshidia, nguhuluise.
27 Ngenyi ene mbaajiya egi koko diaye diaahuluishile;
Oo Yehowa, mbaajiya egi aye wakalagala ndaga yene.
28 Ene ate gawo mikumbu, uvi aye ngushimbige.
Avuishiwe musonyi tangua adi muza ha gunguluisa,
uvi muenya mudimo waye akhale nu gusuanguluga.
29 Athu adi gunguluisa aseguluishiwe;
musonyi waatshuige gifua luholo lopho* diana tshuiga muila.
30 Kano diami mbaditumbuisa Yehowa nu gikhesa giagasue;
mbangumutumbuisa gutuama dia athu avula.
31 Handaga muene mbawumagana gu koko dia madia dia muthu udi phutu
ha gumuhuluisa gudi athu adi gumufuisa milonga.