Ngimbo
115 Ututumbuisago, Oo Yehowa, utuhanyigo lutumbu,*
uvi tumbuisa jina diaye
mukunda nu guzumba guaye gua giamatshidia nu gujinginyina guaye.
2 Mukunda natshi ifutshi idi naye guzuela egi:
“Nzambi wawo udi gui?”
3 Nzambi wetu udi mu dilu;
wana kalagala ndaga yagasue yana gumusuanguluisa.
4 Ikhokho yawo yalondewe nu utadi wa siliva nu wolo,
idi ima yalondele athu nu mago.
5 Yana khala nu kano, uvi yajiyilego guzuela;
yana khala nu meso, uvi yajiyilego gumona;
6 yana khala nu matshui, uvi yajiyilego guvua;
yana khala nu mazulu, uvi yajiyilego guvua vumba;
7 yana khala nu mago, uvi yajiyilego gukuata gima;
yana khala nu malu, uvi yajiyilego guwenda;
yajiyilego guzola dijui ha miminyo yayo.
8 Athu anyi ana guyilonda mbaabua gifua yene,
nu ene athu agasue ana guyishila mutshima.
9 Oo Isalele, shilenu Yehowa mutshima
—muene udi mukuateshi wenu nu tshibu yenu.
10 Oo inzo ya Alona, shilenu Yehowa mutshima
—muene udi mukuateshi wenu nu tshibu yenu.
11 Enue athu muana vila Yehowa woma, shilenu Yehowa mutshima
—muene udi mukuateshi wenu nu tshibu yenu.
12 Yehowa wana gutuwunguluga nu mbawutushimbiga;
muene mbawushimbiga inzo ya Isalele;
mbawushimbiga inzo ya Alona.
13 Yehowa mbawushimbiga athu ana gumuvila woma,
athu azonda nu athu akoma.
14 Yehowa mbawumivudisa,
enue nu an’enu.*
15 Yehowa amishimbige,
muene mufugi wa dilu nu mavu.
16 Dilu didi diangane dia Yehowa,
uvi mavu, waahanele gudi ana a athu.
17 Athu a gufua ana tumbuisa ndo Yah;
nga ene anyi ana bulumuga mu malumba.*
18 Uvi esue mbatutumbuisa Yah
sendese mangino uu mayilago.
Tumbuisenu Yah.*