Ngimbo
116 Ngana zumba Yehowa
handaga wana vua dijui diami, luholo ngana gumukombelela ha gumutoga ukuateshi.
2 Handaga wana haga kutshi dienji* gudi ame ha gungutegelela,
mbangumukombelela mu monyo wami wagasue.*
3 Shinga jia gufua jiangulangele;
malumba angukuatele.*
Gikenene nu malamba angulebesele muila.
4 Uvi ngakombelele mu jina dia Yehowa egi:
“Oo Yehowa, nguhuluise!”*
5 Yehowa udi Nzambi wa khenda nu wabonga;
Nzambi wetu udi Nzambi wa gisemo.
6 Yehowa wana bamba athu ashigo nu ndunge.
Ngakhalele ya guleba, uvi muene wanguhuluishile.
7 Monyo* wami uhuluguge luko,
handaga Yehowa wangukalegela ndaga nu gisemo.
8 Wanguhuluishile* gu gufua,
wangukukumuine masoji gu meso, wabambele kulu diami hagula dikhakhugago.
9 Mbanguwenda gutuama dia Yehowa mu gifutshi gia athu a monyo.
10 Ngakhalele nu gutshigina, hene ngazuelele,
ha ngakhalele diago mu lamba diakola.
11 Ngabuile tunga-tunga, ngazuelele egi:
“Athu agasue adi enya mambo.”
12 Itshi ngudi naye guhana Yehowa
mukunda nu ndaga jiagasue jiabonga jiangukalegele muene?
13 Mbanguthuphula khopho dia guhuluga,*
mbangukombelela mu jina dia Yehowa.
14 Mbangutagenesa ndaga ngadilogele gudi Yehowa
ha meso a athu enji agasue.
15 Yehowa wana vua gikenene giavula
gula muthu udi ya gujinginyina gudi muene wafua.
16 Oo Yehowa, ngudi gugububila,
handaga ngudi muenya mudimo waye.
Ngudi muenya mudimo waye, mun’a muhiga waye wa mukhetu.
Aye wangujitulula shinga jiangulangi.
17 Mbanguguhana milambu ya guhana mersi;
mbangukombelela mu jina dia Yehowa.
18 Mbangutagenesa ndaga ngadilogele gudi Yehowa
ha meso a athu enji agasue,
19 mu ibanzala ya inzo ya Yehowa,
ha katshi diaye, Oo Yelusalema.
Tumbuisenu Yah!*