Ngimbo
118 Hanenu Yehowa mersi handaga udi Nzambi wabonga;
guzumba guenji gua giamatshidia guana khala mayilago.
2 Enya Isalele azuele luenyelu egi:
“Guzumba guenji gua giamatshidia guana khala mayilago.”
3 Henyaha, enya inzo ya Alona azuele egi:
“Guzumba guenji gua giamatshidia guana khala mayilago.”
4 Athu ana vila Yehowa woma azuele luenyelu egi:
“Guzumba guenji gua giamatshidia guana khala mayilago.”
5 Ngatamegele Yah tangua ngakhalele mu lamba;
Yah wanguhanele mvutu, wangubatele ha fundo dia ubambi.
6 Yehowa udi gu khanda yami; mbangushigo muvua woma.
Itshi muthu wajiya gungutshita?
7 Yehowa udi gu khanda yami ha gungukuatesa;
mbangumona gubua gua mbalagaji jiami.
8 Idi ndaga yabonga ha gulengela gudi Yehowa,
ha fundo dia gusha mutshima gudi ana a athu.
9 Idi ndaga yabonga ha gulengela gudi Yehowa,
ha fundo dia gusha mutshima gudi mafumu.
10 Ifutshi yagasue yangujietele,
uvi ngayikayele
mu jina dia Yehowa.
11 Yangujietele, ayi, yangujietele diago,
uvi ngayikayele
mu jina dia Yehowa.
12 Yangujietele gifua nyigi,
uvi yatotele muphushi gifua luholo tumitshi tua miya tuana shiginyina ha tshuya.
Ngayikayele
mu jina dia Yehowa.
13 Angulutuile mangololo ha gungubuisa,
uvi Yehowa wangukuatesele.
14 Yah udi fundo diami dia gulengele, udi ngolo jiami,
muene wabua muhuluishi wami.
15 Matululu a gusuanguluga nu a gubinga
adi mu tenta jia athu abonga.
Koko dia madia dia Yehowa didi mumonesa ngolo jienji.
16 Koko dia madia dia Yehowa diadikanduisa;
koko dia madia dia Yehowa didi mumonesa ngolo jienji.
17 Ndo, mbangushigo mufua,
mbangusala nu monyo ha gulongesa midimo ya Yah.
18 Yah wanguhanele ndola yakola,
uvi gangushiyilego.
19 Ngukangudilenu mifulo ya gubonga;
mbangugina mu mifulo yene ha gutumbuisa Yah.
20 Wuwu mufulo wa Yehowa.
Athu abonga mbaanginyila ha mufulo wene.
21 Mbangugutumbuisa handaga wanguhanele mvutu,
nu wabuile muhuluishi wami.
22 Seso diabishidile atungi
diabuile seso dia thomo dia ha khomo.
23 Yehowa muene hakhenji wakalegele ndaga yene;
idi ndaga ya gushimana gu meso etu.
24 Lulu lusugu lualondele Yehowa;
mbatukhala nu gusuanguluga mu lusugu luene.
25 Yehowa, tuhuluise, tuabuba!
Yehowa, tudi gugububila, tukuatese hagula tubinge mbalagaji jietu!
26 Gusuanguluga gukhale nu muthu udi muza mu jina dia Yehowa;
tudi gugushimbiga mu inzo ya Yehowa.
27 Yehowa udi Nzambi;
muene wana gutuhana muanya.
Zulenu mandalala ha mago mungine mu ndonga ya wano,
tuyenu uu nu gu mbinga jia giwotshielo.
28 Udi Nzambi wami, mbangugutumbuisa;
Nzambi wami, mbanguguhana lutumbu.
29 Hanenu Yehowa mersi, handaga muene udi wabonga;
guzumba guenji gua giamatshidia guana khala mayilago.