Ngimbo
135 Tumbuisenu Yah!*
Tumbuisenu jina dia Yehowa;
enue akombeledi a Yehowa, mutumbuisenu,
2 enue mudi ya gumagana mu inzo ya Yehowa,
mu gibanzala gia inzo ya Nzambi wetu.
3 Tumbuisenu Yah, handaga Yehowa udi Nzambi wabonga.
Yimbenu ngimbo* ha gutumbuisa jina dienji, handaga gutshita ngenyi gudi ndaga yabonga.
4 Handaga Yah watombele Yakoba ha gukhala khapho dienji,
watombele Isalele gifua shinda dienji dia ndando.
5 Handaga ngudi mujiya muabonga egi Yehowa udi Nzambi wakoma;
fumu wetu udi wakoma gubalega nzambi jiko jiagasue.
6 Yehowa wana tshita ndaga jiagasue jiana gumusuanguluisa
mu dilu nu ha mavu, mu kianga, nu mu majinga a meya.
7 Wana kanduisa matuta* gu songi jia mavu;
wana henyesa mvula hadi munoga yene;
wana zola funji mu jinzo jienji jia gubambela ima.
8 Washiyile ana a somi gu Ejipitu,
ana a athu nu ana a shitu.
9 Muene watumile ijiyishilo nu ndaga jia gushimana mukatshi diaye, Oo Ejipitu,
wayitumidile Farao nu enya mudimo enji agasue.
10 Muene wabingile ifutshi yavula,
washiyile mafumu a ngolo
11 —Sihona fumu wa enya Amole,
Oga fumu wa gu Bashana,
nu ma ufumu agasue a gu Kanana.
12 Wahanele mavu awo gifua khapho,
gifua khapho gudi athu enji enya Isalele.
13 Oo Yehowa, jina diaye diana khala mayilago.
Oo Yehowa, lukuma luaye* luana khala mukunda nu indongo yagasue.
14 Yehowa mbawuzuelela athu enji,
mbawuvuila enya mudimo enji khenda.
15 Ikhokho ya enya ifutshi yalondewe nu utadi wa siliva nu wolo,
idi ima yalondele athu nu mago.
16 Yana khala nu kano, uvi yajiyilego guzuela;
yana khala nu meso, uvi yajiyilego gumona;
17 yana khala nu matshui, uvi yajiyilego guvua;
yana khalago nu muhehe mu makano awo.
18 Athu anyi ana guyilonda mbaabua gifua yene,
nu ene athu agasue ana guyishila mutshima.
19 Oo enya Isalele, tumbuisenu Yehowa.
Oo enya fami ya Alona, tumbuisenu Yehowa.
20 Oo fami ya Levi, tumbuisenu Yehowa.
Enue athu muana vuila Yehowa woma, tumbuisenu Yehowa.
21 Yehowa atumbuishiwe gu Siona,
muene wana khala gu Yelusalema.
Tumbuisenu Yah!