Ngimbo
Lungimbo lua Davidi.
143 Oo Yehowa, vua gisambu giami;
tegelela luholo ngudi gugububila ha gutoga ukuateshi.
Nguhane mvutu, handaga wana khala ya gujinginyina nu wana kalagala ndaga mu luholo luatagana.
2 Usophesago muenya mudimo waye,
handaga gushigo nga muthu mumoshi wajiya gukhala muthu wabonga gu meso aye.
3 Handaga mbalagaji udi gunguhata;
wangubuisa mu mavu, wangudiata.
Muene wangumba mu phipha yakola hagula ngukhale guene gifua athu afile gale mualeha.
4 Muila wanguleba;*
ngolo jiagasue jianguhua.
5 Ngawunguluga masugu a mualeha,
ngatangigiza midimo yaye yagasue;
ngatangigiza* muavula midimo ya mago aye.
6 Ngasununa mago ami gudi aye;
ngudi gifua mavu a gimigina adi muvua luhungu luaye. (Sela)
7 Oo Yehowa, nguhane mvutu muphushi;
ngolo jianguhua.
Ungusuegelago phala yaye,
gula ndo mbangubua gifua athu adi mubulumuga mu malumba.*
8 Ngukuatese ha guvua ndaga jiatadila guzumba guaye gua giamatshidia mu gimenegena,
handaga ngana gugushila mutshima.
Ngudijige njila ngudi naye guwenda,
handaga ngudi mukamba utuameji gudi aye.
9 Nguhuluise ha mago a mbalagaji jiami, O Yehowa.
Ngudi mulengela gudi aye hagula ungubambe.
10 Ngulongese ha gutshita gutshigina guaye,
handaga udi Nzambi wami.
Nyuma yaye idi yabonga;
ingutuameze mu mavu ashigo nu milundu.*
11 Oo Yehowa, ngubambe nu monyo mukunda nu jina diaye.
Nguhuluise* mu tangua dia lamba handaga wana tshita ndaga mu luholo luabonga.
12 Mu guzumba guaye gua giamatshidia, shiya* mbalagaji jiami;
manesela athu adi gungusagesa,
handaga ngudi muenya mudimo waye.