Ngimbo
Gudi mutuameji wa miziki. Lungimbo lua Davidi muenya mudimo wa Yehowa, lunu luayimbidile muene Yehowa mu lusugu luamuhuluishile Yehowa ha mago a mbalagaji jienji jiagasue nu ha mago a Saula. Wazuelele egi:
18 Oo Yehowa ngaguzumba muavula, aye ngolo jiami.
2 Yehowa udi seso diami, fundo diami dia gudisuegela; muene wana gunguhuluisa.
Nzambi wami udi seso diami, udi fundo diami dia gulengela,
udi tshibu yami, lumbinga* luami luana huluisa;* udi fundo diami diabonga dia gudisuega.
3 Ngudi mutoga ukuateshi gudi Yehowa, muene udi watagana ha gutumbuishiwa,
muene mbawunguhuluisa gudi mbalagaji jiami.
4 Shinga jia gufua jiangulangele;
athu a githuhu adi gifua muta udi mufuafuela anguhanele woma.
5 Shinga jia Malumba* jiangujietele;
gufua guangutele muheto gutuama diami.
6 Tangua ngakhalele mu lamba, ngatogele ukuateshi gudi Yehowa,
ngalanduile gutoga ukuateshi gudi Nzambi wami.
Muene wavuile dijui diami gu tempelo yenji,
tangua ngadidile ha gukamba ukuateshi, wavuile.
7 Mavu asendesele gudikuma, adigitshile khanda nu khanda;
fondasio jia milundu jiadigitshile,
jiadinyigishile khanda nu khanda handaga muene wavuile khabu.
8 Mishi yazogele mu mazulu enji,
tshuya tuabala tuazogele mu kano dienji;
makala a tshuya azogele gudi muene.
9 Tangua diabulumugile muene, wafuguile dilu,
phipha yakola yakhalele goshi’a ikanzo yenji.
10 Wanginyile holu dia sheribe, wakhalele muza nu guzuga.
Wabulumugile phushi holu dia mahambu a muanjelo.*
11 Waditshuigile phipha
gifua tenta,
nu meya abuita nu matuta abuita.
12 May’a nzanza nu makala a tshuya
akhalele muzoga mu kiajiji giakhalele gutuama dienji
ha gubalega hakatshi dia matuta.
13 Yehowa wabalele gifua muandu wa mvula mu dilu;
dijui dia Muthu wa Gudinyinyiga diavuiwe
may’a nzanza nu makala a tshuya amonegele.
14 Wasonuene mifula yenji, mbalagaji jiamuanganele.
Wahenyesele mvula, waabuishile tunga-tunga.
15 Goshi’a mita guamonegele;
Oo Yehowa, ba fondasio a mavu azogele haphelo tangua wabalele,
nu tangua wafujile muhehe mu mazulu aye.
16 Wasunuine koko dienji mu dilu, wangukuatele;
wanguzolele mu jinga dia meya.
17 Wanguhuluishile ha mago a mbalagaji mumoshi wa ngolo,
ha mago a mbalagaji jiami jinyi jiakhalele nu ngolo jiavula gungubalega.
18 Anguluishile tangua ngakhalele mu lamba,
uvi Yehowa wangukuatesele.
19 Wangutualele ha fundo dia ubambi;
wanguhuluishile handaga wakhalele gunguzumba.
20 Yehowa wanguhana lufuto mukunda nu ndaga jiabonga ngakalegele;
wanguhana lufuto handaga mago ami akalegelego ndaga yabola.*
21 Handaga ngalanduile muabonga njila jia Yehowa;
ngatunyilego Nzambi wami, handaga gutshita ngenyi gudi ndaga yabola.
22 Ngana tumagela mikhuala yenji;
mbangushigo guyisegulula nga hazonda.
23 Mbangukhadigo nu ditona gutuama dienji;
mbangutshita yagasue ha gutuna gutshita gubola.
24 Yehowa anguhane lufuto mukunda nu ndaga jiabonga ngakalegele,
handaga mago ami ashigo nu gubola gutuama dienji.
25 Aye wana khala ya gujinginyina gudi muthu udi ya gujinginyina gudi aye;
wana kalagala ndaga jiabonga gudi muthu wabonga.
26 Aye wana khala waphelegeta gudi muthu waphelegeta,
uvi wana monesa gutema gudi muthu wabola.
27 Handaga aye wana huluisa athu ana gudibulumuisa,
uvi wana bulumuisa enya lulendo.
28 Oo Yehowa, aye wana lemesa muenda wami;
wana khala gifua muenda tangua ngudi mu phipha.
29 Mu ukuateshi waye, ngajiya guluisa thundu ya nzangi;
mu ngolo jia Nzambi, ngajiya gukanduga gibayi.
30 Njila ya Nzambi wa giamatshidia idi yatagana;
mbimbi ya Yehowa idi yaphelegeta.
Muene udi tshibu mukunda nu athu agasue ana lengela gudi muene.
31 Handaga gula Yehowa ndo, Nzambi muko nanyi?
Nanyi muko udi seso gifua Nzambi wetu?
32 Nzambi wa giamatshidia muene wana gunguhana ngolo,
muene mbawulondega njila yami muabonga.
33 Muene udi mubuisa malu ami gifua malu a gabaji;
muene udi gungumagenesa holu dia tumilundu.
34 Muene udi mulongesa mago ami ha gulua ita;
mago ami ajiya gufugula uta wa manana wa kuivre.
35 Aye wanguhana tshibu yaye ha gunguhuluisa,
wangukuata gu koko guaye gua madia,
gudibulumuisa guaye guana gungubuisa muthu wakoma.
36 Udi gungukomesela njila,
hagula malu ami* adiadiumugago.
37 Mbangulandula mbalagaji jiami, mbanguakuata;
mbangushigo muvutuga gula ngaamaneselego.
38 Mbanguasasumuna hagula azugigo luko;
ene mbaabua, ame mbanguadiata nu ikanzo yami.
39 Mbawunguhana ngolo ha gulua ita;
mbawubuisa mbalagaji jiami gutuama diami.
40 Mbawulengesa mbalagaji jiami gutuama diami;
athu agasue ana khala nu umbalagaji nu ame, mbanguashiya.*
41 Adi mukamba ukuateshi uvi gushigo nga muthu wa guahuluisa;
adi mutamega nji Yehowa, uvi muene gashigo mutaya.
42 Mbanguatua diege-diege gifua fuphi idi muhehumuga mu muhehe;
mbanguasasumuna, mbanguadiata gifua ithotho mu bala-bala.
43 Mbawunguhuluisa ha mago a athu ana zuela ndaga jiabola.
Mbawungubuisa fumu wa ifutshi;
athu anyi ngushigo mujiya mbaabua enya mudimo ami.
44 Ndaga mbaavua mukunda nu ame, mbajiatuma ha gungutumagela;
athu a ifutshi iko mbaaza mufugama gutuama diami.
45 Athu a ifutshi iko mbaaleba muila;
mbaazoga nu gudigita mu mafundo adisuegele.
46 Yehowa udi nu monyo! Seso diami ditumbuishiwe!
Nzambi wana gunguhuluisa, atumbuishiwe!
47 Nzambi wa giamatshidia wavutula gubola gudi mbalagaji jiami;
Wahaga athu goshi’a ikanzo yami hagula nguahinyine.
48 Muene wanguhuluisa ha mago a mbalagaji jiami.
Aye wanguhaga holu dia athu adi gunguluisa;
wanguhuluisa ha mago a mbundudi.
49 Oo Yehowa, gishina giene mbangugutumbuisa mukatshi dia ifutshi,
mbanguyimba ngimbo* ha gutumbuisa jina diaye.
50 Muene udi mutshita ndaga jiakoma ha guhuluisa fumu wenji;
udi mumonesa guzumba gua giamatshidia mayilago gudi muthu watombele muene,
gudi Davidi nu vungu* dienji.