Ngimbo

28 Oo Yehowa, aye Seso diami, aye ngana landula gutamega;

ushitshigo matshui gu ndaga ngudi muzuela.

Gula wahena tedie,

mbangubua gifua athu adi mubulumuga mu wina.*

 2 Vua isambu yami tangua ngudi mudila ha gugutoga ukuateshi,

tangua ngudi muthuphula mago gu khanda ya sugu ya mukatshi ya fundo diaye dia gijila.

 3 Ungusophesago hamoshi nu athu abola, nu athu ana kalagala ndaga jia khuta,

athu anyi ana wambela athu ako mbimbi jiabonga, uvi mitshima yawo yazala nu ndaga jiabola.

 4 Asophese gifua mudi makalegelo awo,

mu gudivua nu midimo yawo yabola.

Afute mukunda nu midimo ya mago awo,

mu gudivua nu ndaga akalegele.

 5 Handaga ana zulago midimo ya Yehowa nu ndando,

nga yene midimo ya mago enji.

 6 Yehowa atumbuishiwe,

handaga wavui luholo ngamutamega ha gutoga ukuateshi.

 7 Yehowa udi ngolo jiami, udi nji tshibu yami,

muene ngana shila mutshima.

Muene wangukuatesele, ngudi nu gusuanguluga mu mutshima,

gishina giene mbangumuyimbila lungimbo ha gumutumbuisa.

 8 Yehowa wana hana athu enji ngolo;

udi fundo diabonga dia gulengela, wana huluisa muthu wenji, munu gatombele.*