Ngimbo
Lungimbo lua Davidi.
29 Enue ana a enya ngolo, tumbuisenu Yehowa,
tumbuisenu Yehowa mukunda nu lutumbu luenji nu ngolo jienji.
2 Hanenu Yehowa lutumbu ludi naye guheta muene mukunda nu jina dienji.
Fugamenu gutuama dia* Yehowa nu milele ya gijila.*
3 Dijui dia Yehowa didi muvuiwa holu dia meya;
Nzambi wa lutumbu udi muluma* gifua miandu ya mvula.
Yehowa udi holu dia meya avula.
4 Dijui dia Yehowa didi diakola;
dijui dia Yehowa didi diabalega gubonga.
5 Dijui dia Yehowa didi mubogola mitshi ya sedre;
ayi, Yehowa udi mubogola mitshi ya sedre ya gu Libane.
6 Muene udi mutshita egi milundu ya Libane isomboge gifua mun’a ngombe,
mulundu wa Siliona usomboge gifua mutumba wa ngombe ya mulume ya mu foto.
7 Dijui dia Yehowa diana zola madimi a tshuya.
8 Dijui dia Yehowa didi mudigitshisa mavu a luselenga;
Yehowa udi mudigitshisa mavu a luselenga a Kadeshe.
9 Dijui dia Yehowa diadigitshisa gabaji, gabaji gavuala.
Dialugumuna mayiji a mitshi mu ishitu.
Athu agasue adi mu tempelo yenji azuela egi: “Tumbuisenu Nzambi!”
10 Yehowa udi ha nguasa ya ufumu holu dia meya avula;*
Yehowa udi ha nguasa ya ufumu, udi Fumu mayilago.
11 Yehowa mbawuhana athu enji ngolo.
Yehowa mbawuhana athu enji guhuima.