Mukunda Natshi Alandudi a Yesu Akhalelego Mutuna Gudia?

Yone Mubatiji wambiwe mu bologo tangua diazonda gungima dia guya gua Yesu gu Pake ya givo 30 gia tangua dietu. Yone watshiginyile egi alandudi enji abue alandudi a Yesu. Uvi mbeji jia zonda gungima dia gumbiwa guenji mu bologo, ene agasue alanduilego Yesu.

Henyaha, tangua wano wa pake wa givo 31 gia tangua dietu wasuenele hehi, alandudi ako a Yone ayile gudi Yesu, amuhudile egi: ‘Mukunda natshi esue nu Afalese tuana gujila gudia, uvi alandudi aye anago gujila gudia?’ (Matayo 9:14) Gudi Afalese, gujila gudia guakhalele khadilo dia gikombelelo giawo. Gungima, Yesu wahanele gifezegeselo gimoshi giakhalele muzuelela Mufalese mumoshi wa muenya lulendo, wakombelele egi: ‘O Nzambi ngudi guguhana mersi handaga ame ngushigo gifua athu ako . . . Ngana gutuna gudia iphungu mbadi mu phoso imoshi.’ (Luka 18:11, 12) Yajiya gukhala egi alandudi a Yone nji akhalele nu khadilo dia gujila gudia. Ngando, yajiya gukhala egi akhalele mutuna gudia mukunda nu gikenene gia Yone luholo gambiwe mu bologo. Luko, alandudi a Yone akhalele gudihula mukunda natshi alandudi a Yesu akhalelego mutuna gudia. Tangua diko atangijile egi gula atshita ngenyi, ajiya gumonesa gikenene giawo mukunda nu ndaga yabuidile Yone.

Ha guaahana mvutu, Yesu wahanele gifezegeselo egi: “Mafuta a yala udi muzula mukhetu mu ulo ashigo naye gukhala nu gikenene tangua yala muene udi nawo, ishigo ngenyi? Uvi lusugu ludi muza tangua yala udi muzula mukhetu mu ulo mbawukatudiwa mukatshi diawo, mu tangua diene, mbaajila gudia.”—Matayo 9:15, NW.

Yone hakhenji watamegele Yesu egi yala udi muzula mukhetu mu ulo. (Yone 3:28, 29) Hene, luholo Yesu gadi mukatshi diawo, alandudi enji ashigo naye gutuna gudia. Gungima, tangua Yesu mbagafua, alandudi enji mbaakhala nu gikenene, enji mbaavuigo nzala ya gudia. Uvi tangua mbadifuzumuga muene, ene mbaakhadigo nu ndaga nga imoshi yajiya guaahana gikenene nu guaatuma ha gujila gudia. Mbaakhala nu gusuanguluga guavula diago.

Gungima, Yesu wahanele ifezegeselo mbadi: “Gushigo muthu wana gutunga gibanji gia mulele uhe-uhe holu dia mulele ukulu, handaga gibanji giene mbagikalula mulele ukulu, ngenyi mbawutawuga diago muavula. Luko, athu anago gumba matombe mu milondo ya ilema ikulu. Gula atshita ngenyi, milondo ya ilema mbayitawuga, matombe mbabunduga, enji milondo ya ilema mbayizangelewa. Uvi athu ana gumba matombe ahe-ahe mu milondo ya ilema ihe-ihe.” (Matayo 9:16, 17, NW) Itshi Yesu wakhalele mutshigina guzuela?

Yesu watshiginyile gukuatesa alandudi a Yone Mubatiji ha gujiya egi gushigo nga muthu udi naye gushinjiga alandudi enji ha gulandula ndaga jikulu jia enya Yuda, gifua gujila gudia. Yesu gajilego ha mavu mukunda nu gulondega gikombelelo gikulu nga gulehesa masugu a gikombelelo giene giakhalele hehi nu gubembewa. Yesu gatogelego athu egi alandule gikombelelo gia enya Yuda a mu tangua dia thomo, egi giakhalele mulandula mikhuala nu makalegelo a athu. Yadiago, muene gakhalelego mutunga gibanji gia mulele uhe-uhe holu dia mulele ukulu, nga gumba matombe ahe-ahe mu milondo ya ilema ikulu.