Yesu Wataganesa Profesi ya Yeshaya

Tangua Yesu wajiyile egi Afalese nu enya Helode akhalele mukamba luholo lua gumushiya, wazanguile alandudi enji, ayile gu khanda ya Kianga gia Galile. Athu avula a gu khanda jiagasue ayile gudi muene. Akatugile gu Galile, gu membo a Tile nu Sidona adi hehi nu muta. Ako akatugile gu khanda ya esti ya Muta wa Yordani, gu Yelusalema, nu gu khanda ya sudi ya Idume. Yesu wasagele athu avula. Hene, athu akhalele nu misongo yakola akhalele muya mu phushi gudi muene. Akhalelego munengena egi Yesu a akuate, uvi ene hakhawo akhalele muya mu phushi ha gumukuata.—Mako 3:9, 10.

Athu akhalele avula diago; hene Yesu watogele alandudi enji ha gumukambela wato wazonda hagula angine. Ngenyi, athu ajiyilego gusuena hehi nenji. Luko, wajiya gualongesa mukatshi dia wato nga ha guya fundo diko ha gulongesa athu ako.

Mulandudi Matayo wasonegele egi mudimo wa Yesu watagenesele ‘ndaga jia zuelele profete Yeshaya.’ (Matayo 12:17) Profesi itshi yakhalele mutagenesa Yesu?

‘Tadienu! Muenya mudimo wami ngatombele, ngana gumuzumba, muene udi musuanguluisa mutshima wami! Mbangumuhua nyuma yami, muene mbawujiyisa athu a mu ifutshi yagasue ndaga jia nduedi haphelo. Muene mbagamanyigo nu ako, mbagambigo milolo, mbagatshigo mukanda mu milongo ya dimbo. Muene mbawukhala nu guhuiminyina gudi athu aleba, mbawukhala nu gisemo gudi athu adi musubala, uu nu hadi muene muhagesa ndaga jia nduedi ha mavu. Yadiago, athu a ifutshi iko mbadifelela mu jina dienji.’—Matayo 12:18-21; Yeshaya 42:1-4.

Yadiago, Yesu udi muenya mudimo Nzambi wana guzumba. Yesu wamonesele diago haphelo ndaga jia nduedi, jiago mafumu a mangumba a mambo akhalele musuega mu malongo awo. Afalese akhalele mukalegela mukhuala wa Nzambi mu luholo luabola. Hene muthu wagasue wakhalele mukata mu Lusugu lua Guhuluguga, akhalelego gumukuatesa. Yesu wamonesele ndaga jia nduedi ya Nzambi haphelo, wamonesele luko egi wakhalele nu nyuma ya Nzambi tangua gakatudile athu inemo ya shigu jia mambo jia mafumu a mangumba. Hene mafumu a mangumba akhalele mukamba gumushiya. Ndaga ya musonyi diago!

Profesi ya Yeshaya ya zuelele egi: ‘Muene mbagambigo milolo nu mbagatshigo mukanda mu milongo ya dimbo.’ Idi mukotelesa itshi? Tangua Yesu wakhalele musaga athu nu guzola bademo, wakhalele guawambela egi ‘amusololago.’ (Mako 3:12) Gatshiginyilego egi athu amujiye mu njila ya ndaga jiana guzuelewa mu bala-bala nga mu njila ya izuele-zuele ya athu.

Luko, Yesu walongesele lukuma luenji ludi muhana gikhesa gudi athu adi gifua matetete adi agufugula nu didi mudiatewa, adi gifua shinga ya lino idi mulema, enji idi hehi nu gujima. Yesu gadiatelego matetete akhalele agufugula gale nga ndo gajimilego tshuya tudi mutshigina gujima. Uvi, nu gisemo nu guzumba guagasue, wakanduishile athu agudibulumuisa. Yadiago, Yesu udi muthu enya ifutshi yagasue ajiya gushila mutshima!