LONGO 11

Guzuela nu Gikhesa

Lomo 12:11

NDAGA UDI NAYE GUKALAGALA: Zuela nu gikhesa giagasue ha gula athu adi gugutegelela akhale nu nzala ya gukalegela ndaga udi muzuela.

Ndaga udi muzuela jidi naye gukuata mutshima waye. Tangua udi gudilondega tangiza muavula funu ya ndaga mbawulongesa. Gukotelesa ndaga jiene muabonga ha guyilongesa nu mutshima waye wagasue.
Tangigiza athu mbaagutegelela. Tangigiza gubonga mbaguheta athu mbaagutegelela tangua mbawulongesa nga tangua mbawutanga. Tangigiza nji muabonga maluholo wajiya gulongesela ndaga jiene hagula jisuanguluise diago athu adi gugutegela.
Zuela nu gusuanguluga guagasue. Zuela nu gikhesa giagasue. Kalegela mago nu phala muabonga ha gumonesa luholo udi gudivua mukunda nu ndaga udi muzuela.

Uvutugilago muavula luholo lumoshi lua gunyigisa mago nga gitshinyi giko gia muila waye, handaga yajiya gusagesa athu. Luholo udi mukalegela mago nu phala yaye ludi naye gudivua nu ndaga udi muzuelela. Monesa thomo gikhesa tangua dia guzuelela matangi a ndando nu dia guhana athu gikhesa. Uvi, umonesago gikhesa muavula gubalega, yajiya guhuidisa athu adi gugutegelela.