Hakatugile Adama nu Eva mu gilanga gia Edene, avualele ana avula. Mun’awo wa somi jina dienji diakhalele Gayino; wakhalele mudimi wa mahia. Mun’awo wa mbadi, jina dienji diakhalele Abele; wakhalele mubambi wa imeme.

Lusugu lumoshi Gayino nu Abele alondele milambu ha guhana Yehowa. Aye mujiya gula mulambu udi itshi? Idi kado ga ndando ana hana gudi Nzambi. Yehowa wasuangulugile nu mulambu wa Abele, uvi wa Gayino ndo. Hene Gayino wavuile khabu jiavula. Yehowa wamuwambelele egi gula gabembelego guvua khabu, wajiya gutshita ndaga yabola. Uvi Gayino watunyile gumuvila.

Gungima Gayino wawambelele Abele egi: ‘Za tuye mu gilanga.’ Tangua akhalele muyadi’awo mu gilanga, Gayino wawasele phangi’enji, wamushiyile. Itshi Yehowa wakalegele? Wahanele Gayino ndola, wamutumile gualeha nu enya fami yenji. Gayino gakhalelego luko nu luholo lua guvutuga gudi enya fami yenji.

Lumene elu ludi gutulongesa itshi? Tuajiya gusendesa guvua khabu gula ndaga jishigo muyila muabonga gifua luholo tuatangiza. Uvi gula tuasendesa guvua khabu jiavula, nga gula athu ako atudijiga egi adi gutumona khabu-khabu, tudi naye gubemba guvua khabu muphushi hagula jitutumigo ha gutshita ndaga yabola.

Yehowa yowu genji wana wunguluga Abele, handaga wakhalele muthu wabonga nu wakhalele muzumba Nzambi. Yehowa mbawufuzumuna Abele tangua mbadibuisa muene mavu phaladiso.

Gungima, athu avudile ha mavu. Avula mukatshi diawo akhalele athu abola. Angelo ako asendesele nji gutshita ndaga jiabola. Akatugile mu dilu fundo ana khala, ha guza mukhala ha mavu. Umujiya mukunda natshi atshitshile ngenyi? Akhalele mutshigina gubua gifua athu ha gula azule akhetu mu ulo.

Anjelo avualele ana nu akhetu ene. Ana ene akudile, abuile nu ngolo jiavula, akhalele ingujila ya athu. Akhalele musagesa athu. Yehowa gatshiginyilego egi ndaga jia luholo elu jilandule gukalegewa. Wazudile desizio dia gunogesa mvula yakola ha gushiya athu abola.

Uvi guakhalele nu muthu mumoshi wakhalele wa gudisha nu athu ako. Muthu muene wakhalele muzumba Yehowa. Jina dienji Nowa. Wakhalele nu mukhetu nu ana thathu a mala: Sheme, Kame nu Yafete. Ana ene akhalele nji nu akaji’awo. Yehowa wawambelele Nowa ha gutunga masuwa akoma ha gula muene nu enya fami yenji afuigo gu mvula yakola. Aye mujiya gula masuwa adi itshi? Masuwa adi mushete wakoma wana zaluga holu dia meya. Yehowa wawambelele nji Nowa ha gunginyisa shitu jiavula mu masuwa ha gula jifuigo gu mvula yakola.

Nowa wasendesele mbala imoshi gutunga masuwa. Muene nu enya fami yenji atshitshile ivo hehi nu 50 ha gumanesela gutunga masuwa ene. Atungile masuwa gifua luholo Yehowa wazuelele. Mu tangua diene, Nowa wakhalele nji mutemesa athu mukunda nu mvula yakola yakhalele naye gunoga. Uvi athu atunyile gumutegelela.

Gu gisugishilo, tangua dia gungina mu masuwa diatagenele. Tutale ndaga jiakalegewe gungima.