Yesu Walongesa Alandudi Enji Luholo lua Gutshita Gisambu

Afalese akhalele mutshita ndaga hagula athu ako a amone. Akhalele mumonesela athu ako gisemo hagula athu ako a ashimane. Akhalele mutshita isambu mu mafundo a athu avula hagula athu a amone. Afalese akhalele mukuata isambu yaleha mu muto, akhalele guyivutugile mu sinagoga, mu phambu jia njila hagula athu ategelele. Hene athu adihudile diago tangua Yesu wazuelele egi: ‘Mushigo naye gukombelela gifua Afalese. Akhalele mutangiza egi Nzambi mbawaategelela handaga adi muzuela mbimbi jiavula, uvi ishigo ngenyi. Gisambu gidi maga udi muta nu Yehowa. Hene ukhadigo muvutugila mbimbi jia luholo lumoshi mbala jiavula. Yehowa wana tshigina egi umuwambele ndaga jidi mukatuga mu mutshima.

“Mudi naye gukombelela luholo elu: ‘Tata wetu udi mu dilu, jina diaye dinemesewe. Ufumu waye uze. Gutshigina guaye gukalegewe ha mavu gifua mu dilu. ’” Yesu walongesele egi adi naye gukombelela mukunda nu ima ya gudia ya lusugu nu lusugu nu gutoga Nzambi ha guatotesela gubola guawo nu gukombelela mukunda nu milonga yawo iko.

Yesu wazuelele egi: ‘Mubembigo gukombelela. Landulenu gukombelela Yehowa, Sh’enu udi mu dilu mukunda nu ndaga jiabonga. Mvuaji jiagasue jiana tshigina guhana an’awo ima yabonga. Gula mun’aye wa gutoga dipha, wajiya gumuhana seso ba? Gula wagutoga ishui, wajiya gumuhana nioga ba?’

Gungima Yesu wahanele longo egi: ‘Gula enue muana jiya luholo lua guhana an’enu ima yabonga, Yehowa Tata wenu mbawumihana nji nyuma yabonga. Khalenu gumutoga.’ Wana landula longo dia Yesu ba? Ndaga tshi wana toga mu gisambu?