Ekisodo

21 “Ivi ni vigamulo vakuti uwauze:

2 Mukagula kapolo wa Chiheberi, adzakhale kapolo wanu kwa magole 6, koma mu gole yachi 7 mumbamumasule ndipo ambachoke osapereka chirichose. 3 Peno adabwera ali yekha, adzachoke pomwe ali yekha. Peno adabwera na nkazi, nkazi wake uyo adzayende naye. 4 Peno abwana wake amupasa nkazi nkuwaberekera wana amuna panango akazi, nkazi muyo na wana wake adzakhale wa abwana wake, ndipo mwamuna muyo adzachoke ali yekha. 5 Koma kapolo muyo akanena motsimikiza kuti: ‘Niwakonda maninge abwana wangu, nkazi wangu na wana wangu, ndipo ninkufunalini kumasuliwa kuti nichoke, 6 abwana wake mwawo ambabwere naye pamaso pa Mulungu chaiye. Patsogolo pake ambayende naye pansuwo panango pa feremu, akachita teno abwana wake mwawo ambamubowole dzitu na chobowolera, ndipo iye adzakhale kapolo wawo moyo wake wose.

7 Munthu akagulisa mwana wake nkazi ninge kapolo, adzachokelini ninge momwe akapolo amuna achokera. 8 Peno abwana wake ankukondwalini naye ndipo ankufunalini kuti akhale nkazi wake mng’ono koma akufuna kumugulisa kwa munthu munango,* abwana wake mwawo alibe ufulu womugulisa kwa wanthu wa khaindi inango ndawa amuchitira vinthu viribe chilungamo. 9 Koma akamupereka kwa mwana wake mwamuna, ambamupase ufulu wose womwe uperekewa kwa wana akazi. 10 Mwana mwamuna muyo akalowola nkazi munango, woyamba muyo afunika kumupasa chakudya, vovala na kugona naye ninge nkazi wake.* 11 Koma peno akumuchitiralini vinthu vitatu vimwevi, nkazi muyo achoke osapereka kobiri iriyose.

12 Aliyese yemwe wamenya munthu mpakana munthu muyo kufa afunika kuphewa. 13 Koma peno alibe kumupha mwadala ndipo Mulungu chaiye wabvuma kuti vichitike, nidzakukonzereni malo yomwe angathawireko. 14 Munthu akakalipa maninge ndawa ya munzake mpakana kumupha mwadala, munthu muyo ambaphewe. Olo achithawira ku guwa yangu yantsembe, mumbamuchose nkumupha. 15 Munthu yemwe wamenya ababa wake panango amayi wake ambaphewe.

16 Munthu munango akaba munthu nkumugulisa panango akagumanika na munthu wabewa uyo, ambaphewe.

17 Aliyese wotemberera ababa wake panango amayi wake ambaphewe.

18 Wanthu akambakalipizana, manje munango nkumenya munzake na mwala panango chibaga* munzake muyo ne kufa koma wapwetekeka ndipo ali gone, mumbamuchite ivi: 19 Peno ankukwanisa kumuka nkuyamba kufambafamba panja pakuphatisira basa mpsimbo, yemwe wamumenya ule osati ambatambire chilango. Koma ambapereke malipiro ya nthawe yomwe womenyewa uyo wakhala osaphata basa, mpakana munzake muyo apoleretu.

20 Munthu akamenya kapolo wake mwamuna panango nkazi na mpsyimbo, kapolo muyo nkumufera, munthu muyo shuwadi ambaphewe. 21 Koma peno kapolo muyo alibe kufa ndipo wakhala na moyo ntsiku ibodzi panango ntsiku ziwiri, abwana wake mwawo afunikalini kulangiwa ndawa kapolo muyo adamugula na kobiri zawo.

22 Peno amuna ankumenyana ndipo apweteka maninge nkazi wamimba, mwakuti nkazi muyo nkubereka mwana nthawe yake ikalibe kukwana koma palibe wamwalira,* wopweteka nkazi muyo ambamulipirise mobverana na vomwe mwamuna wa nkazi muyo angagamule. Ambapereke malipiro mwayo kupitira kwa wotonga milandu. 23 Koma peno munango wamwalira, pamwapo mumbapereke moyo kulipira moyo. 24 Munango akapweteka maninge munzake, pambakhale diso kulipira diso, dzinu kulipira dzinu, djanja kulipira djanja, phazi kulipira phazi, 25 kutentha na moto kulipira kutentha na moto, chironda kulipira chironda, kumenya kulipira kumenya.

26 Peno munthu wamenya kapolo wake mwamuna panango kapolo wake nkazi padiso nkumupweteka maninge, ambamumasule kapolo muyo ndipo ambamubvumize kuchoka ninge malipiro ya diso yake. 27 Ndipo akagulula dzinu ya kapolo wake mwamuna panango kapolo wake nkazi, ambamumasule kapolo muyo ndipo ambamubvumize kuchoka ninge malipiro ya dzinu yake.

28 Peno ng’ombe yakonya mwamuna panango nkazi, munthu muyo nkumwalira, ng’ombe mwiyo imbaphwanyiwe na minyala nkuphewa ndipo nyama yake osati imbadyewe. Vikakhala teno munikachiro wa ng’ombe mwiyo afunikalini kulangiwa. 29 Koma peno ng’ombe imbadziwika kuti ikonya wanthu ndipo munikachiro adachenjezewako kale koma ambainyang’aniralini, manje yapha mwamuna panango nkazi, ng’ombe mwiyo imbaphewe na minyala ndipo munikachiro muyo ambaphewembo. 30 Peno waweruziwa kuti alipire* afunika kulipira kobiri iriyose yowombola moyo wake yomwe amugamula. 31 Peno ng’ombe mwiyo idakonya mwana mwamuna panango mwana nkazi, munikachiro wa ng’ombe mwiyo ambaweruziwe mobverana na chigamulo mwichi. 32 Peno yakonya kapolo mwamuna panango nkazi, munikachiro ambalipire kobiri zokwana masekeli* 30 kwa abwana wa kapolo muyo, ndipo ng’ombe mwiyo imbaphewe na minyala.

33 Peno munthu wasiya dindi yosabwinikira panango wakumba dindi koma alibe kufungapo ndipo ng’ombe panango bulu nkugweramo, 34 munikachiro wa dindi mwiyo ambalipire. Malipiro mwayo ambayapereke kwa munikachiro wa chipfuwo mwicho, koma iye ambatenge nyama yakufa mwiyo. 35 Peno ng’ombe ya munthu yapweteka nkupha ng’ombe ya munzake, ambagulise ng’ombe ya moyo mwiyo nkugawana kobiri mwizo komasoti ambagawane nyama yakufa mwiyo. 36 Koma peno ng’ombe mwiyo imbadziwika kuti ikonya zinzake, koma munikachiro ambainyang’aniralini, ambapereke ng’ombe kulipira ng’ombe, ndipo ambatenge yakufa mwiyo.”