Oweruza
4 Ehudi padamwalira, Aizirayeli adayamba pomwe kuchita vinthu voipa pamaso pa Yahova. 2 Pamwapo Yahova adawapereka* kwa Yabini mpfumu ya ku Kanani, yemwe ambatonga ku Hazori. Nkulu wa gulu yake yankhondo wenze Sisera, ndipo ambakhala ku Haroseti-ha-goimu. 3 Aizirayeli adayamba kulirira Yahova ndawa Yabini ambawaboneresa maninge kwa magole 20, ndipo iye wenze na ngolo zankhondo zokwana 900 zomwe zenze na visimbi vitali komasoti vakuthwa.
4 Panthawe mwiyo mneneri Debora, yemwe wenze nkazi wa Lapidoti, wenze woweruza wa Izirayeli. 5 Iye ambakhala m’nyantsi mwa muti wake* wa kanjedza pakati pa thaundi ya Rama na ya Beteli, mu dera ya mapiri ya Efuraimu ndipo Aizirayeli ambayenda kwa iye kuti akawaweruze. 6 Debora adatumiza ntontholo kwa Baraki mwana wa Abinowamu, yemwe wenze ku Kadesi-nafitali, womuuza kuti: “Yahova Mulungu wa Izirayeli walamula kuti: ‘Tenga amuna 10 000 wa dzinza ya Nafitali na ya Zebuloni ndipo mukasonkhane pa phiri ya Tabori. 7 Inepano nidzabwerese Sisera nkulu wa gulu yankhondo ya Yabini, pabodzi na ngolo zake zankhondo na masocha yake ndipo nidzamupereke m’manja mwako ku kamadzi ka Kisoni.’”
8 Pamwapo Baraki adauza Debora kuti: “Peno uyende nane pabodzi, inembo niyende, koma peno uyende nanelini pabodzi, inembo niyendelini.” 9 Debora adadawira kuti: “Niyende nawe pabodzi. Koma wati alemekezewe pa nkhondo mweyi ndiwepolini, ndawa Yahova adzapereke Sisera m’manja mwa munthu nkazi.’ Padateno Debora adanyamuka nkuyenda na Baraki ku Kedesi. 10 Baraki adasonkhanisa amuna okwana 10 000 wa dzinza ya Zebuloni na ya Nafitali ku Kedesi ndipo amuna mwawo adayamba kumutewera. Ndipo Debora adayenda naye pabodzi.
11 Vidandochitika kuti Hiberi wa dzinza ya Akeni adasiyana na Akeni, wana wa Hobabu mpongozi wa Mose ndipo adamanga tenti yake pafupi na muti ukulu ku Zaananimu, ku Kedesi.
12 Patsogolo pake padafika ntontholo kwa Sisera wakuti Baraki, mwana wa Abinowamu, wayenda ku phiri ya Tabori. 13 Nthawe mweyo, Sisera adasonkhanisa ngolo zake zose zankhondo, zokwana 900 zomwe zenze na visimbi vitali komasoti vakuthwa. Adasonkhanisa pomwe masocha yake yose kuchokera ku Haroseti-ha-goimu ndipo adayenda ku kamadzi ka Kisoni. 14 Pamwapo Debora adauza Baraki kuti: “Nyamuka, ndawa lero ni ntsiku yomwe Yahova apereke Sisera m’manja mwako. Yahova ankufamba patsogolo pako.” Baraki adabulukadi m’phiri ya Tabori, amuna 10 000 ankumutewera. 15 Pavidateno Yahova adasokoneza Sisera, ngolo zake zose za nkhondo komasoti masocha yake yose pamaso pa Baraki. Patsogolo pake, Sisera adabuluka mu ngolo yake nkuyamba kuthawa na minyendo. 16 Baraki adathamangisa ngolo za nkhondo mwizo na masocha yose mwayo mpakana ku Haroseti-ha-goimu. Masocha yose ya Sisera yadaphewa na chibemba mwakuti palibe olo m’bodzi yemwe adakhala na moyo.
17 Koma Sisera adathawa na minyendo nkuyenda ku tenti ya Yaeli, nkazi wa Hiberi wa dzinza ya Akeni, ndawa Yabini mpfumu ya Hazori ambabverana na banja ya Hiberi wa dzinza ya Akeni. 18 Pamwapo Yaeli adabula nkukachunguzira Sisera nkumuuza kuti: “Mwatambiriwa mbuya wangu, ngenani. Ayi kugopa.” Pamwapo adayenda kukangena mu tenti ya Yaeli ndipo adamufunika bulangeti. 19 Patsogolo pake Sisera adamuuza kuti: “Nipasenkoni madzi yakumwa, ndawa ninanyota. Pamwapo adafungula chola chachikumba chomwe chenze na nkaka nkumupasa kuti amwe. Padateno, adamufunika pomwe. 20 Sisera adauza Yaeli kuti: “Uyime pa nsuwo wa tenti, ndipo pakabwera munthu nkukubvunza kuti: ‘Ko pali mwamuna aliyese pano?’ Umuuze kuti: ‘Palibe.’”
21 Manje Yaeli nkazi wa Hiberi adatenga nkhokho ya tenti na sando. Patsogolo pake adangena mu tenti mumo, mwakuchita kuwenda. Panthawe mweyi Sisera wenze mu tulo tofanato ndawa wenze adaneta maninge. Yaeli adakhokhomera nkhokho mwiyo mu nsolo mwa Sisera pafupi na dzitu. Nkhokho mwiyo idangena mpakana pasi ndipo adafera pamwapo.
22 Pavidateno Baraki adafika akufagafaga Sisera. Pamwapo Yaeli adayenda kukamuchunguzira, ndipo adamuuza kuti: “Bwerani nikuwoneseni munthu yemwe munkumufaga.” Iye adamutewera ndipo adandowona Sisera ali thaphsa wakufa, mu nsolo mwake muli zikirire nkhokho pafupi na dzitu.
23 Pantsiku mweyi Mulungu adawina Yabini mpfumu ya Akanani, pamaso pa Aizirayeli. 24 Ndipo djanja ya Aizirayeli idapitiriza kukhala na mphanvu maninge pakumenyana na Yabini mpfumu ya Kanani, mpakana adapha Yabini mpfumu ya Kanani.