Ekisodo

20 Patsogolo pake Mulungu adayankhula mawu aya:

2 “Inepano ndine Yahova Mulungu wanu, yemwe nidakubulisani mudziko ya Iguputo, mu nyumba yaukapolo. 3 Ayi kukhala na milungu yaliyose kuchosapo inepano.*

4 Ayi kuti mudzikonzere fano panango chifaniziro cha chinthu chirichose chakudzulu panango chapadziko yapasi, panango pomwe madzi ya padziko yapasi. 5 Ayi kuvijolimira panango kuvitumikira, ndawa inepano Yahova Mulungu wanu, ndine Mulungu yemwe nifuna kuti wanthu ambadzipereke kwa inepano nekha, yemwe nilanga wana, azizukulu na wana wa azizukulu mwawo, ndawa ya vophonya va ababa wa wanthu omwe anizonda. 6 Koma niwonesa chikondi chokhulupirika kwa wanthu mibadwo mamidyau omwe anikonda na kubvera malamulo yangu.

7 Ayi kumbaphatisa basa dzina ya Yahova Mulungu wanu mophonyeka, ndawa Yahova adzalekererelini aliyese wophatisa basa dzina Yake mophonyeka koma osamulanga.

8 Mumbakumbukire ntsiku ya Satade ndipo mumbaiwone kuti ni yopatulika. 9 Kwa ntsiku 6 mumbaphatiretu basa zanu zose. 10 Koma ntsiku yachi 7 ni satade ya Yahova Mulungu wanu. Ayi kumbaphata basa iriyose imwepo panango mwana wanu mwamuna, mwana wanu nkazi, kapolo wanu mwamuna, kapolo wanu nkazi, chipfuwo chanu panango mulendo yemwe akukhala muthaundi yanu.* 11 Ndawa kwa ntsiku 6 Yahova adakonza kudzulu, dziko yapasi, nyanja na vose vomwe viri mumo ndipo adayamba kupumula pantsiku yachi 7. Ndipomwapa Yahova adadalisa ntsiku ya Satade ndipo adaichitisa kukhala yopatulika.

12 Mumbalemekeze ababa wanu na amayi wanu kuti mukhale na moyo kwa nthawe itali mu dziko yomwe Yahova Mulungu wanu akukupasani.

13 Ayi kupha munthu.*

14 Ayi kuchita chigololo.

15 Ayi kuba.

16 Ayi kupereka umboni wonamizira munzanu.

17 Ayi kumbakhumbira nyumba ya munzanu. Ayi kumbakhumbira nkazi wa munzanu, kapolo wake mwamuna, kapolo wake nkazi, ng’ombe yake imuna, bulu wake, panango chinthu chirichose cha munzanu.”

18 Manje wanthu wose ambabva kugunda na kulira kwa lupenga ya nyanga ya nkhosa, ambaona kucheruka kwa tuphaliwali komasoti phiri inkulotoka utsi. Wanthu mwawo padabva komasoti kuona vimwevi adanjenjemera ndipo adaimirira patali. 19 Pamwapo wanthu mwawo adauza Mose kuti: “Iwepo umbayankhule na isepano, ndipo isepano timbakubvere, koma Mulungu ayi kuti ayankhule na isepano kugopera kuti tingafe.” 20 Pamwapo Mose adauza wanthu mwawo kuti: “Ayi kugopa, ndawa Mulungu chaiye wabwera kuti akuyeseni na cholinga chakuti mupitirize kumugopa kuti osati muchimwe.” 21 Pamwapo wanthu mwawo adapitiriza kuyima chapatali mwapo, koma Mose adafenderera ntambo upsyipa komwe kwenze Mulungu chaiye.

22 Manje Yahova adauza Mose kuti: “Aizirayeli uwauze kuti: ‘Mwaona mwekha kuti ine nayankhula namwe kuchokera kudzulu. 23 Ayi kudzikonzera milungu ya siliva na milungu ya golide kuti mumbayatumikire nkumbatumikira pomwe inepano. 24 Munikonzere guwa yantsembe yadongo, ndipo mumbaperekerepo ntsembe zanu zoshoka na ntsembe zanu zachibverano,* nkhosa zanu na ng’ombe zanu. Dziwani kuti m’malo yose yomwe nachitisa dzina yangu kukumbukiriwa, nidzabwere kwa imwepo kumuko ndipo nidzakudaliseni. 25 Mukambanikonzera guwa yantsembe ya minyala, ayi kumbaimanga na minyala yosemewa na visimbi. Ndawa mukambaphatisa basa minyala yochita kusemewa, ndiye kuti mwapsyipiza guwa mwiyo. 26 Ndipo guwa yangu yantsembe osati ikhale ya ntsikada, kugopera kuti pakupakira pamwapo angambakuonereni.’”