Genezesi
6 Wanthu padayamba kuwanda padziko yapasi, kudabadwa wana azinji akazi. 2 Pamwapo wana wa Mulungu chaiye* adayamba kuwona kuti wana wachikazi wa wanthu enze okhuza. Ndipo adayamba kutenga akazi aliwose omwe ambawafuna nkuwalowola. 3 Pamwapo Yahova adati: “Inepano nipitirizelini* kuwalekerera wanthu mwawa mpakana kalekale, ndawa ni wochimwa. Ndipomwapa andokhala na moyo magole 120 basi.”
4 Kuyambira nthawe mwiyo kuyenda kutsogolo, padziko yapasi penze Anefili.* Panthawe mwiyo wana wa Mulungu chaiye adapitiriza kugona na wana akazi wa wanthu ndipo adawaberekera wana. Wana mwawo enze viwanthu vamphanvu vomwe venzepo kalekale, amuna obvekera.
5 Pamwapo Yahova adaona kuti wanthu aipa maninge padziko yapasi. Adaona kuti maganizo ya wanthu na vofuna va mitima yawo venze voipa vokhavokha nthawe zose. 6 Yahova adadzilinga kuti ndawa chani adakonza wanthu padziko yapasi, ndipo vidamuwawa maninge mu ntima. 7 Pamwapo Yahova adati: “Nidzapsairiretu padziko yapasi wanthu wose omwe nidawalenga. Nidzapsairiretu wanthu, nyama zoweta, nyama zokwawa na vamoyo vombululuka mumlengalenga, ndawa ninkudzilinga kuti nidavikonza.” 8 Koma Yahova ambakondwa na Nowa.
9 Iyi ni mbiri ya Nowa.
Nowa wenze munthu wolungama. Iye wenze alibe chophonya pakati pa wanthu wa munthawe yake. Nowa adafamba na Mulungu chaiye. 10 Paidapita nthawe, Nowa adabereka wana amuna atatu, Semu, Hamu na Yafeti. 11 Koma dziko yapasi yenze idaipa pamaso pa Mulungu chaiye, ndipo idadzala na chiwawa. 12 Mulungu adanyang’ana dziko yapasi ndipo adawona kuti yaipa. Wanthu wose padziko yapasi ambachita vinthu voipa.
13 Patsogolo pake, Mulungu adauza Nowa kuti: “Naganiza kuti nidzonge wanthu wose, ndawa achitisa kuti dziko yapasi idzale na chiwawa. Ndipomwapa niwadzongere pabodzi na vinthu vose viri padziko yapasi. 14 Ukonze chingalawa pakuphatisa basa matabwa ya muti wa njale. Uchigawe vipindavipinda ndipo uchimate na phula nkati na kunja. 15 Uchikonze tene: Ntalintali chikhale mametro 134,* mfupimfupi mametro 22, ndipo kutalimpha kwake kuyambira pasi mpakana padzulu, chikhale mametro 13. 16 Chingalawa mwicho uchiikhe janera* kuti nkati mumo mumbagwerewere. Kuchokera kudenga nkufika pomwe pali janera mwapo, pakhale mpata wa masentimetro 44 na hafu. Nsuwo wa chingalawa mwicho uuyikhe m’mbali mwake. Chikhale na vipinda vosanzikidza vitatu, chapasi, chapakati na chapadzulu.
17 Inepano nidzabwerese chigumula padziko yapasi kuti chidzonge chamoyo chirichose cha padziko yapasi, chomwe chinamphuwe ya moyo* m’thupi mwake. Chirichose chomwe chiri padziko yapasi chidzadzongewe. 18 Nikuchita pangano na iwepo. Iwepo udzangene mu chingalawa mwicho pabodzi na wana wako, nkazi wako na azikazi wa wana wako. 19 Muchingalawa mwicho udzangenesemo chamoyo cha khaindi iriyose. Udzavingenese viwiriviwiri, chimuna na chikazi, kuti vidzasungike vamoyo pabodzi na iwepo. 20 Udzangene navo viwiriviwiri va khaindi iriyose. Volengewa vombululuka mobverana na mitundu yavene, nyama zoweta mobverana na mitundu yazene, nyama zokwawa padothi mobverana na mitundu yazene, kuti zidzasungike zamoyo. 21 Udzaunganidze chakudya cha khaindi iriyose nkuchingenesa muchingalawa mumo kuti chidzakhale chakudya chanu na cha vinyama.”
22 Ndipo Nowa adachita vose mobverana na vomwe Mulungu adamulamula. Adachitadi teno.