Ekisodo

12 Patsogolo pake Yahova adauza Mose na Aroni mudziko ya Iguputo kuti: 2 “Mwezi uno umbakhale mwezi wanu woyamba pagole. Gole yanu imbayambe na mwezi mwauno. 3 Uzani gulu yose ya Aizirayeli kuti: ‘Pantsiku yachi 10 ya mwezi uno mabanja yose yochokera kwa m’bereki m’bodzi adzatenge nkhosa ibodzi, banja iriyose idzatenge nkhosa ibodzi. 4 Koma peno banja ni ing’ono mwakuti ingakwaniselini kudya nkhosa yantero, banja mwiyo idzachemere banja inango yapafupi kuti adzadye nawo pabodzi m’nyumba mwawo, mobverana na chiwerengero cha wanthu. Mumbaganizire momwe munthu aliyese adyera kuti mudziwe kuwanda kwa nyama yomwe inkufunika. 5 Nkhosa yanu mwiyo ikhale yosapunduka, imuna ya gole ibodzi. Mungatenge mwana wa nkhosa panango wa mbuzi. 6 Nkhosa mwiyo muisamalire mpakana ntsiku yachi 14 ya mwezi uno. Patsogolo pake banja iriyose ya Izirayeli idzaphe nkhosa yawo maulo kuli bibibi.* 7 Adzatenge magazi nkuyawaza pamaferemu yawiri ya m’mbalim’mbali mwa nsuwo na feremu yapadzulu pa nsuwo. Adzachite vimwevi pa nyumba zomwe adzadyeremo nkhosa mwiyo.

8 Adzadye nyama mwiyo usiku muyo adzaiwotche pamoto ndipo adzaidye pabodzi na mikate yalibe vofufumisa na masamba yowawa. 9 Ayi kuti mudzadye iwisi, yobwabwasa panango yophika na madzi koma mudzachite kuiwotcha pamoto. Mudzawotche nsolo wake, vibodo* na va m’mimba. 10 Ayi kudzasunga nyama iriyose kuti ifike machibese. Koma iriyose yati idzakhalire mudzaishoke pamoto. 11 Kudya kwake mudzaidye tene, mudzaidye muli mange bande nchiuno mwanu, mulivale ntsapato komasoti muli na mpsimbo m’manja mwanu. Mumbadzadye mwakankulumize. Muyu ni Pasika* wa Yahova. 12 Inepano nidzagwate na mudziko ya Iguputo usiku muyo nkupha mwana aliyese woyamba kubadwa mudziko ya Iguputo, mwana wa munthu panango wa chipfuwo. Ndipo nidzapereke chiweruzo pa milungu yose ya Iguputo. Inepano ndine Yahova. 13 Magazi mwayo yadzakhale chizindikiro pa nyumba zomwe mudzakhalemo. Ndipo inepano nidzaone magazi mwayo nkukupitirirani, mwakuti muliri muyu udzakugwerenilini nkukudzongani nikambadzalanga dziko ya Iguputo.

14 Ntsiku mwiyi idzakhale chikumbuso kwa imwepo, ndipo mumbachitire Yahova chikondwerero kumibadwo yanu yose. Imweyi ni lamulo mpakana kalekale kuti mumbachite chikondwerero chimwichi. 15 Mumbadye mikate yalibe vofufumisa kwa ntsiku 7. Pantsiku yoyamba mumbachose mu nyumba zanu ufa wokanya wokhala na vofufumisa ndawa aliyese wakudya nkate wokhala na vofufumisa, kuchokera pa ntsiku yoyamba kufika pa ntsiku yachi 7, munthu wochita vimwivi ambaphewe kuti osati akhale pomwe mu Izirayeli. 16 Pantsiku yoyamba mumbachite nsonkhano wopatulika, ndipo pantsiku yachi 7 mumbachite pomwe nsonkhano unango wopatulika. Muntsiku mwizo ayi kuti mumbaphate basa. Koma mumbandodzaphika chakudya chakuti munthu aliyese adye.

17 Mumbadzachite chikondwerero cha mikate yalibe vofufumisa, ndawa pantsiku mweyi nidzabulise magulu yanu mudziko ya Iguputo. Mumbadzasunge ntsiku mweyi kumibadwo yanu yose. Imweyi ni lamulo mpakana kalekale. 18 Mu mwezi woyamba, pantsiku ya 14 ya mwezi muyo, maulo mumbadzadye mikate yalibe vofufumisa, mpakana kukafika m’maulo ya ntsiku ya 21 ya mwezi muyo. 19 Kwa ntsiku 7 mu nyumba zanu osati mumbadzagumanike ufa wokanya wokhala na vofufumisa, ndawa aliyese yemwe wadya chakudya chokhala na vofufumisa, peno akhale mulendo panango mbadwa ya Aizirayeli, munthu muyo adzaphewe kuti osati akhale pomwe pagulu ya Aizirayeli. 20 Ayi kumbadya chirichose chokhala na vofufumisa. Mu nyumba zanu zose mumbadzadye mikate yalibe vofufumisa.’”

21 Mwakankulumize, Mose adachemera akulu wa Aizirayeli nkuwauza kuti: “Yendani mukasankhulire mabanja yanu yose wana wa vipfuwo* nkuwapha kuti akhale ntsembe ya Pasika. 22 Mukateno mukatenge kamuti ka hisope* nkukavuwika m’basiya yamagazi nkuyawaza paferemu ya padzulu pa nsuwo, ndipo yanango muyawaze pamafelemu yawiri ya m’mbalim’mbali mwa nsuwo. Aliyese osati adzabule m’nyumba mwake mpakana machibese. 23 Manje Yahova akambadzayenda kukapha Aiguputo na muliri, nkuwona magazi pamaferemu ya padzulu pamisuwo yanu na maferemu yawiri ya m’mbalimbali mwa nsuwo, Yahova adzapitirire nsuwo muyo ndipo adzabvumelini kuti muliri wa impfa ungene m’nyumba zanu.

24 Ndipo mumbachite chikondwerero chimwichi. Imwiyi ni lamulo kwa imwepo na kwa wana wanu mpakana kalekale. 25 Mumbadzachite mwambo muyo mukadzangena mudziko yomwe Yahova adapolomisa kuti adzakupaseni. 26 Manje wana wanu akadzakubvunzani kuti: ‘Ndawa chani tichita mwambo muyu?’ 27 Mudzawauze kuti umuyu ni mwambo wopereka ntsembe ya Pasika kwa Yahova yemwe adalumpha nyumba za Aizirayeli mu Iguputo pomwe adapha Aiguputo na muliri koma adapulumusa mabanja yathu.’”

Padateno, wanthu mwawo adagwada nkujolimira pasi. 28 Manje Aizirayeli adachoka nkukachita mobverana na momwe Yahova adalamula Mose na Aroni. Adachitadi vimwivo.

29 Manje pakati pa usiku, Yahova adapha mwana aliyese woyamba kubadwa mudziko ya Iguputo. Kuyambira mwana woyamba kubadwa wa Farao, yemwe wenze pampando wachifumu, mpakana mwana woyamba kubadwa wa munthu yemwe wenze mudjeri, komasoti mwana aliyese woyamba kubadwa wa nyama. 30 Pavidateno Farao, atumiki wake wose na Aiguputo wose adamuka usiku muyo. Ndipo wanthu adayamba kulira maninge mudziko yose ya Aiguputo, ndawa palibe banja olo ibodzi yomwe yenze iribe maliro. 31 Usiku muyo Farao adachemera Mose na Aroni nkuwauza kuti: “Nyamukani, chokani pakati pa wanthu wangu, imwepo na Aizirayeli wose. Yendani, katumikireni Yahova ninge mwamwanenera. 32 Mutenge pomwe nkhosa na ng’ombe zanu ninge mwamwanenera, muyambepo. Komasoti mukanipempherere kwa Mulungu wanu kuti anidalise.”

33 Pamwapo Aiguputo adayamba kuchichimiza wanthu mwawo kuti achoke mudziko mwiyo mwakankulumize. Iwo adati: “Ndawa tose tikundokhala ninge tafakale!” 34 Pamwapo Aizirayeli adanyamula ufa wokanya ulibe vofufumisa. Adamunyamulira mu vokanyiramo ufa* viri mange pa nguwo zawo. 35 Aizirayeli adachita vomwe Mose adawauza ndipo adakumbira Aiguputo vinthu va siliva, vagolide na vovala. 36 Manje Yahova adachitisa kuti Aiguputo akomere ntima wanthu wake, mwakuti Aiguputo mwawo adawapasa vinthu vose vomwe adawakumbira mwakuti iwo adatenga vinthu vizinji va Aiguputo.

37 Pamwapo Aizirayeli adanyamuka ku Ramese nkuyenda ku Sukoti. Penze amuna ofamba pasi othamangira 600 000, osawerengera na wana. 38 Ndipo gulu ya wanthu wa makhaindi yosiyanasiyana* idayenda pabodzi na Aizirayeli mwawo. Adayenda pomwe na nkhosa, mbuzi na ng’ombe zizinji. 39 Iwo adayamba kuphika mikate ya bololindo yalibe vofufumisa pakuphatisa basa ufa wokanya womwe adachoka nawo ku Iguputo ule. Ufa muyo wenze ulibe vofufumisa ndawa adawauza kuti achoke ku Iguputo mofulumiza maninge mwakuti alibe kukwanisa kukonza chakudya chirichose pakunyamuka.

40 Aizirayeli omwe adakhala ku Iguputo, adakhala mudziko yachilendo kwa magole 430. 41 Pantsiku yomwe magole 430 yadamala, gulu yose ya wanthu wa Yahova idabula mudziko ya Iguputo. 42 Muyu ni usiku womwe ambadzakondwerere kuti Yahova adawabulisa mudziko ya Iguputo. Yahova ambafuna kuti Aizirayeli wose, ambachite chikondwerero chimwichi m’mibadwo yawo yose pakukumbukira usiku muyu.

43 Patsogolo pake Yahova adauza Mose na Aroni kuti: “Lamulo ya Pasika ni iyi: Mulendo* osati ambadyeko. 44 Koma peno munango anakapolo mwamuna yemwe adamugula na kobiri, mumbamuchite mdulidwe. Akachitiwa mdulidwe iyembo angadye. 45 Mulendo yemwe wabwera kudzakhala namwe komasoti waganyu ayi kuti ambadye. 46 Mumbadyere m’nyumba ibodzi. Ayi kumbabula panja na nyama iriyose komasoti ayi kumbaphwanya bonzo iriyose ya nyama mwiyo. 47 Gulu yose ya Aizirayeli imbachite chikondwerero chimwichi. 48 Peno mulendo yemwe ankukhala namwe ankufuna kuchitambo chikondwerero cha Pasika kwa Yahova, mwamuna aliyese wa m’nyumba mwake ambachitiwe mdulidwe. Akateno angabwere kudzachita namwe chikondwerero, ndipo afunika kuwonewa ninge mbadwa ya dziko mwiyo. Koma munthu wosachitiwa mdulidwe ayi kuti ambadye. 49 Lamulo iriyose imbaphate basa chibodzibodzi kwa mbadwa na kwa mulendo pakati panu.”

50 Pamwapo Aizirayeli wose adachita mobverana na vomwe Yahova adalamula Mose na Aroni. Adachitadi vimwivo. 51 Pantsiku mwiyi, Yahova adabulisa Aizirayeli wose* mudziko ya Iguputo.